LUNGLEIA RT-PCR KHAWL HMAN LOHA AWM RENG HMANG HIAN ZMC-AH BSL-3 LABORATORY DIN THUAI NI RAWH SE

COVID-19 vangin thla 6 zet kan buai ta a, COVID-19 vei pawh mi 1500 kan chuang ta. Hetih chhung hian Falkawna TB Research atana Researcher pakhatin fund a hmuh hmanga BSL 3 Laboratory tur a siam lai mek hawh sakin laboratory phuahchawp takin a din a. RT-PCR khawl a dah a, thla 6 zet a liam hnuah pawh Researcher pakhat laboratory din lai kan hawh chawp chu kan la ring ta ngar ngar mai a ni. He laboratory-ah hian RT-PCR khawl 3 a dah niin sorkarin a sawi nghe nghe.

Mipui thawh­khawm CM Relief Fund hmanga True­lab Quattro khawl lei hi a ṭha a, District tina dah pawh hi a ṭha e. Amaherawhchu, ni khata Truelab Quattro-in a test theih zat hi a tlem a, Mizoram mamawh a phuhru pha lo a ni tih a chiang ta hle. 

Tunah hian ZMC-ah sample lak sa sang tam tak a inhnawh khawm mek a. Kar khat liam ta a sample lak tawh, result la chhuak lo a tam hle. Hei vang hian Aizawl khawpui chhunga veng tam takin harsatna an tawh phah ta a ni. 

RT-PCR dahna tur BSL 3 Laboratory din hi Sorkar hian a ngaipawimawh lo a, tunah sample collect sa inhnawh khawm avangin result a chhuak har ta lutuk hlawm a, kan buai ta a ni ber mai. 

Thla 6 a liam hnu pawha BSL-Laboratory pakhat pawh din thei lo a, mimal laboratory sak lai hawh chawp Mizoramin kan la ring reng hi hriatthiam theih a ni tawh lo. 

Thla 6 kan buai tawh a, sorkar tan building thar hlak sa a laboratory din tur pawhin hun a tam tawk a, khawl thar leina hun pawh a tam a, hnathawktu tur Contract a rawihna tur hun pawh a tam tawk e! 

He thil hi kan Health Minister zah­awm tak, Dr. R. Lal­thangliana pawh hian a mualphona a ni tih pawm teh se. 

Lunglei Civil Hos­pital-ah Pu Zodin­tluanga, MLA-in a MLA fund hmanga a lei RT-PCR khawl pawh hman lohin thla engemawzat dah a ni tawh a. Lunglei a hman loh a awm reng ringawt ai chian khawl hi Zoram Medical College-ah la phei se la, BSL-3 laboratory hi a rang thei ang berin din thuai teh se.