Covid-19 hrileng kara inthlan

Mizoram district 9 ah Village council leh Local council inthlan chu ni 27.8.2020 khan neih a ni a. Hrileng avangin Local council 24 leh village council 8 te chuan inthlanna an nei thei lo. Village council leh local council te hun hi May ni 7 khan a tawp tawh a, Covid19 hrileng vangin an hun hi vawihnih pawisei a ni tawh. 

Sorkar hian hun pawhsei zel hi ṭha a tih loh avangin August ni 3 khan inthlan neih tur hi a puang ta a. Hemi chungchangah hian Sorkar lai leh Opposition te ngaihdan a inang lo hle a. Opposition lam chuan hetiang hrilen nasat hunlai a inthlan lo buatsaih hi mipuite tan a him lova, chuvangin inthlan hi buatsaih ni rih lo se , Village Council te chu thla 18 lai a pawhsei theih an ti ve thung a. Inthlan hun sawn leh sawn loh chungchang hi chu inhnialna tam tak a awm thei a, ṭhatna leh ṭhatlohna a awm ve ve thei ang. 

Covid19 len hnuah Singapore, Serbia leh South Korea bak chu inthlanna nei an la awm hriat a ni lo. Mizoram hi India ram pumpuiah Covid19 hri len hnua inthlang hmasak ber a ni hial ang. Tunah hian Bihar Assembly Election hi October/ November thlaah buatsaih tum mek a ni. Election Commision of India (ECI) pawhin heng ramte tihdan hi kan la zir zel ang an ti. He inthlan hi Mizoram mai ni lo India ram tan pawh inthlanna  pawimawh tak a ni, kan tih dik loh leh ṭha tawk lo te pawh thlir letin kan en nawn a, kan inzir zel a ngai a ni. 

ECI kaihhruaina: ECI chuan hripui lenlaia inthlan dan tur in kawihhruaina a chhuah a. Mipuite him theihna tur a ngai pawimawh hle. A  pawimawh deuh deuhte han tarlang ila: 

i)    Vote thlaktuten mask an vuah tur a ni

ii)    Hall luhna pawnah sanitizer, sahbawn leh tui a awm tur a ni

iii)    Hall luh dawnin thermal screening tih tur a ni

iv)    Social distancing ngaih pawimawh tur a ni

v)    District hmun pawimawhah Covid19 chungchang endik turin Nodal Health Officer an awm tur a ni

vi)    Marker-in intlarna tur rin bial tur a ni

vii)    Covid19 laka mipuite in venhimna tur poster booth bulah tar tur a ni.

viii)    Voter-ten hming an sign leh EVM a vote an thlak laiin hand glove an bun tur a ni

ix)    Polling officer duty tan Mask, Sanitizer, Face Shield leh Glove te pek tur an ni. 

x)    Postal ballot hi kum 80 chin tan, rualbanlo tan, Covid19 positive tan leh pawimawh bik tan siam theih a ni. 

Bihar Assembly Election inbuatsaihna: Bihar-ah October emaw November-ah emaw State Assembly inthlan neih a ni dawn. Inthlannaah a tlem thei ang bera in tawh loh nan ruahmanna siam an tum. Election Commission chuan glove leh hmawlhte tooth pick ang tiat mimal tin hman tur EVM chhut nan hman a tum. Maua siam hmawlhte hi plastic aia an duh chhan chu hri inkai a har zawk  an rin vang a ni. 

Mi pakhat zelin EVM vote nana hmawlhte hman a nih loh chuan EVM kha disinfectant a hruk fai zel a ngai dawn a, chu chu a hautak lutuk dawn a ni an ti. Heng bakah hian Sirynge mi pakhat tan pakhat zel indelible ink tin hnawih nan hman an tum bawk. Bihar State Khadi Board hnen aṭangin khadi glove lei an tum a, thil ṭul dangte pawh ram chhung aṭang a tam thei ang ber lei an tum. Chu chuan an state  mi leh sa tam tak tan hna a siam sak bawk an beisei a ni. Heng an rawtna te hi Election Commission of India hnenah lo pawmsak turin an thawn mek a ni. 

Mizoram VC/ LC Election: Election puan aṭanga inthlan hun chhung hi thla khat pawh a tlin loh avangin inthlanna buaipuitute an buai hle. Covid19 hripui lenlai a nih avangin tunhma  inthlan an buaipui ang ngawt khan a tih theih lova, mipuite himna tur ngaihtuah tel a ngai bawk si. Vote chhiar a nih khan vote thi tam tak hmuh a ni. A chhan chu vote thlaktu tam tak khan tihdan tur an hriat chian loh vang a ni. 

Ṭhenkhat chuan arrow cross kha bawlhlawh bawmah an lo paih a, tissue paper te pawh hmanna chang an hre lo a. Ṭhekhat chuan vote tur aia tam an lo vote a, chil a nawhreh tum pawl an awm bawk. Ballot paper keng chhuak ta daih te, bollot paper hnuaia lo ziak tlar dul te, ballot paper-ah pen hmanga lo thai rang an awm nuk mai. Vote thi pawh tam tak a awm phah a ni. 

Hetianga a buaichuar viau chhan pakhat chu hripui len vangin party tinten in tin tlawha an campaign ruala mipuite vote thlak dan an zirtir ṭhin vang a ni a tih hleih theih lova. Inthlan dawn tepah Aizawlah chuan kar khat lai lock down a lo ni leh a. Kum 5 chhung chuan vote dan chungchang hi a hriat reng theih lova, mipuite inzirtir ṭhat leh zel a ngai ṭhin. Ṭhalai tam tak tan chuan vote an thlak vawi khatna tur a ni a, chuvangin vote thlak dan tur hi zirtir an ngai khawp mai. 

Covid19 hripui len lai a nih avangin State Election Commission chuan tin hnawih nan tooth pick mimal tin tan pakhat ṭheuh hman tur a ruahman bakah ballot paper a crossbar seal chhutna vawn chhan tur tissue paper a chhawp bawk. Hengte hi hri vei lo awm ta se thil in khawih pawlh awm thei laka invenna tur a ni. Mi tam tak chuan hmanna chang an hre lo, vawn chhan hmang lo an tam khawp ang. 

Polling Station ṭhenkhatah chuan marker pakhat indelible ink in hnawih ṭawm nan an lo hmang a. Vanduai thil thuah voter pakhat kha hri vei lo ni ta se a hlauhawm khawp ang. Glove aiah tissue paper hman a nih chhan hi damdawi lam mithiamte leh ECI te pawhin hripui laka him tawkah SEC rawtna an pawmpuiah ngai ila. Pawmpuina lak a lo nih loh chuan inthlan lehah chuan him tawka ECI pawhin a ngaih leh a pawmpui ngei hman tawh nise a duhawm khawp mai. 

Social Distancing chungchangah hian polling booth ṭhenkhatah chuan mipuiten an ngai pawimawh lo khawp mai. Voter tan ṭhutthleng te chhawp a ni a, a tahtawl zelin an ṭhu a, kan hlauh ber in khawih pawlh kha awmze awm miah lovin kan chhuah leh ta a ni. Hripui vei lo awm ta hlauh se chuan kan kai darh nasa viau lo ang tih a sawi theih loh. 

Vote thlak dan chungchangah hian inkaihhruaina hi mumala chhuah a nih loh avangin ṭawngkaa inhrilh chawp a ngai hle a ni. Social media-a mi ṭhahnemngai ṭhenkhatin vote thlak dan tur  an tihdarh  bak chu inkaihhruaina  mumal hmuh tur a vang hle a ni.