Kan Kût leh ngei awm sia
Kum bul ṭan chauh mah ila, reiloteah Vau Thla kan thleng ang a, Mizote Kût pui ber ‘Chapchar Kût’ kan hmang leh ngei awm si a, duhthusam lohna ramah hian duhthu ka’n sam ve teh ang!
Kum kal taa Chapchar Kût kan hman dante khan sawisel a hlawh angreng hlawm viau mai a. Ṭhenkhat phei chuan, an fate kal vena tlak loh ang hialin an ngai tawh a nih kha! Mi ṭhenkhat lahin, Chapchar Kût pawh kan hmang lo, concert kan nei a ni ringawt alawm, an lo ti ve mek bawk a. Mizo te’na kum khat chhunga kan Kût neih ropui ber leh hlut ber ṭhin kan hman danin sawisel leh duhkhawp lohna a tawk nasa ta khawp mai.
Ni e, hnam dangin an kût an hman dan leh an ngaihhlut thiamzia te, khualzin an hip luh nasatzia te kan hmu pha ve si a, tuna kan kût hman dan hi chu a sitawm
ṭan ve tawh em bawk a ni! Zu kan zawrh leh hnua Chapchar Kût kan hman leh hmasakna ber a ni dawn lehnghal a, mi tam tak rilru chu a khingbai khawp ang. Zu khap burna hnuaia kan Kût hman pawh khati khawp khan a chibuh tawh a nia.
A hrim hrimin Mizo mipui pawh hi kan inenfiah deuh chu a ngai a ni. Huau huau kan zo lo lutuk reng mai hi chu a zahthlak. Engemaw tihkhawm hleka ruih ngei ngei tur emaw tipawl hi kan la awm nual mai; kan ṭhanhnan deuh emaw tih mai tur a ni ṭan! Kam nam tawk leh lo ti deuh phetphut tawk hi chu a awm loh theih loh. Mahse, rui buai leh mualpho lutuka lo awm tawk kan la awm ṭeuh mai hi chu sim nachang hriat a hun tawh ngawt mai. Kan changkan tawh ngaihtuahin kan changkang lo ru riau zel!
Chapchar Kût kan hman dan hrim hrim hi kan sawrkar pawh hian a ngaihtuah chian deuh a, a tihdanglam ngam a hun tawh khawp mai. Mizo ten kût kan neih zingah chuan kan thinlunga la tla nâ ber leh kan hmanzui rei ber a ni a, hetia a ngai pet peta hman reng hi chu a khamawm
ṭan ta e! Zaithiam sawm bikte zaitir a, lam tura ruat bikte lamtira awmnikhama hun hman leh ringawt hi chu a ho angreng a, khualzin hip chu sawi loh, kût neitute pawhin kan hlut lo ṭan zel chu a nih tak ber mai hi maw!
Kan hnam ziarang a lang lo tulh tulh mai ni lovin, western culture milin kût kan hmang ve mai mai a ni ta ber mai! Branch ruat bikten costume parade an rawn nei ve leù leù a, a zo titih der. Khuangchawi lai entir angte kha a awm ta lo emawni, ka hmu ta ngai mang lo. Tunhma deuh kha chuan kan hlimpui ber kha a ni ve ṭhin asin. Zaithiam sawm bikte lah hian hnam ziarang lang thei hla rawn sak nachang reng reng lah hi an hre ta mang lo!
Kan kût neih hlut ve ber leh upa ber pawl a ni ve a, ni khat leka kan hmang zo mai ṭhinte hi a uiawm ngawt mai. Ṭhalfavang Kût leh Anthurium Festival tih vel leh kût phuahchawp lutuk hmang kur luai lo hian, Chapchar Kût-ah hian insawrbing ila, ni hnih ni thumte hmang law law ila a châkawm.
Aizawlah pawh hetia hmun khata tileüh leüh lo hian, hmun thum velah a lawmna nei ila - Vaivakawn field, Ramhlun Sport Complex, High School field tih velahte hian nei ta ila. Lammual hi chu dim ve deuh ang u, tunah pawh I-League khelna tlak loh khawpin kan chhuah tawh hi, zahthlak tak a ni!
Sawrkar hian sum tum se, CYMA kutah hian dah hmiah se la, annin host vek law law se la a felfai zawkin a rinawm. Hman aṭanga kan hnam tihdanphung chi hrang hrang leh kan nun ziarang lang thei tur ang berin item lo siam ṭeuh se. A titur bik branch ruatin rawn performs mai se la. Chu chu mipui a duh apiangin chhim ta ila.
Lemchan angte pawh hmuhnawm tham deuhin rawn chang se la. Hnam lam entir tur bikte ruatin, rawn ti se. Kan hnam infiamna angte pawh, lemchan hmanga entir satliah mai lovin, infiammite inelnate buatsaih tel law law ila, a hmuhnawm thei tur ang berin. Mi thiam tak tak, kan hnam ziarang pho lang tur item duang thiam tur tam tak an awm ṭeuh ang, chung mite chu rawn nachang hria ila.
Tichuan, hmun thum velah chuan inang lo nuaiin hun hmang ila. Mipui chuan kan duh lam lam kan tlawh kual tawh mai dawn a ni. Mipui chanvo tih tel ve kan duh a nih leh, tlai lam apiangin hnam hla hmangin chai mup mup ila, chhawnghnawt ziah bawk ila.
Heti anga kum hnih vel kan hman theih chuan, mipuite pawn kan hlutin a lo nung thar leh ang a, khualzinte pawh kan hip deuh ngei ang. Kan in-advertise thiam deuh phei chuan, Chapchar Kût rawn chhim tum hrim hrim ram dang mi kan hip lut nualin ka ring. Theih phei se, Zo Khua din chawpin, tunhmaa kan nun dan anga lemchang tlawh turte awm thei se - tunlai ṭawng takin a hit ngawt ang!
Tuna kan hman dang ngai reng hi chu a ninawm ṭan a, a hlu lo a, mi pangngai tan phei chuan tel ve ngam loh khawp a ni
ṭep tawh! Kût neitu ber thinlungah pawh a tla nâ lo ṭan mai a ni lo, sawrkar pawhin sum a seng thlawn mai mai niin a lang ṭan!
- Rindika Mizo
Hmun Thengthaw Rûn