Politics-ah chawlh a awm lo Politician chawl duh lo erawh kan tuar
Kan politician-te ṭawngkam, 'Politics-ah chawlh a awm lo' tih hi chu an thusawi dik ber pawl a ni awm e. Chutihrual chuan, a sawitute zingah chawlh hun tawh, chawl duh hauh si lo te avanga kan tawrh erawh a tam hle.
Mizoram retheih chhan lian tak leh, hma kan sawn theih loh chhan pawh hi, politician chawlh tum lote vang hi a ni pakhat.
Hei leh chen min hruaina chu, heti mai hi a ni. Chu chu an hre reng a, ek cheh ṭhuta kan la ṭhut bik chhan hi anmahni vang a ni tih lah an pawm duh miau si lo a. 'Ṭhalaite khawvel' tih pawh hi kan ram politics en hi chuan, la hlat tak kan ni. An thawk theih ṭek ṭek chhung hi chuan, MLA nih tumin an la hmanhlel si.
Kan politics khelh dan phunga mipuiin kan duh loh deuh pakhat chu, inthlan dawn apianga mirethei an hmangaih thar thut leh, ṭhalaite hmakhua ngai ber niawma an awm thiam ṭhin hi! An tlin hnua mirethei tana an din tak tak lohzia leh ṭhalaite hmakhua an ngaih lohzia chu kan hmu fo mai.
Kan political party-te pawh hi en ila, Congress chuan Pu Lal Thanhawla aia ṭha an hmu lo, chutiangin Pu Zoramthanga aia ṭha hi MNF tan an awm bik chuang lo.
ZNP President Pu Lalduhoma pawh hi ngaihtuah thleng teh ang, hei leh chen ZNP a hruai ta, an thlen chin chu mipuiin kan hai lo e.
Kan politician-te pawh hian hei hi lo ngaihtuah ve teh se, politics a chawlh awm lo lai hi chu a nih dan tur a nih avangin mipuiin kan hrethiam. Anni erawh hi chuan, chawlh hun hi hre teh se.
India rama cheng kan ni a, vairam politics ṭhenkhat hi chu kan entawn lo thei lo pawh a ni ang. A bik takin hruaitu chawl duh lo leh eirukna chungchanga an tih dan phung kan la nasa lutuk hi chu Zoram hian a tuar a, kan retheih phah chiang khawp mai.
Ram ropui leh changkang zawkte hi kan politics khelh danah te hian entawn ve hram hram ang u. Lalna leh thuneihna atchilh hi party tinah hian an awm a, hengho hi an chawlh tak tak hma chuan he Mizoram hian hma a sawn thei ngai lo ang.
- Biaksiamtluanga