Chhiat ni/ ṭhat ni

Kan thih hian puana intuam awm tak kan awm ṭhin a, inral awm tak kan awm bawk a, a lawmawm ṭhin a. Hman deuh aṭang khan sap tih dan kan zir ve ṭan a, puan chuan kan la in tuam tho a, thil ṭha tak a ni.

Pawisa in kan inral hi chin dan ṭha tak niin ka hria a. Chutih rual chuan pangpar kan in pe a, a lawmawm viau rualin ti zawng hian han ngaihtuah ve thung ila. Pangpar hi a to viau mai a, cheng zahnih man a awm meuh lo ang. Pangparte hi kan thih aṭanga thla hnih khat hnuah chuan dahna tur buaipui a ngai ṭan der tawh a, a hnawksak lam pan ni hial tawh ṭhin.

Paih dawn chuan thil uiawm tak a ni a, sumah chantir dawn ila thil mawi a ni tawh der si lo a, a bal duh ang reng viau mai lehnghal. Tam tak tan chuan a hnawk ru mai thei a ni, khawhar chhungte tan chuan pangpar in pek hi a manhla lutuk tawh lo a ni. Khawhar lenpuitu an awm neuh neuh a, thingpui lum a lo ngai fo a, chaw ei khawm te a lo ngai a; thlan siam te a ngai a, sum leh pai senna tur a tam em em a.

Kan pangpar inpek khan chung ang thil chu pakhatmah kan ti thei lo a, mite ralna tlingkhawm khan a daih loh phei chuan mahni neih sa emaw puk chawp hial emaw te pawh kan ngai hlawm ṭhin a nih hi. Chutih a nih avang chuan sum faia in ral hi a ṭha ta ber zawk a ni.

Pangpar man atan cheng zathum emaw a aia tam emaw kan seng phal a nih rau rau chuan a pawisain in pe tawh zawk ila a tuartu chhungkaw tan chuan a let tam takin a hlu a ni. Mi hnam tih dan ṭha lo hi chu i copy lutuk tawh lo teh ang u.

Chu mai a ni lo e, Kohhran Dan Thianghlima inneite hi kan lawmin hlu kan ti a, Kohhran pawhin a ngaihlu a ni; ngaihhlut tur pawh a ni. Ruai ropui nen hian kan han ti hluai mai ṭhin a, phu pawh a phu a ni. Chutih rual chuan mi tam tak tan chuan hetiang tih hi a rit lutuk a, kan tlin lo viau a ni.

Tlin lo chunga mite tih danga tih tum ve vanga tih bung bung ai chuan tiin mi tam tak chu a rukin an inru mai zawk ṭhin a ni. Hetiang thil ṭha lo tibo tur hian Kohhran aṭang hian hautak lo zawnga mo lawm dan inzirtir theih niin ka hria.

Hnam dang tihdan kan entawn a, veil, thuam chhawm leh mo kawr etc te kan ti a, kan in seng nasa lutuk ṭhin hi a ṭha lo a, kan in chhung milin inchei ila, thuam i chhawm ngam tawh ang u. Mizo kan ni a, Mizo taka thil kan tih ngam a hun e.

Kan chet vel dan en chuan kan hausak hmel hlawm viau a, a tak ramah erawh kan per capita income leh kan khawsakzia a inmil lo lulai deuh si a ni. A hausate chuan an duh leh ti rawh se, hausa te tih dan ang zela tih ve erawh i tum tawh lo ang u.

- J.C. Dengmawia, Bawngkawn