OPEN LETTER TO AIZAWL KHAWPUI

Subject: Mizoram kut hnathawktute thlai thar hlut sak. 

Aizawl khawpui a kan unau duh tak te u, hei hi kan ngen a che u, kan kut hnathawh rah kan thlai thar te hi min lo hlut sak ve tawh ru khai. Hei hi thinlung taka kan ngenna che u a ni.

Khawvel pum hripui avangin kan buai a, kan ram ngei pawhin kan tawrh mek lai a thil lang chiang ta chu, thingtlang kut hnathawktute thlai thar chhuah hian kan Zawlkhawpui hi a chawm thei hle a lo ni. 

Hun kal tawh kan thlir kir chuan state pawn aṭanga thlai kan lak luh te hi kan ram chhunga thar chhuah aiin kan hlut zawk a, thil inang rengah pawh Mizoram thar chhuah chu a hnawng zawkah a ṭang zel a. Hetiang a nih chuan kuthna­thawktute mite tan ṭan lak ngaihna a awm lo a ni. Kan ram chhunga kan thar ve theih ang te hi a ram neituten min hlut sak loh chuan tu nge min hlutsak tawh chuang ang? 

Kan thlai thar Aizawla kan lo phurh thlen ve te hi min lo nep a, kan mangan hun nghak kher tawh lovin min lo lei sak nghal zung zung ula, beidawnna ruam aṭangin beiseina thar min han pe teh u khai. 

Hetiang a nih chuan keini thingtlang lama kut hnathawktute pawh in tun aia nasa in hma kan la ang a, kan ram sum state pawna luang chhuak nguah nguah ṭhin te pawh tam tak kan lo hum ve thei ngei ang le. 

Tichuan kan thawhrimna in lukhawng a lo nei ve tawh bawk ang a, thawk peih lo a kan ngaih mi tam tak hi a taima ber ber an lo ni tawh bawk ang. Hei hian kan rilru put hmang dik lo ṭhin pawh a siam ṭha ngei ang.

Hripui Ieng avangin kan thlai thar tam takin rate mumal an neih phah a, hun lo kal zel turah pawh sawrkar hi harh chhun zawm zel thei se kan va duh em. 

Thlai thar rate siamtu tur te pawh kan chah duh chu, beka thlan tui luang zawih zawih leh kawla ni chhuak chhiar tak meuhin hna kan thawk a, heng kan thlai te hi Aizawl kan lo phur thleng thei chauh a ni tih hi min lo hriat sak tel hram dawn nia.

A tawpna atana kan ngen duh che u chu hei hi a ni, thingtlang kut hna­thawktute hi in unau te vek kan ni. Khawvel eng kan hmuh ve theihna tur awm chhun chu kan thawhrim rah kan thlai tharte min lo hlut sak chauh hian a ni. 

Min hmangaihna leh lainatna lo Ian tir zel turin kan ngen tak meuh che u a ni e.