Court hmang ṭangkai thiam ila

Mizote hian hman lai aṭang tawha chin ṭhan deuh kan nei a, chu chu thubuai hla buai neih loh hram a ni. Mizo pu pute kha an fakawm khawp mai a, khawtlangin an beisei ang chu anmahni tana harsatna lian tak pawh ni se tih hlawhtlin hram an tum ṭhin a, hreh tak chung pawhin khawtlang tana hnawksak nih ai chuan khaw dangah te pawh an pem bo mai ṭhin.

Ṭawng kam lar a awm a, "Ṭhenawmte do ai chuan khaw sarih do a thlanawm zawk" tih te pawh a awm hial a ni. A awmzia chu
ṭhenawm khawvengte nena inhmuh thiam loha thubuai hla buai neih pui an duh lohzia sawina a ni ber mai.

Hmanlaia an chin ṭhan dan tlem te kan han sawi a ni mai a, tunlaiah erawh chuan khawsa rih do chu sawi loh ṭhenawm te pawi sawi hi kan hlau ta lem lo hle a. Mahni duh ang anga ramri kham mai te, vantlang kawng nek hreh hauh lote pawh veng tinah kan awm thluah tawh a nih hi. Ka sawi tum ber chu a ṭul a nih phawt chuan Mizote hian Court kal i hreh lo ang u tih hi a ni.

Vanglaini chan-chinbu January ni 12, 2016 chhuakah khan an rawn ziak a. Kum 2000 aṭanga kum 2015 thlenga thubuai chhui kaihhnawiha court-a thubuai thehluh zat chu a pung chho hret hret a, kum 2015-ah chuan court-a thubuai thehluh a tam fal ta viau a ni. A awmzia chu Mizote hi kan fing tawh a, dikna hai lang turin court hman ṭangkaina chang kan hre tawh tih a ni.

Mizote chin dan ṭha lo tak pakhat chu thil dik lo a awmin Mizo dana in ngaihdam mai kan ching a, hei hian sualna tam zawk a hring chhuak thei tlat a ni.

Tehkhin thu pakhat - mi pakhat chuan kum nga kalta khan hmeichhe naupang a khuaikhem a, mahse a tawp a thlen hman hmain man chhuah a ni a. A mantute hian kut an thlak nual a, police-ah an pe a, mahse a tuartu naupang nu leh pate hian an laina hnai a nih avangin pawi khawih tumtu hi an ngaidam a, an chhuah zalen a. A hnu lawkah he pa bawk hian pawi rapthlak tak a khawih a, ngaihdam theih a ni ta lo.

Thil tisualtu chu misual pa hi a ni a, mahse uluk taka ngaihtuah a pawi khawih an ngaihdam vanga zalen taka pawi khawih thei dinhmuna a din vang a ni. Pawi a khawih vawikhatnaah khan jail-ah te khung rem ta se chuan kha thil pawi tak kha a thleng kher lo ang.

Kristianna leh Mizona kaihkawpa pawi khawihtute kan ngaidam a, kan chhuah zalen fo hian pawi khawih ching mihring kan tizalen tih kan hriat a ngai.

Tin, Court-a thu-buai hla buai chin fel kan hreh lutuk hi a dik lo. Court hi misualte kalna tur chauh a ni bik lo a, mi felte tana hmanraw ṭangkai, dik taka rorelna in a ni bawk e.

- Ramhmangaiha