Ler chu ler tur, mahse...
He ṭawngkam phiangsen hi a ngeih loh tan chuan hremhmun kawngkhar deng dawt khawpa invilikna tham a nih rualin, sa pa tal nawk nawk tan chuan thu ho lam tak a ni thung ang. Vawi khat pian mana an hir-ha lohten tiin ṭhenkhat chuan an lo hisap ngei ang a; mahse, heng thil inphairal tam zawkte hian beidawnna piah lama khaw lo la awm turah hian a thlentir chawk a, chi loh tak a ni. Hmel ṭha mah se, a zei vak lo chuan an chu-kha lem hlei lo va, hmelin puak ti lo mah se, a zei tlat si chuan Zun an nei a, mi a hip zaw mah a. Hmel leh pian pangngai tan rau rauah pawh tlema lu zo deuhte chu zakhaw a rawi ve a, mahni mum muma mum tan phei chuan khual a nek lem hlei law.
Hmeichhe ṭhenkhatte hian an pasalte hi an iai ru tlat ṭhin em ni. Chhan tam tak a awm thei ang. A ni lah taka, pa tam takte chu nupui thlawp zo lo, duh duha sawisak theih ang dawn dawna an lan hian a zahthlak lek lek ṭhin. Mi pate chuan a induang nalhin huau huau nikhuaah leh puithunna thilahte hian, vantlang chung lam an nih kher lo pawhin rual pawl tawkin an awm thei mai a. Mahni awm awma awm ve tawp angte hi chu a hrawntu tan chuan a rukin hrehawm an tiṭhin mahna, inpuih tawn leh zei ve deuh haha awm thiam erawh a pawimawh thung ang a, ler kawh hluai lovin.
Zei lo na na na chu an lerh thei dawn em ni, hnai lo ve. Lerh hian zei leh zei lovah a innghat thui lem lova; mi tin rilru put hmang a ni a, insum thei leh thei lovah a innghat mai zawk. Pawm lai nei emaw nei lo emaw pawh ni se, a hluar deuh zawk chu an awm chiang a, an hawiherah a hriat mai. Ṭhenkhat chu an mitmeng aṭangin a hriat theih mai laiin, ‘Hmeichhe ti mi leh mipa zei hre riau’ an awm leh pek a. Ṭhenkhat chu ler ve viau siin a saseh dawna ‘Nu dui’ an awm leh a, mawi leh mawi lo dawn chang map lova hel nuai rup rup duh mai, in tipa rum rut an awm leh bawk.
Hrisel dan inchen loh chu thukhat ni se la, ṭhenkhat chu sex lama huangtau ru riau an awm ṭhin a, insum zawh loh avanga mualpho ta leh hming ser nei sawi tur an awm ve ta zeuh zeuh mai. Mit la zawnga awm na na na chu mi pangngai tan chuan ngaihmelh leh rilru kal sual palh a awl thei phian a, thlarau rah chi kua zinga ‘Insum theihna’ hi tute paw’n kan mamawh ta zel a nih hi. Nun herh deuha tawngpawng sa pa tal erawh hi zawng hur herh nun suakte zia a ni a, ran zia nen a lem chuang lo. Kum tling lo mi bekbawr lama zei riau an awm thei a, nulat tlangval laia sex lama la run an awm thei bawk; pawm lai neite thleng pawh hian sex lama lepchiah leh sihhnip lama kan zalen over fo a nih chuan, ṭah leh ha ṭhialna ruama intukluhna mai a ni.
Zei tawp a awm a, inti zei chawp lui erawh hi chu a veikhawr ṭut a, a phiah lam hi chuan beisei a nei fo ṭhin avangin ler uchuak loh a him ber. Inchei dan tawk thiam leh hawihhawm dan chin tawk hriat hi a tlo ber a. Tum deuh hmuk leh bawrchhawr deuha awm pawh a ṭha lem lova, mit meng aṭangin thil awmzia a hriat theih thuak a. Chuvang chuan ler chu ler tur a lawm; mahse, hleihluak erawh chu No a ni tawp.
- Zalianthanga, Tahan