ZPM pawh eng an ni chuang lo vang

Tunlai politics titi chu ZPM in danglam an tum thu, mi dang aia dik an tum thu, eiruk an tum ve loh thu hi a ni a. A lehlam chuan 'ZPM pawh hi Sorkar se eng an ni bîk lo vang' tiin an sawisel a, ka mimal rin dan chuan ZPM pawh hi engmah an ni tak tak chuang lo vang tih hi ka pawm dan a ni.

ZPM an sorkar avang hian budget awmsa ni lo thil dang aṭanga pawisa lakna tur an hriat dâwn loh avangin Mizoramah pawisa a vang chhunzawm zel ang. Mizoramah hian pawisa a pun phawt loh chuan hna a thawh theih loh. Hna a thawh theih loh chuan hmasawnna a awm dawn lo, ZPM hian tu m'a thal ve theih loh tuikhur hi an nei chuang dawn si loh avang hian; ZPM pawh sorkar se eng an ni ruai lo vang ka'n ti ve tlat a ni.

ZPM nih avanga ropui thut theih a ni lo. Congress leh MNF pawhin an theih loh tih theih tumna hi nei lo se, an theih bîk rin lohna hi kan nei lian tawh. ZPM hian Congress leh MNF hriat loh thil ṭha bîk hriat an nei em ni le? An neih si loh chuan a ZPM pawh chu lo tling ta tehreng se, kan ram hi a dam thut dawn si lo.

ZPM sorkar se danglam thei chu eiruk loh chiah hi a ni. Hei hi an ti tak tak thei ang em le? Eiruk loh hi kan system-ah hian a harsa tawh viau lo maw? tih zawhna hi kan inzawh ngam a ngai a ni. A MLA-te pawh lo eiru lo se, Officer leh Engineer rual Mizorama hausa ber ber ni phakte hi an va check seng si lo va, a system-a eiruk bet nghet tawh siam ṭha tur hian ZPM hian theihna an nei reng reng dawn em ni? Thil sawi liam puat hi a awlsam a nih pawhin a taka tih a harsa ṭhin. ZPM hi sorkar se, a danglam theihna chu eiruk loh a ni a, eiru lo ngam se an dik tak tak chauhin beiseina ka nei.

Thil danglam tur a nih chuan MLA an danglam hmasak a ngai, thil danglam tur a nih chuan mahni fihlim a ngai. ZPM hian Mizoram siam ṭhat an tum chuan eirukna laka an fihlim tak tak a ngai, eirukna fihlim tur hi chuan 'tihtakzetna - will power' neih a ngai a, 'ZPM pawh sorkar se an danglam chuang lo' tih hi tih reh an duh chuan eiruk loh Thupuiah nei ngam se, a tak taka thil tih ngam hi a ngai tawh.

- Vanlalsanga, Mission Vengthlang