Politics thlirna tarmit fiah

Tunlai chu inthlan kum a ni bawk a, social media ah kan politics inlumlet hrang hrang kan hmu a. Facebook lamah chhiar tur a awm ṭhin a, WhatsApp group pawh hi a group hrang hrangah politics hi rem leh rem lo pawha dah ṭhin a ni. Youtube pawh hi politics a tam tawh a, Comedian Search pawh politics khelhna hmanrua a ni chho ta zel. Chutiang a nih lai chuan David Sailo inti, amah hriat ni si lo hian politics thlirna tarmit fiah tak tak hi a nei ṭhin, a thu leh hla hi a fing riaua hriatna ka neih avangin ka rawn suan lut a, ka irawm chhuak a ni lo tih erawh min hriatsak ula, thlirna fing tak a nei tlata ka hriat avang hian mipui chhiar atan ka rawn dah a ni.

2023 INTHLAN–CONGRESS HUN A NI LO

Ngaihdan tlangrâwngin kan ziak ṭhin bawk a, Congress Party mi, ṭhian fel tak tak te, rilru na pawh a awm theih maithei. Mahse, a lan dan aṭanga mawlmang taka kan lo thlirna kan ziak ṭhin a, a lo la na kan awm pawhin chutiang thuziak ve satliahah in lo ngai mai dawn nia.

President, Pu Lalsawta hian rorel fuh loh a nei zeuh zeuh niin a lang a, ama thutlukna ai mahin tute emaw kheuh thiam riau, mi tlem tète thurâwn avang ni pawhin a lang. Hetiang hian thlir teh ang.

POLITICAL AFFAIRS COMMITTEE (PAC) :

Hruaitu hmasa, Pu Lalthanhawla nena an inan lohna langsar hmasa ber chu PAC ah hian a ni. Pu Hawla kha PAC ngai pawimawh leh an thurawn la taima tak niin an sawi a, Pu Sawta pawh hi PAC-in President atan an ruat niin an sawi a, mahse President a nih hnu lawk khan PAC chu a ṭhiat zui hmiah a ni.

Congress Rorel khawl ber PAC ṭhiah a nih hnu khan an din leh lawk lo va, khatih chhung khan kan sawi tawh angin President chuan amah kheuh peih, Party pumpui ngaihtuah pha meuh lote thurâwn a la nasa a, káng dàwrh tura beisei laiin hma an sawn hlei thei lo a ni. ADCC President chawlhtir chungchang leh thil hrang hrang avanga Party Treasurer leh Congress sawi zawnga hmel lo lang pha zinga mi, Pu Zodintluanga banna kha mipui lam chuan a pawmsak kan ring lo a ni. "Bang lo ve a, i tel lote chuan eng ka ni nang," tih ṭawngkam mawi tala a pawmsak loh kan rin ṭhup laiin a pawmsak ta hmiah a, MLA vawi khat mah la ni lo leh kum lama naupang zawk chu Party pui Treasurer-ah a ruat zui hmak bawk.

PAC DINTHAR LEHNA MAKSAK!

Tlai khawhnu, 8th September 2023 khan PAC chu din leh hnuhnawh a ni a, mahse he PAC din dan pawh hi a danglam hle a ni.

Congress kalphungah chuan an rorelna sang ber, CWC Meeting leh State level Meeting an koh reng rengin an State-a Party President leh State Assembly-a Congress MLA-ten hotu bera an thlan; Congress Legislature Party (CLP) Leader hi a ni ṭhin. Hei hi a chianna chu 16th–17th September 2023 mai khan CWC chuan Hyderabad-ah Meeting an ko a, Mizoram aṭangin MPCC aiawhin he rorelna sangah hian CLP Leader, Pu Zodintluanga chu sawm a nih angin a tel nghe nghe a nih kha.

Hetih mek lai hian PAC din tharah chuan AICC lam ngaih pawimawh em em chu MPCC lam hi chuan an ngai pawimawh teh chiam lo a ni maithei. Tel ngei tura ngaih CLP Leader chu PAC ah hian telh a ni leh tlat lo! MLA neih tlem tawh nak alaia an Senior sahuai, MLA ni bawk an hmaih thiam riau mai hi Administration kai rual tak a ni lo maithei. Ṭhat loh theih lohna bawmah hian Pu Zodintluanga hi a leng lo ṭan a ang khawp mai.

Pu Zodintluanga hi Pu Hawla President lai, Pu Liansailova Vice President laia Elected OB, Treasurer ni pha a ni a, tuna MPCC hruaitu lawk palite hi he mite hnu lama a ruata ruat vek an ni!

A LUT HNUHNUNG HNUNG :

Amah ṭhianpa Hriata Chhangte in fiamthuin, "Inthlan dawn hnaihah te lo lut zawk ila, Candidate kan chang ve mai tur," a tih ang deuh a ni. ZPM aṭanga Candidate chang lo chhuak taten Candidate an chan zutna hmun Congress-ah an chhuah mek a, Congress PACHAL inti ngat tan chuan a tlâwmthlak ngawt ta ve ang.

Hei mai a ni lo, OB bak an awm tawh âwm lo ve tih tur, PC leh ZNP an han kuangkuah rial mai bawk a, Seat chang pha pawh an awmin a lang zui bawk. Heng pawl pahnih lo kuahkhawm ringawt hi eng Tactic leh Strategy tak ni ang maw?

Kan Mizo IAS ṭha tak, Pu Lalnunmawia Chuaungo chu a Sorkar hnathawh tawhna lam ni lo, thil hrang daih, Politics khawvelah eng nge a an dawn tih pawh hriatchian a nih hma leh, MLA inthlan vawi khat pawh a la hmachhawn hma hauhin MPCC Vice President ah an hlangkai nghal âwk mai bawk a. Congress tan hian eng tha leh zung nge a sen tawh a, Congress a luh avang hian eng anga sangin nge Congress a vawrh tâk tih pawh hriat a la ni lo va, engti anga Vice President hi phû nghal em ema an hmuh tlat ni.

HNAM DANG KAWPPUI NEI – PRINCIPLE :

ZPM khan Lawngtlai lamah sap pasal nei, Alinery kha an sawi thawi thuak hman a, hetiang lam hi MZP ten an dodalna a ri ring hle tawh a, Congress lamah nu ho, Mahila lam hotunuin langsar takin a sawisel zui bawk a nih kha. Official-a puan hmain thlak a ni zui ta a ni. Tunah hian Lunglei South-ah Congress-a ding turin Meriam L.Hrangchal (Vai pasal nei) chu an dah leh lawi a, Official-in an la puang lo. MPCC President emaw, Mahila President te hian hnam dang kawppui nei Candidate chungchangah hian Principle an nei lo hle tih a hriat a, Party dang tihdan sawisel chiah hi a ni maithei. Hei hi Administration chhe tak zia lanna a ni.

CONGRESS TAN – 2028 :

Khawpui leh District Capital china Politics inthlanna hnaivai (LC/VC) ah eng an ang thei lo va, pathumna an ni deuh zel. LMC ah khan pahnihna hauhna Ward khat an nei a, Ward dang zawngah khan pathumna an ni (Hriat sual loh chuan). Inlawmluhna emaw, mi ṭha leh mi tak tak anga ngaihte lut ṭhin mah se, an boruak kân hleihtheih lohna hi an chhût thiam a ṭul ang. Tuna mi ṭha tak tak lut tate hi Congress hun inherchhuah kum ni se; Party dang tan mit mimna tham, Party pawh so hulh hulhna tham a ni ngei ang. Mahse, Party Administration fuh tawk lo leh mipui rilrua PATHUMNA nih mek tlatna boruak an keng rih a ni.

Kum 2024-ah MPCC hian inthlan ngeiin hruaitu thlang ṭha se, pawl kaihruai thiam (Organised man), hruaitu hmasa tlawh ṭil ur ur chi ni lo, mi hlui leh mi thar Balance thiammi an inrem fuh chuan kum 2028 General Election ah chuan tuna ṭhangthar mi ṭha tak tak an neihte hi an la tho chhuak mahna. Tun dinhmunah hi chuan Congress hi MLA tling tur chhiar tampui harsa tak an ni.

PARTY HRUAITUAH :

Pu Zoramthanga (MNF) hi a bitumpui turte ngaihtuah chuan tling leh mai turah a ngaihsak theih a, chutih laiin a Bial chhung Voters tamna ber, Zemabawka LC By-Election ah a NIL-pui dan ngaihtuah chuan mipuiin an bum thei ve tho bawk ang. Pu Lalduhawma hi Serchhipah tling leh turah a ngaih theih ang a, a bitum turte hi Thenzawl khawchhuak ve ve an ni. Pu Lalsawta hi Aizawl West-III ah a din hmel ta a, Party President ber a chiang har ber pawl a ni. He bialah hian a tling ngei ang tih rinpui a harsa.

Hetiang hi Party lian pathumte bitum tur leh dinna tur a ni a, Official-in han puang kim se, hun remchangah kan la thlurbing dawn nia. Lo ngaihtuah zui ve chhin teh.

Serchhip : 

Lalduhoma (ZPM)

J.Sawma Vanchhawng (MNF)

R.Vanlaltluanga (INC)

Aizawl East–I :

Zoramthanga (MNF)

Lalthansanga Châtea (ZPM)

Lalsanglura Ralte (INC)

Aizawl West–III :

VL.Zaithanzama (ZPM)

Er.K.Sawmvela (MNF)

Lalsawta (INC)

TLIPNA :

Congress tana ṭhahnem ngai tak takten 2023 inthlanah tha thlah loh a ṭul a, thochhuak tak tak tur erawh chuan 2028 a ngai ngei dawnin a lang a, Administration ṭha zawk dah hmasak a, kum 2028 inthlan thlir thiam a finthlak ang.

- Lalchhuanawma