RADIO LEAGUE - Mpa Leto

Chullova'n David Rinmuana, Davida'n Sawmtea, Sawmtea'n Biaktea ball a pek dan te, Albert-a goal khung teuhzia te, Chhetri leh Biaktea inchuh dan te, Bengaluru FC club history zawng zawngte, inkhelh nana an formation hman leh an jersey hak rawng te chu Radio-ah fiah felfai takin an puang mawlh mawlh a. First half-a Ostana-in Bengaluru tan goal a khung dan te, Aizawl FC-in Bengaluru FC an nawr
ṭhinzia te chu chhum lo chat lovin Lalthanzama leh Johny-a chuan an puang reng a. A hmuna stadium boruak hip ve lo tan pawh awmhmunah Radio kaltlangin kan lo inseh ruh ve a, kan lo ip ve chawih chawih a ni ber.

Mizoten football kan ngai-natzia leh ngaihsanzia chu ticket manto kan hui zawh puk puk dan khan a hril chiang ngei mai. Mizoram history-a I League inkhel hmasa ber chu mitin hmu ve thei lo mah ila, All India Radio zarah bengin a ropuizia chu kan hre chiang kher mai. January 2016, Pawlkut thla ni 16 khan Radio chuan local cable TV-te chu si khat faiin an hneh ti ila kan sawi sual awm lo ve.

Khawvel thiamna-in mita en chi TV a siamchhuah hmain benga ngaihthlak chi Radio a siamchhuak hmasa a, he thil hian kan pi leh pu, nu leh pate nunah hmun pawimawh tak a lo khuar tawh a, tun thleng hian thingtlang khaw tam tak tan khawvel tukverh a la ni. Keini khawpuia chengte hian Radio chu a ni telin kan hnualsuat a, Radio ngaihthlak chu ṭhing riaua hriatna kan nei a, changkan lohna pakhatah kan ngai emaw a tih theih hial a ni. Ram changkang leh hausa zawkte han en ila Radio hian an nunah hmun pawimawh tak ala chang tlat. Hnam upa zawk leh hausa zawk te hian TV enin Internet an khawih hman meuh lo va, hnathawh pahin Radio an herh chhuak mai ṭhin zawk a ni. Thatchhiat vang leh mawl vang hrim hrima radio ṭhing lo tih chu mi changkang lo zia a ni!

Indopui I-na hunlai aṭang khan sipaite chuan hrui tel lova inbiakpawhna (wireless tele communication) an lo hmang ṭangkai tawh a, indopui I-na hnulam aṭangin Radio chu sumdawn nan an hmang ṭan a. Kum 1920 vel khan Radio Station hmasaber chu Pittsburg, New York, Chicago-ah te bun an ni, heng station
aṭang hian inthlan (election) chanchin te, Sport chanchin thar te leh zai (opera) te an pe chhuak ṭhin. The Times of India-in a tarlan danin India ramah chuan The Radio Club of Culcutta an hmasa ber a, kum 1923 November aṭang khan he sumdawnna hi an lo ṭan tawh a ni. A hmain All India Radio hi ISBS (Indian State Broadcasting Service) tia koh ṭhin a ni a, kum 1936 khan a hming thlak a ni. Hming thlak a nih aṭanga kum 78 a liam meuh chuan AIR chuan India ram hmun hrang hrangah centres 219 a nei der tawh, Local Radio station 73, regional station 114 leh Vividh Bharati station 32 te an hawng hman der tawh a ni. Nitin news bulletin 300 chuang pe chhuak ziah anga chhut a ni bawk. AIR hnathawh dan (Service) tlangpui han sawi zawr zawr ila.

1. The National Service: Indopui II-na hunlai aṭang khan he rawngbawlna hi New Delhi aṭangin an lo kalpui daih tawh a. Chanchintharte pe chhuakin a hunlaia thil thleng thar ber ber an puang ṭhin. National Programme a music, lemchan, inkawmna te chu Director General-in ruahmanna siamin regional centres-ah pek chhuah ṭhin a ni.

2. The Regional Service: Heng hian ram hran hrana
ṭawng hran nei, hnam hrang leh chi bil te a huam. A bikin thingthlang miten an chhawr em em a ni. Programme chi hrang hrang zingah lo neih dan te, kuthnathawka eizawng tan te, naupang leh puitling thlengin a huam a, ṭhlalaite pawhin an chhawr ṭangkai ṭhin hle. Kum 1995 aṭang khan AIR chuan Regional station 105 neia tarlan a ni. State khatah station pali emaw panga emaw awm anga chhut a ni bawk.

3. The Local Service: Khaw-tlang inrelbawlna ṭha zawk leh zirna lama hma-sawnna tura duan a ni a, kum 1992 khan district 72-ah local broadcast station 500 chuang bun a ni. Kilometres 100 bial chhunga radio frequency pe chhuak thei tura siam a ni a, hetah hian tualchhung mi leh sa te rilrem zawng programme pek chhuah ṭhin a nih mai bakah mipuiten programme an han hmang ve thei bawk a ni.

The Vividh Bharati Service te, External service te leh School Broadcasts te an la awm a, kan sawi vek seng lo ang.

Radio hian kal dan chi hnih an nei

1. Spoken word Prog-rammes: Heng hian a huam chu nitin chhuak chanchin-thar te, inbiangbiakna te, inkawmhona te, zirna lam kaihhnawih sawina te, programme hrang hrang hmeichhe tan te, naupang tan te, thingtlang leh khawpui mi tan te thlengin hun hman ṭhin a ni a. Chu mai bakah lemchan leh documentary te chhuah
ṭhin an ni.

2. Music programmes: Hla thlanna hun te, hla ṭha thlanna te, music chi hrang hrangte tih chhuah ṭhin a ni. Heng hi Magazine Programmes tiin an sawi bawk ṭhin.

Programme ṭhenkhat, music leh thusawi awm khawp lemchan te, documentary te a awm ṭhin a. Hengho hi Vividh Bharati leh FM Channel-ah te pek chhuah ṭhin an ni.

India rama football inelna sang ber I-league Radio lamin an pe chhuak thei kha a lawmawm takzet e. Inkhel dang pawh han puang zel se, ava
ṭha dawn em! Tunlai thiamna sang tawh taka Radio-a inkhel han ngaihthlak vang vang chu a hlimawm rualin a nuam ru phian! Khawvelin media a hmelhriat hmasak ber chu Radio a ni a, chumi dawtah thlalakna (camera) siam chhuah a ni leh a, thlalakna chu thuam
ṭhat niin mi lem che thei la thei (Vedio camera) a siam a ni leh a, radio leh thlalakna chu kaikawpin TV kan tih hi siamchhuah a lo ni ta a ni.

Hmanlai thil, thiamna-in a tlansan tawh anga kan ngaih kha I League zarah a ṭangkaina kan hre nawn leh ta a. Thiamnate lo sang chho zelin internet kaltlanga Radio ngaihthlaknate a awm leh zel a. Social media-a chanchinthar kan dawn leh chhiar tam zawkte hi editor kaltlang lova chhuah (publish) a ni ṭhin a. Kan naupanlaia kan zir ṭhin mahni in-doctor-chawp ṭhat lohzia leh hlauhawmzia hre reng chungin mahni in-editor-chawp ṭhat lohzia leh hlauhawmzia i hre reng fo ang u.