Mission Veng Bialin 2019 Synod Inkhawmpui a thleng dawn

Synod Inkhawmpui Vawi 92-na December, 2015-a neihah khan kum 2019 Synod Inkhawmpui chu Mission Veng Pastor Bialin Mission Veng Biak Ina thlen turin a lo rel ta a. Hun kal tawhah kha chuan Mizoram puma Presbyterian Kohhran hmunpui ber leh Kohhran puitling taka a din hmasak berna Mission Vengah hian Synod Inkhawmpui nghah
ṭhin a niin vawi tam tak an lo thleng tawh ṭhin a. A chang chuan Dawrpui Kohhranah pawh neih ve ṭhin a ni.

Nikhua a lo rei a, Aizawl khawpuiah Biak In ṭha leh lian tak tak a lo awm belh tak zel avangin Kohhran dang dangah Synod Inkhawmpui kan lo nei chho ta a ni a. Presbytery leh Pastor Bial thar siam belh zel a niin Synod Inkhawmpui Palai pawh a kuma telin a pung a. Kum 2014 leh 2015-ah khan Inkhawmpui Palai kal 1900 chuang lai ve ve kan lo tling ta hial a. Palai zawng zawng phei chu 2000 lai kan lo tling ta a nih kha. Palai kal ṭhat kum te pawh awmin kan la pung zel dawn pawh a niin a hriat.

Chutiang chu a nih avangin tuna Mission Veng Kohhran Biak In leh a tual vel hi chuan Synod Inkhawmpui, 2019 hi min dawng zo lo tih hi sawi theih niin ka hria. A chhung hi mi 1200 ṭhutna leng chauha sak a ni a, a tual zawl lah a zau lo hle mai a, a level pawh a chhung aiin a hniam zawk bawk. Hetiang hi a awmdan a nih avangin Mission Veng Kohhran Committee hian engti angin nge 2019 Synod Inkhawmpui hi thlen an tum ang le! Palai 2000 chuang tan he Inkhawmpui hi buatsaih a ṭul dawn niin a lang bawk si a, tih hi ka lo ngaihtuah ve a ni.

Tunah hian December, 2019-a Synod Inkhawmpui thleng tur chuan kum 4 dawn inbuatsaihna hun la awmah hian hetiang kawng hian ngaihtuah theih hram hram dan awmin ka hria :

1. A hmasa berah chuan Synod Inkhawmpui hian nasa taka Inkhawmpui Palai tih tlem dan a siam a. Palai 1200 chuang hret awm tura a rel a, a tih puitlin ngei bawk chuan Mission Veng Kohhran Biak Inah hian he Synod Inkhawmpui hi thlen theih a ni ang.

2. A dawt lehah chuan, Biak In ko chhak lam hi lai thla belhin feet 40/50 emaw laia zau zawl siam belhin semi-permanent pawhin a chung sethlama dawh belh ni se. Hemi ti puitling tur chuan tuna Pastor quarters sak ṭhat tum mek pawh hi sa lo a, a hmun tur dang ngaihtuah ni zawk mai se.

3. A pathumna atan chuan Biak In Balcony hi temporary-in (duh huna ṭhiah leh mai turin) zau taka siam belh/zauh ni se. Biak In chhuat aṭangin thir banin do mai ni se.

Heng zingah hian a hmasa ber hi chu Synod Inkhawmpui pawhin a lo ngaihtuah tawh
ṭhin, mahse, vawiin thlenga a la tih hlawhtlin theih loh niin ka hria a; thil huphurhawm tak a ni. A pathumna pawh hi a dona ban awm tuk tur a nih chuan a hnawksak hle ang a. Tin, Balcony hnunglama
ṭhute’n an ṭhutna aṭanga pulpit an hmuh phak ve dawn phei chuan a chhuat chu nasa deuha tih awih a ṭul dawn a, chutiang tur chuan a biak in liang hi a sang tawk lovin a rinawm. Chuvangin, hetiang kawnga in buatsaih chu a harsa tawh hle ang.

A pahnihna erawh hi chu thil remchang tak niin a lang. Tuna Biak In sak sa khawih danglam vak ngailo hian a kawmchhak lam lei ko lai bal belhin hmun zawl zau tawk siamin a ko hi lung rema tha taka dawl mai ni se. Chu chu a chung zar dan ngaihtuah mai ni se a remchang hle ang. Permanent-a awm tur pawhin Puitling Sunday School neihnan Mission Veng Kohhran hian an mamawh tho tho; temporary-a tih a nih pawhin hmun zawl neih chu mamawhna tam tak a awm tho tho.

Biak In leh Kohhran ram hi eng angin nge demarcation siam a nih chu ka hre hauh lova, nimahsela, Biak In pawh Synod ram tho a ni. Chuvangin, Mizoram puma kan Kohhran bulpui ber leh kan Synod thutchilh Kohhran Biak In a ni a. Mizorama Presbyterian Kohhran zawng zawng hi Mission Veng Kohhran aṭanga indang leh chu ta ṭanga indang leh zelte kan ni vek mai. Chuvang chuan Mission Veng Kohhran leh a Biak In hi kan Home Church neih a lo ni a, chutiang ni bawk si Synod Inkhawmpui dawng thei lo nih hi thil dik a ni thei lo ang.

Mi ramah chuan Home Church tihte hi an sawi lar hle ṭhin a, kan Missionary Saphote pawh khan Mission Veng Biak In ram leh Synod ram pawh an thliar hrang lo ang. Chutiang deuh chuan tunah pawh hian Mission Veng Kohhranin Synod Inkhawmpui an thlen theih nan a bul ko laih belha Biak In tual siamna tur hi chuan Synod ram pawh ni mahsela Mission Veng Kohhran leh Synod hruaituten uluk taka ngaihtuaha insiamrem chi niin ka ring. Synod, 2019 thleng tura a hun taka peih hman tur chuan Mission Veng Kohhran hruaitute hian hma an lak vat vat a pawimawhin ka hria.

- C. Dorema,

Kulikawn Vengthlang