Hmunphiah! Aw hmunphiah!

Mirethei lam ṭanga insawi sorkar thiltih dan hi hriat-thiam a va har ṭhin em! Tunlai hi kut-hnathawktute'n an huan leh ramhnuai ami hmunphiah an seng ve lai a ni a. Zalen taka kuthnathawktute'n an hmunphiah an hralh hian a man pawh a sang duh a ni.

Nikumah phei kha chuan Vairengte-ah hmunphiah hring kg 1 Rs. 50/- tein an hralh thei hial a ni. Tunlai hian kg-ah Rs. 25/- te a ni a, hei hi sorkarin Mahal System a rawn hman leh tak vang pawh a ni thei ang.

India rorelna sang ber Parliament-ah chuan Forest Right Act 2006 passed a lo ni tawh a. Chu Act (dan) chu kum 2007 khan sorkar gazette-ah chhuah a lo ni leh tawh bawk a. Hetah hian Mahal chu tihtawp a lo ni ta a ni.

Chutiang a lo nih takah chuan state sorkar pawhin Mizoram chhungah chuan engmah chawi awm loin leh state pawna hralh chhuah dawnah erawh chuan kg 1-ah Rs. 1/- chawi ve turin thutlukna a siam a. Kuminah erawh hi chuan kan sorkarin Mahal System bawk a rawn hmang leh ta tlat mai a. Hei hian hmunphiah man pawh a tihsan theih loh phah dawn a ang hle a ni.

Pu Duhawma pawhin sorkar chu "hmunphiah chingtute hlêp tur" chhuhsakah a rawn puh ta a nih hi; chu mai a ni lo, Pu Rualkhuma Hmar pawh 'Kut hnathawktute hamṭhatna - hmunphiah' tiin a rawn au chhuak tawh bawk a nih kha.

Tunah hian kan sorkar hian eng dan hmangin nge Hmunphiah Mahal hi kuthnathawktute a rawn barh luih leh tak mai le? Mirethei lei rem rahtir tumtute tih dan tur a ni thei dawn em ni?

- J. Sawilaia