Lirthei khalhtute leh hawihhawmna

Kan Aizawl khawpui mihring tam dan ngaihtuahin lirthei a pung chak hle a, nitin motor nei kan pung bawk a. Hetih lai karah hian motor khalhtu (driver) te hi kan hawihhawm thiam loh chuan kan khawpui hi khawpui hrehawm takah kan chhuah mai dawn tihna a ni.

Signal light/ indicator ligh: Indicator light chu kan kal duhna lam midangte hriattirtu atana hman tur a ni. Mi
ṭhenkhatten kan hman dan hi a hlauhawm deuh tlat mai. Indicator light ka pe alawm tia signal pek rual ruala motor herh kawi nghal vut mai ṭhin hi kan hnunga rawn tlante tan speed a tilaklawh vek a, in tihpalh a hlauhawm hle. Kan kawi duhna kan thlen hma deuhin Indicator pe ila, kan hnunga mite ngaihchan nachang hriat tur a ni.

Intlan pelh (over taking): Kan kawngpui a zim em em a, chuvangin lirthei khalhtuten kawng chhelai leh zim laia rem lo taka midang tlan pelh hi kan tih loh tur a ni. Kawng kawi laia in tlan pelh te hi chetsualna thlentu a ni a, tih loh tawp tur a ni.

Kawng chhia: Kawng khuar leh kawng chhe lai hel ngai a awm ṭhin a, hetianga kawng kan hel dawn chuan midang ngaihchan thiam tur a ni. Ke pali nei side glass a khup zawnga dah tlatte tlan pelh dawn phei chuan a tim awm duh hle ṭhin a, fimkhur a ngai khawp mai.

Inkhawm bang: Aizawlah hian motor kawngpui bulah biakin a awm nual a, a bikin Pathianni chawhma inkhawm bang tawn fuh chang phei chuan fimkhur a ngai hle. Inkhawm bangte tan hian kalkawng a chep a, lirthei khalhtuten kan ngaihchan thiam an ngai hle a ni.

Intihpalh: Lirthei chet-sual-na chhan tam ber hi chu kan fimkhur tawk loh vang a ni ṭhin a, vanduai vanga thleng pawh a awm ve ṭhin. Vanduai vanga intihpalh changa insual peih nghal at hi hmuh tur an awm leh khauh ṭhin a, thil mawi lo tak a ni. Hetianga intihpalh a awm chang hian hmelah leh kan chet danah a pawi kan tihzia han lantir ila, a Mizoin a kristian a, buaina tam tak a pumpelh theih bawk a ni. Tin, ṭhat leh ṭhat a inlawm chuan a tawpah thil
ṭha a chhuak ṭhin ngai e.

Min lo hrethiamn lawk ru, ka laklawh deuh a han tiha fel mai theiah te hian horn kan hmet ri tuar tuar a, kan melh rum el awl a; ṭul lo deuhah inhnialna a chawk tho ṭhin. Hetianga mawlmang tak leh chapo taka kan chet hian keimahni leh midang tan harsatna kan siam tihna a ni a, hawihhawm taka kan tih erawh chuan midang pawhin min hrethiam ve mai ṭhin a, kan him tlang ber bawk.

- Hmatea, Bethlehem Vengthlang