“RAWN PEM TEH UUU” – VCP North Hlimen
Nikum lam daih ni ta in ka hria. Doodarshan Team in North Hlimen khua an tlawh ṭumin Doordarshan Aurinna hmangin North Hlimen VCP-in an khua North Hlimen-a pem duh apiang, khawpuia mi emaw thingtlang mi tu pawh an khuaa pem tura duhthawh leh ṭhahnemngai em emin, “Kan khua ah hian lo pem teh uuu,” ti vawng vawngin an khuaa pem turin a sawm lawm lawm a nih kha.
Ka bengah hian a cham reh thei ta reng reng lo mai a. In 250 vel zet VCP-in tu mah thliar lova duhthawh tak maia a sawmna kha chháng kan awm ta em ka hre lo va. VCP sawi dan takin, “Kan khua leh kan ram hi ram rem ṭha em em a ni a. Hydel project pahnih Tuirial Hydel Project leh Serlui ‘B’ Hydel Project karcheha awm a ni a. "Kan ram hi a zau a, kan ei seng lo nasa si a. A lo pem apiang chu in hmun ṭha tak, zau tak kan lo pe zel ang che u, ram pawh in mamawh anga zau kan lo pe zel ang che u,” a tih lawm lawm ka’n hria khan ka thinlung a khawih che dawt a ni ber e. “Mizote hi kan lo va ṭha em! Kan lo va induhsak thei ve le,” ka ti mawlh mawlh.
Tun dinhmuna a lan dan chuan ZPM hi Sorkar ngei tur niin a lang ta a. ZPM hian sawhthing, Aieng, Hmarcha, Hmunphiah, Price Support pek a tiam hi a tih tak tak hmel hle a. Heng thlai leisak (or puih) a tum thlaite hi he khua North Hlimen khuaah hian; a ram leh leilung kan hmuh chian tawh avangin heng Crop pali ching duh chuan pan vang vang chi a ni. Bukpui Pastor Bial khat kan nih lai, Bial Inkhawmpui kum 1957-a kan tlangval lai khan ka va palai tawh a. Thingthelh khua aṭangin North Hlimen khaw kar ramte hi kan paltlang vek a. 1960 December thla khan Hlimen khua kaltlangin Builum khua thlengin ka tlawh tawh bawk a. He ramah hian ZPM ho thlai sawi pali te hi chu ṭha duh tak vek tur a ni.
Tin, Hmunphiah hi a ram tualṭo a tamsa a. Saipum khaw hnai te leh Saiphai pawh hla lo tak a ni bawk a. Sawhthing hmanga hausak tum tan chuan pan vang vang tlak a ni. Serkhan to Bhaga Road kawng a ni a, MST Bus pawh a service reng bawk, kawng ṭha tak a ni.
Tin, Govt High School thlengin an nei a, Dept dang neuh neuh pawh an nei kim hle bawk. Tuna an VCP hming hi ka hre tawh lo tlat. Presbyterian Pastor ṭhuthmun a nihna pawh a rei tawh hle a. He khaw mi Pu B. Kapthuama hi Short Service Commission-a a service hnuin IAS ah inziak tling leh a, IAS aṭanga a pension hnu hian Rawngbawlin Bihar ramah a awm zui reng a. Tunah tak hian a la awm nge awm lo ka hre ta lo. Bukpui MAV (Middle Anglo Vernacular/Middle English School) Sikul –a kan zirpui ṭhin a ni.
He khua North Hlimen khuaa pem duh kan awm chuan an khaw VC te hi lo zawt chiang mai rawh u.
- S. Lianhrima Hauhnar, Aizawl Venglai