CALENDAR SIAMTUTE HRIAT ATAN

Calendar siam a lo hun leh dawn ta a, hetah hian Mizo thla hming vuah dan inang lo a awm ṭhin a, chu chu tunah hian sawifiah kan tum leh dawn a ni. Kan sawi tur tak chu July, August leh September thla Mizoa vuah dan hi a ni. Mi ṭhenkhatin July thla hi Vawkhniakzawm thla ti te, Vawkhniakzawn thla tih te, Vawkhniahzawn thla ti te an awm a. A dang leh August thla hi Thiṭin ti te,Thlazing ti te an awm bawk a. September hi Mimkut ti leh Thiṭin ti an awm bawk a ni. Hengte avang hian Mizo thla hming vuah hi Official taka sawi rem a ngai ta a ni.

Hemi chungchang hre reng hian kum 2011 September 5 khan Information & Public Relation (I&PR) Government of Mizoram chuan Mizo parawn tlak deuh deuha an ngaih – NGO leh Kohhran Pawl hrang hranga mite an kokhawm a, chutah chuan thla hming vuah dan hi sawiho a ni a, chutah chuan Mizorama hnam bil bikte pawh an tel ve tho. Chuta an thutlukna chu, July thla hi VAWKHNIAHZAWN THLA tih tur tih a ni ta a. Hetah hian Mizo ṭawng thiam tak J.F. Laldailova pawhin a rawn ber ṭhin Pu Pabuanga (Pu J.F-a nupui pa), Mizo sakhaw puithiam hi Pu. J.F. Laldailova pawh hian a Mizo ṭawng lakna ber a tih theih hial. Pu Pabuanga chuan July thla chu VAWKHNIAHZAWN THLA kan ti ṭhin a lo ti ve bawk. Chu chu hemi ṭuma kalkhawm pawh hian an pawm tlang ta vek a ni.

A dang leh, August thla hi Mimkut/Thiṭin ti tawkte an awm a. Mi ṭhenkhatin Mimkut an tih laiin Thiṭin lo ti tawk an awm bawk a. Thiṭin hmaa nupui dang neih leh chu hman lai chuan thiang loa an ngaih a ni si a; Kawlriaua pa hian a nupui thih thla thum tlin hmain Thiṭin a hmang ta a, chu chu vantlang Thiṭin thla a la ni si lo va, mi dangin an pawm thei lo a ni, Mimkut thla (September) hi vantlang Thiṭin tih a ni.

Mitthi puala kut (Mimkut) hman hma chuan Thiṭin hi pawm a ni lo a ni. Tichuan, hemi ṭuma an sawihonaah September chu Mimkut tih a lo ni tho a, Mimkut hi ni thum vel chauh hman a nih avangin, Mimkut thlaa Thiṭin hman chu thla hran anga pawm theih a ni lo va, hemi ṭum hian Thiṭin thla chu hman a ni ta lo a ni.

Chuti chuan, Calendar siam turte chuan July, August leh September hi July chu VAWKHNIAHZAWN thla, August chu THLAZING, September chu MIMKUT tiin thu tawp an siam ta a ni. Hei hi Sorkar Calendar-ah te, Synod Calendar-ah te, NGO Official te chuan an hman dan a ni ta a. Hemi sorkar thuchhuak hre lo, Private Press hian kum danga an thla hming vuah ang kha Calendar-a Mizo thla hming hmang an awm ṭhin a. Hei hi a dik lo va, Mizoram sorkar Official Mizo thla hming hi Private Press te pawhin hman ṭheuh tur a ni e.

- Dr. Lalzuia Colney, Ph. No. 9862334371