Hna zahawm leh sâng

Kan moral dik tawk loh vang nge ni, Mizote hian hna zahawm leh sang hi kan hriat pawlh fo mai.

Engnge hna zahawm chu?

Miin eng hna pawh, dik leh fel taka a thawh chuan, chu chu hna zahawm a tling mai a ni. Officer lian tak eiru ai chuan, ek paiha eizawng pawh nise, dik taka sum hmuhna a nih chuan a zahawm zawk.

Engnge hna sâng chu?

Hna sâng leh hniam hi chu a awm teh meuh mai. Officer leh Peon-te hi khaikhin chi an ni lo. Officer chu peon dinhmun ai chuan a sâng zawk. Chutihrual chuan, a zahawm zawnga kan teh dawn chuan, zahawm zawk sawi tur a awm lo.

Peon khan a hna dik leh fel taka a thawh a, a thawh hlawh chiah a lak chuan, amah a zahawm bakah, a hna kha a ti zahawm tel bawk a ni. Eng anga officer lian pawh nise, mipui chanai eiru ṭhin a nih miau chuan, amah a zahawm lo a, a hna pawh a ti zahawm lo bawk.

Aw le, a chunga ka sawi ang hian, hna zahawm leh sang hi kan teh thiam a, kan en thiam a ngai khawp mai.

Mi tam zawk hi chuan, dik vak lo pawha hausa thur thurte hi zahawmah kan ngai mai ṭhin. Helai tak hi kan thlak danglam ngai chu a ni ta a ni.

Hna hniam tè anga lang pawh miin dik leh fel taka a thawh chuan, zahawm takin en thiam ila. Eng anga hna sang pawh thawk se, a hlawh leh khawsak a inmil loh chuan hnualsuat ngam ve thung ang u.

Hna zahawm tehna chu an hna dik taka an thawh leh thawh lohah hian a ni ber e.

- Biaksiamtluanga