Sorkar hna hi

Kan hriat ṭheuh angin Mizoramah company leh industry lian innghhahna tlak a awm loh avangin Mizo mipuite innghhahna ber chu sorkar hna hi a ni lo thei lo. Chuvangin, sorkar hnathawh hi zirlaite tum ber leh beisei ber a ni fo a ni.

Sorkar hna hi tun dinhmunah chuan a vang tawh em em a, a awm chhun in chuhin lehkhathiam tak takte an in chuh sup sup zel a ni. Kan innghahna neih chhun a nih miau avangin sorkar hna lak tak hi fair taka kalpui a ṭul a, a nih loh chuan mi beidawng kan siam hnem lutuk ang tih a hlauhawm. Sorkar lai induhsak te, officer hmelhriat neih ṭhat avanga inthun ngawtte leh sum hmanga sorkar hna leite hi a bo hmak a hun tawh hle a ni.

Tun hma ngaihtuah chuan sorkar hna lak dan hi a thianghlim chho ve hret hretin a lang a, Group A chinah phei hi chuan sawi neuh neuh a awm mang tawh lo a ni. Mahse, tlema hna hnuaihnung deuh zawk lak nikhuaa sawi sep a awm leh ṭhin hi a pawi hle a, hei hi tihreh a hun tawh hle. Ministry kan hrawn tawh reng reng han thlir let hian hna lak chungchanga sawisel bo an awm lo a tih theih awm e. Officer-te pawh an bang chuang loa, ani pawh hian an hmelhriat leh laina hnaite chu hna lak kawngah an duhsak thei hle nia sawi a ni a, a dik pawh a rinawm.

Sorkar hna sang deuh lak kawnga thianghlim taka kalpui ringawt hi a tawk lo hle, heng hna sang deuhte hi chu tlem thiam leh taima deuhte tan bak tlin a harsat bakah, mi tlemte tan bak hmun ruak a awm ṭhin lo. Thiam leh thiam lo chunga theihtawp chhuaha zir chhuak ve ṭawk ṭawk, sorkar hnasang zawka tling tura an thiamna in a tlin loh tam takten tlema hna hnuaihnung zawk deuh an beisei ṭhin. Heng mite beiseina ti boa, mipuiin an ngaihven chuang lo e tia duhsak zawngte tling lo chunga kan thun fo a nih chuan a pawi hun a la thleng ang tih a hlauhawm.

Tin, sorkar hnathawk hrim hrimte pawh hi chah duh ka nei ve, an vai chuan a ni hauh lo, mahse a tam zawk an nih hial a rinawm, hengte hi chuan an hnaah rilru an pe loa, hlawh lakna atan chauh an thawk ni berin a lang. Mizoram sorkar hnathawk aia inthlahdah, kal tlai, bang hma, chhuahna tur ngah hi state dang sorkar hnathawk zingah awmve tak ang maw?

Sorkar hnathawk kalphung hi siamṭhat a hun tawh takzet a, tuna active zawk hian kan sorkar hnathawkte hi han awm ngat se chuan kan ram pawhin hma a sawn ngeiin a rinawm. Kalphung thlakna tur a nih phawt chuan hrem ngai chu hrem a, ban hial ngai an awm pawhin ban mai nise, ṭhalai lehkhathiam tak tak an thawh ang thawk thiam an tam em? Kan sorkar hnathawk kalphung siamṭhat hi tu mawh nge ni tak ang, a ti thei tan chuan thlir liam mai loa chet vat a va hun tawh em.

- Lalthangpuia