MNYF-IN TWO WHEELER RALLY AN BUATSAIH

Intodelha mahni ke-a ding lo chu mi zahawm a ni thei lo va, ngaihsanawm a ni thei lo va, a huaisen thei hek lo tih thu hi kan sawiin kan ziak zing tawh hle a. Ram tan phei chuan hei hi a pawimawh lehzual a ni.

Pi leh pute hunah khan intodelha mahni kea ding ṭhin; chu vanga hnam taima, hnam rinawm, hnam tlawmngai, hnam huaisen ni ṭhin kan ni a, kan zahawm ṭhin a ni.

Kristian kan niha Thatchhiat Theology innghah nana kan hman aṭang khan thatchhiat nun kan nei ṭan a. Politics kan hmelhriat aṭanga mahni hmasial, hleih neih, duhàm, lemchan nun neia dawt sawi pawisak lohna kan neih aṭang khan kan nun a tla hniam lehzual ta a. U.T. neia mahnia kan inrelbawl aṭang phei kha chuan kan lo corrupt lehzualin, intodelh chu sawi loh Central Sawrkar chawmhlawm ti tihin kan awm ta reng mai a ni.

Hetiang dinhmuna ding chung hian mahni ram chhuahsanin, ram danga inkhuarin, ram dang ralthuam hmangin Independent ka sual e, kan ti a. Hlawhtlin ngaihna awm lo sa chu, kum sawmhnih (20) buaina zakhua kan siam hnuah kan thil tum ber hmu lovin kan lo hawng a. An lak aṭanga inlakhran kan tumte khua leh tui nghetah kan insiamzui ta a ni.

Sawrkar siam thei hial dinhmuna kan din hnuah pawh intodelh tumna reng reng kan nei lo va. Ram hmasawn nana pawisa hman turte chu sawrkarna fawng vuantuten mahni inhaivûr nan an hmang ta deuh vek zawk a. Mipui nàwlpuite chu an rethei tawlh tawlh thung a ni.

Martarte kan hriatrengna chu an lung phunsak leh inthlan boruaka an hming lamrík a ni deuh ngawt a. An chhungte tana thil chhenfaktlak siamsak a awm pawh kan hre lo. Nunna thàpa a taka suala dama lo hawte pawh awmze neia chawimawina pek an awm kan hre lo. A sahim china awma thisen far khat pawh fartir lo va, a thàu rawn sàwk ta chiamtute anga hausak phah nana hmang phei chu an awm kan hre lo lehzual a ni.

Hetiang kalphung dik lo leh inkaihhruaina ṭha lo hnuaiah kan ram chu Corruption kai rualna ber leh, natna ṭihbaiawm pui puiina a bawm nasat ber kan lo ni ta mek a. Central Sawrkar ngaihnep ber State kan nih phah ta hial a ni.

Hetiang dinhmuna dingte tan hian Nationalism sawi mawite hi thil inhmeh lo leh zahthlak zawk a ni a. Zohnahthlak zawng zawngte rorelna pakhat hnuaia awm kan beisei, tih thu chhak chhuah fo te pawh hi awmze nei lo a ni a. “Cheap Politics” bàk a ni lo ve.

An chawmhlawm nihte hi a zahthlak a. Kan thawmhnawte chena an siam vek ringa awm kan nih pawh a tlàwmthlak a. Nationalism ngaih pawimawhzia lantir nana an “Two Wheeler” siam te lehzel intihtheihnana kan han hmangte hi chu a zahthlak lehzual a ni.

Takna nei lo, Drama a ni e, Drama.

- M Lalmanzuala