TUBOH LEH DOLUNG KARAH, ASSEMBLY SPEAKER Politics thimzing kan hmabak em?

Date 22 /9 /20 (Thawhlehni) khan Mizoram state Legislative Assembly Speaker Pu Lalrinliana Sailo hnenah Rorel lai MNF MLA rual mi 8  te chuan Independent MLA Pu Lalduhoma bantir tura ngenna an thehlut a, he ngennaah hian Dan tlawhchhan tura an vauchher Indian Constitution  10th schedule para 2(2) an tarlang nghal bawk. He thil  hian, Speaker chu he dan tlawhchhan tur hian an beisei tih a entir awm e.

India anga Parliamentary Democracy ramah hi chuan, Dan kengkawh tur hian, President/Governor & Speaker te kan nei a, anmahni zawn ṭheuhva thuneihna sang tak nei vek an nih rual hian, lang lo lam aṭanga Control-tu nei veka ngaih an ni thung.

Tun ṭuma Pu Lalduhoma chungchangah hian, MNF Party hian thutlukna khal tak an siam hmasa ngeiin a rinawm. Chu an thil beisei chu, MLA aṭanga Pu Duhoma paiha Serchhip biala bye - election neih a nih hmel. He thil a ruahmanna siamtu leh phur ber tura ngaih chu CM & Co. te an nih a rinawm hle bawk. He MNF MLA-te kaltlanga inbantirna tur thubuai thehluh  thuah hian Speaker hian, Party duhdan hian thutlukna a siam ngei tura ngaih a ni. A siam lo a nih chuan Amah ruattute beisei a tihlawhtling lo tihna a ni thei bawk ang. Chutianga inbantirna a thleng a nih chuan, Pu Duhoma hian High Court lamah a khinglet ngei tura ngaih a ni bawk. Speaker thutlukna hi Court-a khinlet thiang a nih tawh avangin, thutawp a nih chiah loh dan a awm a, Speaker dinhmun hi dinhmun harsa leh mualpho hle theihna a ni chho mek. Speaker dinhmun nge thlan awm a, Pu Duhoma dinhmun tih pawh hi buk fe tham niin a lang. 

Lal Isua chungthu an rel lai khan, Roreltu Pilata khan a thiam lohna ka hmu love, ka chhuah mai dawn a tih ang deuh khan, Assembly Speaker hian, bantir loh duh viau mah se, MNF Party leh MLA-te hian Kross-ah khengbet rawh tia an au rual tawh miau avangin, Pu Duhoma chungchangah hian, ka ziak chu, ka ziak zo tawh tih kha a thleng ve ngei ang tih a rinawm hle.

Engpawhnise, Pu Duhoma bantirna tura Constitution bung leh chang tarlanah hian action lak a nih chuan, ZPM MLA dang pawh an him bik chuang lo tih a chiang reng mai. Chutihrual chuan, Sawrkar chhaih buaia mualphona thlen theitu lian ber nia ngaih, an mal man chat a tihtheih awm e. He thil lo awm nachhanah hian, CM tana mi ṭangkai tak Serchhip biala MLA tlin ve ngei tum tana khaw hmu lek lova ngaihtuahna hman vang a nih duh hmel hle bawk. A thuhrimin, MNF lo chhuah theih nana Congress President leh MP nihna bansan hial khawpa lo tuar tawhtu, Pu Duhoma hi MNF party hian lainatna chhete tal pawh an nei lo hi, thil kal tawh ngaihtuah hian... A mak tih loh rual a ni lo.

MP & MLA te hi anmahni thlang tlingtute phatsan a, party dang zawmsantute khapna dan (Anti defection Law)  hian ZPM MLA te hi a tinzawn hauh lo, mahse Dan hi a changin a biru (silent) a, a changin kawngsirah huaisar takin a kal ṭhin bawk a, independent MLA-in a tih loh tur tih inziak zinga ṭhenkhat la vawng chung hian (dik chiahlo chungin) bantir luih theihna dan erawh a awm nameuh thung. Tuna thil awmdan ber nia lang chu - Esopa thawnthua Lui mawng lama Beramno tuidai lai chinghnia in, Seh chak tak chunga, "Eng vangin nge, ka tui intur i dai nut?" tia huat tur a zawng chawp ang vel kha a ni. Pu Duhoma hi Lui hnar lamah ni lovin, Lui mawng lamah a awm zawk niin a lang e.

Chutichuan, Pastor Chhawna inlarna ang deuh khan, "Arsi hnuhnung ber hunah kan awm mek ta, Chu Arsi chu Thimah a thlawk lut ta a," tih ang deuh khan, Mizoram politics hma lam hun hi eng tin nge a kal zel dawn le? He Sawrkar, MLA pawh ngah tawk tak hian, eng vanga Serchhip bial hi la awt ngawih ngawih nge a nih ang le? Chinghne duham tak khan, Tuia A sa hrang put lai thla lo lang chu, Chinghne dang sahrang put emaw tiin a zuk hap a, A sahrang put lai a chan phah ta ang deuh khan, he Sawrkar rilru hrisel lo tak chungah hian eng nge lo thleng dawn le? I lo thlir phawt mai teh ang.

Welcome, Political revolution in Mizoram soon