Kan mamawh tui hnianghnar

Kumtinin ṭhal lai chuan tui a harsa ziah a, a chhan ni theia lang chu kan tui lakna hian min chawm zo tawh lo a ni. Tlawng ringawtah kan innghat a, Water supply scheme hi a thar pawh nei leh mah ila, Tlawng bawk kan melh leh chuan kan harsatna a ngai reng ang. Chuvangin, kawng dang kan dap a ngai takzet tawh.

Mizoram mipui tlem te, Connection nei phei chu tlem te awmna ramah hian ruahmanna fel tak nei ni ila chuan, eng hunah mah kan buaiin ka ring lo. Fur lai a nih loh chuan kan buai reng mai. Sawrkar lo awm leh tur pawhin hemi kawngah hian chak takin hma la se ka ti ngawt mai. Kan ramah lui tam tak a awm ve a, connection late tana khamkhawp hi chu a awm chiang a ni. Chuvangin, tute emaw hlawkna tura scheme duang ringawt loin, mipuite thleng phak scheme ṭha tak duan a hun lutuk tawh. Khawpuiah kan pem fo lo thei lo a, connection a pung a, tui erawh a pung si lo a, a buaithlak a ni. Tui sem tlawn thiam erawh an vannei thei fu niin an sawi.

Phûl lem kan phah a, football tichhetu Futsal ground kan siam vak vak a, a vaibelchhe tel a kal ral a, a chhawrtu erawh tlem te an ni thung. Eng ngati nge a loa kan awm theih loh; tui chungchangah hian kan vuaicha leh viau si? Kan kal dan leh hmasawnna kan teh dan hi a letling hlein ka hria. Tui hnianghnar taka min pe tura ruahmanna siam thei leh tihlawhtling thei sawrkar mamawhna a sang khawp mai. Party worker ṭhenkhat leh a phawvuaka phur em em te'n "Kan party kan sawrkar chuan" lo tih ve chhen lam a ni lo. A fawng vuantu leh a taka hma la thei sawrkar kan mamawh a ni. Sik leh sa a danglam zel a, tui hi a kám tial tial dawn. Chuvangin, lui pakhat chauhah innghat tawh lo ang u.

- Zairemthanga