Kamrula Hnathawh Zat Versus SEDP
Social Media lamah Mizoram sorkar, MNF sorkar kan tih mai hnuaia Kamrula hnathawh zat kha ka lo hmu ve a, heti zawng hian ka chhût neuh neuh a, Pu Zoramthanga sawi SEDP Rs 3,00,000 hi chhungkaw 2472 a pek theih reng a lo nia!
RTI Act zawhna aṭanga lo lang kum 2020 hnu (2019 a la tel lo mah mah) chhunga hnam dang Kamrul Laskar-in Mizo hnam party nia inchhal MNF sorkar hnuaia hna a thawh chin chu Rs 741814261.44 a ni. Hei hi Pu Zoramthanga sawi SEDP original zawk Rs 3,00,000 khan sem ta ila, chhungkaw 2472 in an dawng thei a ni. Kum 2020 hnu a nih chuan Covid-19 len hnuah ringawt pawh Kamrula a buai ve lo, hripui kha SEDP sem tlem chhan chhuanlam a tling lo, financial management thiam loh vang a ni.
Kamrula hnathawh RTI ACT hmanga an zawh chhuah chin hi en ta ila, kum 2020 hnu chin an ti, Covid-19 len hnu kan ti thei ang. Kan sorkar hian sum a neih loh chhan chhuanlam a siam hi Covid a nih chuan Kamrula hnathawhna tur chuan sum a nei a, SEDP Rs 3,00,000 sem tur chuan a nei lo. Mizo mipui aiin Kamrula a ngai pawimawh tihna a ni. Mizo mipui hi kum tawpa vote thlan tur kan ni a, Kamrula hi chuan vote khat bak a nei si lo. MNF hi term khat lek hnuah an tla palh a nih chuan Kamrula leh amah vurtu thiam loh, chu bakah Minister pahnih pathum hausa uchuakte thiam loh a ni ang. Bial ṭhen khatah MLA ṭha tak tak pawh nei se ṭhian sual kawm chu a pawi a ni.
Hei bakah hian Chakhei-Siasi road siamna Rs 47,00,00,000 a la awm an ti. Hei hi Rs 3,00,000 in sem leh ta ila, chhungkaw 1566 chu SEDP Full Payment kan pe thei bawk.
Duhsak zawng hnam dang hnathawh tur hi Covid-19 chhungin a awm tih Zoram mipui hian lo hre ve hrim hrim se.
Kan duhnaah sum a awm, kan duh loh chuan sum a awm lo. SEDP hmangin min lei a, Pu Zoramthanga kan rin vang aiin Rs 3,00,000 duhna avangin mipui rethei rilṭamin MNF kan vote tling a, tlin hnuah SEDP atan pawisa a awm tawh lo, Kamrula tan pawisa a la awm.
Kum 2023 hian kan inthlang leh dawn a, Kamrula contract hna thawh zui tir loh dan hi kei leh ka chhungte chuan kan zawng dawn a ni. Kan ram dinhmun hi kan thlir chian a ngai, MNF duh hrim hrim tan chuan MNF vote nawn a sual lo, MNF duh tawh chuan si lohva Rs 25,000 i dawn avanga tui lo chunga MNF i vote chuan, sorkar pawisa Rs 25,000 hmangin MNF-in an lei che tihna a ni. MNF vote tumsa tan chuan Rs 25,000 dawn leh dawn loh lam ni lovin, an vote dawn chiang sa, dawn vanga vote zawng chu Rs 25,000 man kan ni a, Aizawl tlangval Basketball khelhna pheikhawk man ang hu pawh a tling lo a ni.
- Lalthanmawia