BENGNGAWNG KHAWVEL-I

Ri hriatna hi Pathianin hriselna (special sense) min pek zingah hian a pawimawh ber hial awm e. Ri hriatna lak boa a awm hian mihring nun hlutna a chanve aia tam mah a tlahniam ṭhin. 

BENGNGAWNG KHAWVEL

Bengngawng ( hearing impairment) awmzia chu ri hriatna tlahniam, ṭawng ri pangngai hre kim leh fiah tawk lo aṭanga ngawng em em , au deuhthaw khawp a biak ngai chin a huam ber a.

Ngawng hmiah (profound hearing loss) hmuiphun chauh a biak theih te pawh a huam tho mai. 

Ri/ thawm (sound) hriatna hi thil nung dangte pawhin nei ve bawk mahse mihring kan chungnung bik larhna chu ri hria in , ngaithla in awmze nei thu tam tak kan sawi chhuak thei hi a ni. Thu awmze nei ri chhuak hriatthiamna chu mihring nun bul innghahna ber a ni. Mihring kan lo piang a, kan seilian a, thil zir tur tam tak nun khawchhuah nan a lo ṭul a, thiam thil tam ber hi ri hriatna kaltlanga kan chawk luh a ni. Hna nghet chelh hnuah pawh hna tlin tak, hma la thiam, hna thawk chak, hna thiam leh rawn tlak ni turin ri hriatna neih ṭhat chu thil pawimawh ber a ni. 

Bengngawngte hian thil tam tak mi pangngaiin kan hriat theih hriat ve loh an nei ṭeuh mai a. Thu leh hla hi ziakin awm the meuh mahsela, a rik dan - a key hniam, per, sin, thum, ṭeng, fiak, chher leh thluk rin dan chi hrang hrang tam tak ngaithlatu rilru tidanglam a hneh thei te hi a tem ve pha hauh lo. Chungte chu ziak a awm ve lo an ni. Entirnan: thinlung khawih tak mai a thusawi te, fiamthu nuihzathlak tak te, a awm ṭeuh mai. Thu lam/ thluk dan zawng zawng hi a ri an lam nen lam hi chuan ziakin a awm ngai hmel si lova. 

Mizoramah hian bengngawng kan tih ang chin hi mi 3500 chuang an awm a, record a tel lo hi za chuang fe an awm ngeiin a rinawm. Heng kan ram mi te ngei kan u leh naute hi i ngaihtuah ve ngai em? 

Khawvelah hian bengngawng maktaduai 466 lai an awm a, maktaduai 34 chu naupang an ni. 

India ramah chuan maktaduai 63 zel kan awm thung. Beng­ngawnna hi 50% zet hi chu a ven theih a, beng natna avanga ngawng tur hi a hun taka enkawlna an dawn chuan 65% zel a tihdam theih a ni. 

Bengngawnna hi rualban phak zan lohna (disability) thlentu pahnihna khawvel huapin a ni a. 

Pakhatna chu depression a ni a, zu in avanga harsatna hrang hrangin a dawt a, chutah ruh chuktuah natna (osteo-arthritis). Bengngawnna hi rualban lohna (handicap) thlentu lian tak a ni bawk.