'PATHIAN HMANGAIHNA' THLIRNA

A hmasain, he hla thu (lyrics) hi official-a post ka hmuh loh avangin mi hrang hrang dah ka’n thlir kual a, dik lo leh felhlel lai a awm chuan thupha ka chawi lawk ni se. He hla Pathian Hmangaihna hi Fela phuah a ni a, Fela Hlate Gospel music video ‘Pathian Hmangaihna’ tih album hming chawitu hla a ni. A album hi April 10, 2021-ah khan tlangzarh a ni a, July 15, 2021-ah a satu Maruati Hnamte youtube channel-ah dah a ni a, he thu ziah lai thleng hian thlirtu mi maktaduai 1 leh sing 4 chuang an awm tawh a ni.

He hla hi Pathian hmangaihna puan chhuahna hla a ni a. A hla bul ṭan nan,

Pathian hmangaihna ropui chu,

Sawia fiah zo rual a ni lo,

Tuin nge rul seng ang le?

tih a awm a. Zawhna chhinchhiahna (question mark) in tawp mah se, rhetorical question ang te pawhin a ngaih theih zawk mah a. A tlar hmasa bera ‘Pathian hmangaihna ropui chu’ tiha bul a’n ṭan ngawt maite hian he hla phuahtu hian Pathian hmangaihna ril leh thuk tak chu hrilh chawp emaw, mi dang zawh chawp emaw ngai lovin a hresa tih a tilang chiang hle a. Chuvangin, he hla phuahtu hian zawhna ni lovin Pathian ropuizia sawi a tumna kawng khat angin a ngaih theih a ni.

Chang 2-naah,

Retheih mangan buai harsatna,

Lo thlengin engpawh tawk ila,

Min thlahthlam ngai dawn si lo,

A khawngaihna ka tan a lo ni

tiin a chhunzawm a. He lai hian Pathian khawngaihna a sawi rualin mihring lamah a universal hle a. A chhan chu engtik hunah pawh mihring tu pawh mai hi harsatna hian min kiansan lo va, buaina kan tawk awl lo a ni. Chuvangin, he hla hi tu tan pawh inhnemna tling a ni. Kan harsatna tawh hi a inang lo va (khawvelah harsatna thar awn tak tak lo mah se la), chu bakah chuan kan dawnsawn dan te pawh a danglam ṭhin hle a, chung te a nih avang chuan mi tu pawh mai hian Pathian kan mamawh a, chhantu kan ngai a ni. Kan harsat mangan lai taka min thlahthlam ngai miah lo tu, min veng rengtu tu emaw a awm tih hriatna neih hi a thlamuanthlak hle a, Kristiante kan vanneihna tak pawh a ni a tih theih awm e. Tlar linaah hian a khawngaihna a rawn sawi ta chat a, a kalh a kim ta tih te ngaihtuahnaah a lo awm a. Pathian hmangaihna leh khawngaihna hi thil inzawm tlat a ni a; chhandamna thu pawh hemi pahnih tel lo chuan a fiah zo tak tak lo a ni. Chuvangin, Pathian hmangaihna chungchang hlaa a khawngaihna a lo lang tel hi a inhmeh a, a inawm hliah hliah a ni.

He hla kan ngaihthlak zel chuan,

Nun kan neih theih nan hrehawm tinreng tuarin,

Hmangaih vanga van Lal fa nih chu thlang lovin,

Van ropuina kalsanin,

Thing kraws chu a rawn thlang ta

tih a lo awm a. He lai tlar tawi teah pawh hian Lal Isua’n min hmangaih avanga a kalsan tak leh hrehawm a tawrhnate, keimahni avanga a chan te chu a lo lang a. Hemi zawhah hian

Hmangaihnain min tlan a,

Khawvel thiam chan lehna chu,

Chatuana damna chu

tihin a chhunzawm nghal zat a. Pathian hmangaihna leh Isua tawrhna bakah chu tawrhna chuan eng nge a thlen tih a sawi tel ta bawk a. A hla chang hmasa lama thu leh zawhna awm thei hrang hrangte chu a hla tawp dawn aruaiah hian chhanna pekin kan awm a. Thinlung hneh taka Pathian hmangaihna chungchang min fah hnuin Isua’n kan ai a tuarna hrilhin kan awm leh a, eng vanga kan ai tuar nge a nih tih chu helai tlarah hian kan hmu ta a. Thiam kan chan lehna a nih thu min hrilh rual hian min tuarsak lo se la, thiam loh chang mai kan nih thu a kawk tel bawk a. Min tuarsakna avangin chutuana damna, kan theihnaa kan ban phak ngai reng reng loh tur chu kan chan theih phah ta a ni.

He hla hi Pathianin mihringte min hmangaihna puan chhuahna hla a nih rual hian chik taka zir chian chuan kan tih ve tur a sawi tel vein a hriat theih a. Bible-a kan hmuh angin Pathianin min hmangaih angin keini pawh kan inhmangaih tawn tur a ni. Hmangaihna hi Isua’n kraws-a a tuarnaah chauh khan a lang lo va; Petera leh Johana a hmangaihnaah te, Marthi leh Mari a hmangaihnaah te zir tur min hnutchhiah a. Tirhkoh Paula khan a hmu chiang hle a, Thlarau Thianghlim hmanga Pathian hmangaihna kan thinlunga hriattira kan awm thu te, Pathian hmangaihna avang hian keimahni tan maia nung thei kan nih tawh loh thute a chiang em em a. Dietrich Bonhoeffer pawhin he thu hi German tan ina a tanna aṭangin a sawi a, ‘Pathian inpuanna aṭang chauh lo chuan miin hmangaihna an hre fiah zo lo… Isua Krista tuarna chauh hian hmangaihna awmzia tak tak hi min hriatthiamtir thei a ni,’ tiin a sawi a ni. Chuvangin, Pathian hmangaihna kan hriatthiamna hi kan mihringpuite kan hmangaihnaah a lang chhuak ṭhin a ni.

A thunawn hi a hla pumpui khaikhawmna angte pawhin a ngaih theih a, hetiangin-

Hmangaihna mak aw hmangaihna,

Chatuana hla mawi ber I hmangaihna hi,

Thuin ka hril seng lo’ng e.

Hmangaihna ropui ka tan a ni,

Zahngaihna vanga nun ka neih vangin,

Ka hmangaih che.

He hlaah hian ‘hmangaihna’ tih thumal hi vawi riat lai a lang a, ‘hmangaih’ tih thumal vawi thum a lang bawk a, hla pakhat, chang hnih leka awm atan hian a tam a. A phuahtu hian a sawi tum hi a dah langsar thiamin a dah pawimawh hle a, a aiawh (alternative) pawh a hmang duh lem lo niin a lang a ni.

He hla tawp kharna atana,

Pathian hmangaihna ata chu

engmahin min ṭhen lo vang chatuanin

tih lo awm hian he hla phuahtu themthiamna leh Pathian hmangaihna nghehzia leh rintlakzia tilangtu a ni awm e.

-Debbie Rinawmi