Mizoram first: POLITICIAN, RAM HMANGAIHTUTE (Patriotic Politicians)

Khawvelah hian politician tam tak an lo piang tawh a. Mahse, politician ṭhenkhat chuan anmahni ram ngei an rawk a; an ram siam ṭhatna tur sum lo kal an eiru a, anmahni leh an chhung leh khat, vua leh vangte vulh len nan mipui sum a hawpin an hawp a, an chawm bawk a, an dai baw bawk a! Politician ṭhenkhat chuan politics chu sumdawn nan an hmang a, rei lo te chhungin RCC building lian tak tak leh car man to tak tak an nei thei mai a. Politician ṭhenkhat chu an thau tual tual a, an enkawl ram leh mipuite erawh an cher tual tual thung a. Ram hmasawnna tur leh mi retheite dàwmkanna tur sum an ei zawh zel avangin, vawkte vulh ṭhang thei lo ang maiin, ram mipuite kan ṭhan a ṭhu a, ram a chér tulh tulh a, ramin a tlukchhiat phah ṭhin a ni.

Politician ṭhenkhat erawh chuan politics vek chu hmangin, an ram tluchhe mek an tungding leh a, an ram economy tlachhe tawh pawh an siam ṭha leh thin a ni. Chutianga dikna leh rinawmna leh huaisenna nena, thih pawh hlau lova mahni ram tana beitute chu, ram hmangaih tak taktu, 'patriotic politician' an ni.

POLITICS CHU ENG NGE NI?

Politician ṭhenkhatin politics chu an ram rawk nan an hman laia politician ṭhenkhatin an ram tluchhe mek tundin nana an lo hman bawk si chu eng nge ni le? Dr. C. Lalrampana chuan politics awmzia ti hian a lo sawi a: "Politics hi Grik ṭawng, 'politikos' aṭanga lak a ni a; a awmzia chu: (1) Mimal emaw, pawl leh khua leh tui ṭhatna tura kaihruai, (2) Dik taka an chanvo ṭheuh an chan theihna tura rorelna dik kenkawh, (3) Dan leh thupek kenkawh, (4) Hnam leh hnam, chi leh chi inkara inunauna thlen tura thawh, (5) Hnam ziarang humhalh, (6) Ramri kham fel, (7) Vantlang ṭhatna tura kawng tinrenga thawh, te an ni," a lo ti a.

A chunga Dr.C.Lalrampana sawi ang khian, politics chu khawvela mihringte kan cham chhunga awmze nei leh mumal taka kan inenkawlna hmanrua atana Pathian min pek a ni tih a chiang a. Kan Mizo politician hmasate khan politics an lo man fuh chiah loh deuh avangin; politics chu Mizo leh Mizo inbeih nan te, eiruk nan te, sumdawn nan te, inbum nan te, dawt sawina hmanrua atan te, party inchirhtheh nan te, adt, an lo hman ṭhin avangin, Kohhrana rawngbawltute tan phei chuan politics chu inhnamhnawihna tlakah an ngaih loh phah hial reng a ni.

Patriotic writter, Kaphleia (RIP) chuan, "Khawvel hi englai pawhin siam ṭhat a ngai reng a, ṭhat lutuk tih reng a nei lo vang. Mi fingte thu leh mi ṭha leh taimate thiltih hian a vawng ṭha hram hram a ni. Kan dam rei leh rei lohte pawh hi kum te, thla te hian a hril ber lo va, kan thu leh thiltihte hian a hril ber zawk a ni," a lo ti a.

Khawvel ram hrang hrang leh State hrang hrangah te pawh, ram siam ṭhat hna beitute nunah hian, a chunga Kaphleia sawi, mihring mize chi hrang hrangte hi a bet tlat niin a lang, chungte chu:

(1) MI FINGTE: Mi bik, mi chak, mi hneh theihna talent nei ṭha, mi thil chik mi, thil kalphung man chak, boruak thlir thiam, (2) MI ṬHATE: Mi rilru ṭha, mi dik, eiruk duh lo, mi hlemhle lo leh pamham lo, mi bum duh lo, (3) MI TAIMATE: Mi chimlim, a sawia sawi mai ni lo, a taka thawk, mi taima, mi invawng, mi inzir peih mi.

Hetianga mi bik, ram hmangaih tak taktu, 'patriotic politician' kan han tihte hi kum tinin khawvelah an rawn piang lem lo va. Simeikhu ang deuhvin kum eng emaw zat danah an rawn inlar leh zauh ṭhin. Mi bik an ni a, mi hneh theihna (talent) ropui tak, Pathianin a pek chu hmang ṭangkaiin, rorelna ṭha zawk duh mipuite thinlung an chawk tho (inspired) va, an ram tluchhe tawh chu tundinin a lo awm leh ṭhin a ni. Chutiang mi bik, India ram State Chief Minister, mahni ram hmangaihtu tak takte chanchin tlem lo tarlang ila.

NITISH KUMAR: Bihar State CM, Nitish Kumar (since 2015) chu Kristian a ni lo va. Mahse, Pathian hian Kristian kher lo pawh, dik tak leh huaisen taka an ram tluchhia siam ṭhat tumtute hi a pui duh a ni tih, Bihar State aṭang hian a hriat a ni. An CM hmasa Laloo Prasad-an Bihar a lo sawp chhiat vek tawh, Bihar chu Gunda-ho rorelna ram an tih mai, 'Bihar State hi a ding chhuak leh thei tawh dawn em ni?' an tih hial chu, Nitish Kumar-a chuan a tungding leh a; India rama enconomy-a ṭhang chak ber State-ah Bihar chu a hlangkai leh thei a ni. An State GDP pawh Rs 7,45,310 core (US doller 94 billion), current market price (2022–2023) a ni.

MANIK SARKAR: Tripura State CM, Manik Sarkar (since1998) chu, kum 2018, 1st Feb-a Election Affidavit a theh luh ang chuan; private car a nei lo va, ama mimal in a nei lo va, asset dang engmah a nei lo va; a Bank Account -ah Rs. 2000/- chiah a nei a ni! Mahse, Mizoram aṭanga Tripura-a zin tawh reng reng chuan, Tripura ram china motor kawng ṭhat bikzia hahipin an sawi zel mai! Chu bakah, Mizoramin 2018-a Medical College MBBS zir theihna (ZMC) pakhat kan neih laiin, Tripura chuan Medical College, kum 2005 khan 2 an lo nei tawh a; Engineering College 6; Vety College 1; Law College 1; Music College 1; Art College (painting,etc) 1; Fishery College 1; Nursing & Paramedical College 3; Polytechnic institution 3; Regional & Physical Edtn. College 1; University 5 lai an nei bawk. (Mizoram nena khaikhin chuan khi tah an ni mai!)

ARVIND KEJRIWAL: Delhi (UT) CM, Arvind Kejriwal-a (since 2013) chu Hindu a ni a. India ram khawpui ber Delhi chu, kan hriat ṭheuh angin, India ram hruaitu lu ber berte leh India rama rorelna sang ber, Indian Parliament House 2 (Lok Salha & Rajya Sabha) member-te awmna a ni a. Chubakah, khawvel ram hrang hrang sawrkar aiawh (ambassador) -te fuankhawmna a ni bawk a. Delhi mipui, maktaduai 16,753,235 (census, 2011) chuan policy nei ṭha, Arvind Kejriwal-a chu an CM atan kum 2013 khan an lo vawrh chhuak ta nalh mai a ni. Mihring ve bawk a ni a, tlin lohna lai sawi tur a nei ve nual ang. Mahse, Delhi mipuite chuan, mi dik leh mi chak, eiruk duh lo, policy nei ṭha nia an hriat chu an en chhin pawp mai a, an enchhin fuh ta reng a ni.

Mimal insawichhiatna neuh neuh leh political party inchirhthehna vel mai maiin, Delhi mipuite rilru a tibuai ve lem lo a ni. Arvind Kejriwal-a Policy chu hetiang hi a ni:

(1) Mi zawng zawng hnena zirna (education) ṭha pek (quality education for all)

(2) Hriselna ṭha mi zawng zawng hnena pek (quality healthcare for all)

(3) Mipuite hnena kawlphetha hnianghnar tak pek (affordable electricity for all)

(4) Delhi-a chhungkaw tinte hnena pipe hmanga tui thianghlim pek (pipe water supply to every household)

(5) Delhi khawpui chhunga sawrkar hospital zawng zawnga a thlawna damdawi pek (free medicines), a thlawna damlo enkawl (free treatment), a thlawna test, a thlawna zai (free surgery).

A tawp berah chuan, Mizoram MLA General Election, 2023 chu kan lo hnaih ta hle mai a. Rilru fim takin, beng sikin, vote thlak thei chinte chuan kan ngaihtuahna sengin, CM ṭha tak leh MLA ṭha tak tak, kan ram enkawltu tur, tihtakzetin Pathian hnenah dil ila. Kristian pawh ni lo zawk, Bihar State te, Tripura State te, Delhi mipuite mahin an ram tluchhe mek siam ṭha tura mi dik, mi huaisen, eiruk duh lo, CM an vawrhchhuah theih chuan, keini Mizoram Kristian-te hian kan vawrhchhuak thei ve dawn lawm ni?

Inthlan dawn apianga chhungkaw din chhuahpuina tham tak tak ni si lo, sa tah chhuak pek an tih ang vel lek sum sem leh mai ṭhin ni lo; Delhi tlanga India ram CM zawng zawng intawhkhawm nikhua pawha, zamna chhe té pawh nei lo va, mahni ngaihdan chiang leh fiah taka sawi pap pap thei; Central lama politician senior pui pui zingah pawh zam map bik lo, mi dik, mi chak, Pathian ṭih mi, ka eiru lo vang tia intiam ngam, ram hmangaihtu, patriotic politician CM leh MLA kan thlanchhuah ve a ngai tawh hle a ni.

Amaherawhchu, sum leh pai leh therhlo eng emaw um avanga mi ṭha, mi dik, Pathian ṭih mi, ram hmangaihtu kan thlang chhuak ve thei lo a nih ngai chuan; mi pamhamte leh mi awkhrawlte leh ruihhlova sumdawng hausate inthurualin, kan ram neih chhun hi an la thunun (control) bet tlat ang a, kan piputen lu chhum ban chhum huama an lo sah zausa, Zoram hi an la eiral ngei dawn a ni tih hi a chiang reng mai e.

I ram leh hnam a boral chuan nang leh i chhungte in him bik lo vang.

- Ruata Chawnghlut (rlc)