Thlai thar bazar siam a hun
Aizawl khawpuiah hian thil engkim mai hi a ṭhang chak em em vek a, hmasawnna pawh rin loh hlanin a kal muah muah a. Ṭhang khat lian a ral meuh chuan khawpui chhung kawng leh building te hi a dang-lam vek tawh a ni.
Hmasawnna a tho pa zuan mek lai hian hmasawnnain a thlawh khum fo a awm a, chu chu thlai thar zuartute thlai thar sawngbawl dan leh thlai thar zawrhna hmun an nei lo hi a ni.
Kan naupang deuh lai kum 20 chuang zet kal ta khan kawngpui sirah leh bazar puiah thlai thar hi zawrh
ṭhin a ni a, kea kalten nuho thlai thar zawrh hi kan rap fo a ni.
Tunah kum 20 chuang zet a liam leh hnu hian Millennium Centre te, artiticial grass te kan nei a, international football match hial te pawh Mizoram hian kan thleng thei tawh a. India rama football league sang ber, I League khelh theihna mual te pawh kan nei tawh a, kan thlai thar zawrhna lian ber erawh chu kawng kam tho a la ni.
Thlai thar zawrhna sakna tur hmun a awm lo, bazar building sakna tur sum a awm lo ti dawn ila Aizawl veng hrang hrangah hian dah ṭawl mai mai tur Indoor lian pui pui kan sa reng thei tho a. Hna zawh hmaa chim leh mai mai tur lung kan rem ṭeuh thei reng a, football khelmual thar leh cricket khelmual thlengin kan nei thar zut zut thei tho.
Hetiang khawpa thil dang tih nan sum kan ngah lai hian thlai thar zawrhna tur hmun leh building erawh vawiin thleng hian kan la siam sak thei lo a, kan ngaihsak loh avangin kawng sirah, kalkawnga kalte rah thuak thuakna hmunah Mizorama chawhmeh neih chhun thlar tharte kan zawrh a la ngai tlat a ni.
Kan sorkarin VIP tia a sawi ṭhin kuthna-thawktute hian tun aia duat deuh zawka enkawl hi an phu viau a ni. An thlai thar zawrhna tur hmun kan ngaihtuah sak duh lohte hian man man zawka an thlai thar chhuahte an hralh ve theih nan khar chhawng (commission) te lakah pawh hian tun aia ṭha zawka kan humhalh an ngai a ni. Tunah chuan thlai thartute aiin a khar chhawngho an hlawk zawk a, an thu zawk bawk.
Thlai thar khar chhawngtute chuan Aizawl bazar lian ber new market-ah seat neiin an zuar a, kuthnathawktu tak tak zawkte chuan an thlai thar chhuah zawrh zawrhna tur hmun an nei lo a. Mi bathlar leh dawr hmaah man chawiin an zuar a, foot path-ah te inphoin kalkawnga kalten an thlai zawrh an rap a, a changin lirtheiin a chil sak a. Hetiang reng renga dinhmun khaw-ngaihthlaka an dinna hi a rei tawk viau e.
Miretheite hma ngaitu sorkar hian kuthnathawktute thlai thar zawrhna tur hmun hi a rang thei ang berin siam sak rawh se.
- Lalthianghlima