I dinhmun kha a chhe lo

Mite anga sum leh pai kan neih ve loh vang te, in leh lo ṭha kan neih zawh ve loh vang te, phone changkang leh lirthei han hawlchhuah tur kan neih ve loh vang te, kan ṭhenawmte anga hna sang kan thawh ve loh vang te, thawmhnaw ṭha tak leh nalh hak tur kan neih ve loh vang te hian mahni inkhawngaihna leh inlainatnain kan khat ta ṭhin a.

A thim zawng leh a ṭha lo zawngin thil kan ngaihtuah a, chu chuan kan nunah rilru hahna leh natna a thlen a, mahni nunna pawh zah zo lovin mi ṭhenkhat chuan an nunna hial an tihtawp phah a ni.

Dinhmun ṭha zawkte dinhmun anga din ve theih kan chak a, mah se kan dinhmun chhiatzia leh mite aia kan hnuaihnunzia kan hmu a, kan hlim thei thlawt lo. Dinhmun ṭha zawka min din tir ve turin Pathian hnenah ṭawngṭaina thu kan thlen fo ṭhin. Eng ang dinhmunah pawh ding ila, chan tawka lungawi mai tur hi kan ni tih hi kan inhre lo fo.

Kan dinhmun hi a chhe ber emaw kan tih lai hian, keini aia dinhmun chhe zawk leh hnuaihnung zawka ding mi tam tak an awm a. Chung mite chuan tuna kan dinhmun hi min awt ve em em a, kan dinhmun anga din ve theih hi an chak a ni.

In leh lo ṭha nei lo mah la, thlipui leh ruahpui, khaw lum leh vawt lak ata tawm himna tur leh lung muang taka zan mutmu tuahna tur chenna in i neih chuan lawm ta che. Mi tam tak chuan tawm hulna tur chenna in an nei lo a, mi bathlarah leh khawlaiah te zan mu tam an chhing asin. Puar taka chaw i ei lai khan mi tam tak chuan mei alh ringawt asin an en ni.

Dam ṭha taka hun i hman lai khan ṭhenkhat chuan nnatna hrehawm tak tak an tuar a, sum leh pai tam tak inenkawl nan an hmang ral a, sumin a chhan theih loh pawh chhiar sen loh an awm asin. Damdawi inah han kal teh, natna chi hrang hrang avanga natna khuma mu i hmu ṭeuh ang. Eng natna mah i nei lo bik ringawt pawh kha i vannei tawk lutuk ringawt.

Zau zawkin thil han ngaihtuah teh. Tuna i dinhmun kha a chhiat lohzia i hmu mawlh mawlh mai ang.

- Nawlchunga Chinjah, Siaha