Kum 2016 a lo ni ta

Kum 91 na ka hmang va ṭan ta. Rilru insawizawina atan heng hi ka ziak ve a, hriatthiamna ka dil e.

Nikum 2015 khan he chanchin phekah hian‘Lalmanga nu hlawh rawih ni rei’ thu ka ziak tawh a, kha ni kha a rei tak tak ni lovin hrehawm an tih em em thu sawi nana fehhote khan ni rei ni ber a ni’ an tihelna ṭawngkam a nih thu ka ziak a.

Dan leh hrai : Hrai chu kho lian tak, ṭin khat leh a chanve (1.5) dawng a ni a, hrai chanve dawng kho a awm bawk a, chu chu vawmkho a ni. Hrai hnih dawng Em a awm leh a, chu chu Dawrawn a ni a, mipa puitling chuan buh phurh nan an hmang ṭhin. Hrai hnih dawng Em chu kawt khat a ni. Hengte hi lal rorel laia khawtlang buh tehna a ni a, lal hnenah a khuaten in tinin kawt hnih ṭheuh buh kan chhung ṭhin. Chu chu ‘Lal fathang’ an ti.

Thirdeng chuan an puma kaite hnenah kawt khat ṭheuh an khawn ṭhin. Tlangau chuan in tinah hrai khat an khawn ṭhin. Mi rethei tan buh an khawn chuan vawm kho khat in an khawn ṭhin. Buh hi engkimah an hmang ṭhin. Mahse, khaw hrang hrang tihdan an inang vek lem lo. Chuvangin, dan leh hrai chuan awmzia a nei hrang ta em em a ni.

Dan leh dun: Dan hi chu rorelna ṭawngkam a ni a, dun hi enge ni ? Gen. 5:21 ah 'Enoka chu kum 300 chhung Pathian nen an lengdun’ tih kan hmu. Chuvangin, ‘dun’ tih hi thil inkawp sawina a ni a. Dan kawppui chu rorelna hi a ni a. Chuvangin, 'dan leh dun’ ni lovin ‘Dan leh Rorelna’ tih awm tak a ni a, sawi chiang thei chuan han sawi teh u.

Tlai lam umpawng par : Ka aia upa leh hre zawk awma ka rin mi tam tak ka zawt tawh a, ‘Umpawng’ hria an la awm lo. Mi pakhat chuan ‘um hi a pawng par e’ a ti a. Mahse, chhunah a par si a. Tlai lama par lo ‘Tlai lam umpawng par’ a ni lo. Chuvangin, hriatsual a nih ka ring ta. Hmanlai deuh khan kan huanah Awmpawng kan ngah hle a, ni a tlak dawn hian a rawn par ṭan a, ni a tlak chuan a par eng vul chiai ṭhin a, khua a lo var chuan a chuai leh ṭhin; a rah pawh chawhmeh tui tak a ni ve. Chuvangin, mi hnu nawia ti ve hlutte hi ‘In tlai lam Awmpawng par’ ‘tih tur niin ka ring.

Mitthi ral : ‘Mitthi ka ral’ kan tih hi a dik em? He thu hi mi tam tak ka zawt tawh, chiang taka sawi thei an la awm lo. Thihna hi kan hmelma, kan raldo hneh loh a ni a, mi a thihin an chhungte thil kan pe a, 'mitthi ka ral’ kan ti a, hei tak hi a tiharsatu a ni. ‘Thihna ka ral’ ti ila a dik zawk mai awm a ni. Kan ṭawng hi sawifiah thiam loh a tam awm a ni.

Nau awih hla :

“A khi a’n khian lungpui a lo luang dawn e.

Ka naui kha suan rawh u,

suan zel rawh u.”

Hei hi dai chhak lama lung-pui sawina a ni a. Falam khawpui awm laia phuah a ni an ti. Mizote thlang tlak laia phuah niin an ring.

Feh haw hmuah hla :

“Ka nu, ka pa, lo haw thuai thuai,

Tlangah ruahpui a sur e.

Sakhi lam peng rawn zawh la,” tiha ‘sakhi lam peng’ tih hi Chawngtui pitar chuan ‘sakhi’ ni lovin ‘a khi’ tih tur a ni a ti a. Sakhi kawngte chu ramhnuai lamah a kal daih ang. ‘A khi lam peng rawn zawh la’ tihna a ni. ‘Kawng peng chung ber rawn zawh la’ a tihna a ti a. He hla hi Seipui khuaa an awm laia a phuah an ti a, dai chhak tlanga kawng peng chhak ber sawina a ni e. B. Lalthangliana ka hrilh a, ‘A ni tak ang” a ti ve a ni. Hmanlai thil a ni a, a dik hriat a har hle mai. Sawi ve duh chuan sawi ve rawh u.

- Liansanga, Kanan