Mizo nula mualphona nge tlangval zawk?

Mizo nula hmalṭha hlawh nei lova an in pose (post ni loin) sawisel pawl an awm a, chanchinbu hial a thlen tak avangin he thil hi burning issue a ni emaw ni lo emaw lam ngaihtuah buai lovin Mizo ṭhalai chuan an ngaihtuah avangin kan han tui hnih ve ang a. Mizo nula thiam loh nge a thlalatu lam tlangvalho thiam loh zawk? tihte pawh hriat theih a ni mahna le.

Mizo nula ṭhenkhat hian "Ka nalh em a, ka thla hi lo la ve la, tichuan Facebook velah kan tarlang ang a, chu chu miin an lo like ang a, a nuam veng veng dawn alawm," an lo ti a nih pawhin an tam vak ka ring lova. Hemi ni lo zawk, "Ka rawh, i thla la ang hmiang. I pian a nalh a, i chhe lo bawka miin hmu tam che se la. I nalh laia i thlalak dah hi a ṭha ve a, nakin zelah i la duh dawn a nia," tia sawm chhuaktu camera lian nei lam hi an tam zawk ka ring tlat mai.

Mizo nula zahawmna humhimtu tur chu Mizo tlangvalte kan nihlaiin kan nulate saruak deuhthaw thlalak pho chhuah kawngah kan ṭuan a ṭha zek mai hi chu kei ka pawm thiam loh zawng tak a ni. Kan nula zingah mahni thlalak ruak deuh keng kung leh ing-euh deuh deuh tarlan phur fahran kan ngah pawh hi a zialo lam deuh chu niin ka hria.

Facebook a ni emaw, tunlaia Whatsapp a ni emaw, eng ang media pawh ni se kan Mizo nula ṭhenkhat awm dan en hi chuan kan zak lo tawlh tawlh tih a chiang mai a, kan zam lo a, zahpah kan nei lovin kan hmalam hunah a la pawi thei tih pawh hre lovin kan thlalak kan upload ang pawp pawp a. Henga kan thlalak dah luh tawh chin hi chu khawvelah a darh tluka ngaih tur a ni. Khawvelah a takin darh lo mahse khawvelin a en theih turin facebook lamah kan dah lut ve tlat tawh a ni.

"Model hlawh nei lo" han in tih tawp maite hi kan nulate kan sawichhiatna leh hmuhsitna ang deuh a ni a, ka hmang duh lova, nimahsela thil dik tak chu a ni lawi si a, a hahthlak ve khawp mai. Facebook-a nalh tak taka in pose hi a ṭhat lohna ka hre lova, hmelṭha leh pian nalh deuhte phei chu hmuh an nuamin hnam pawh an chawimawiin ka hria. Hnam chawimawi lo zawk chu pangngai taka inthuam ve theih laia sexy thei ang bera inthuam tum, ṭhenkhat phei chu thawmhnaw inbel mumal lova lo inthuam ṭalh tumte hi an ni a, an hmalam hun a ngaihtuahawm tluk zetin an chhungkaw inrelbawl dan pawh a ngaihtuahawm tel bawk.

He thu ka ziah hian chhiartu tam tak chuan, "It's their life. None of your business," min ti ngei ang. Hei hi chu ram changkang, mahni inchawm thei ram, khawvela ram hausa leh nawmchenna sang theihtawp nei phak ho ṭawngkam a ni. Helaia mahni in leh lo pawh nei loa mi in luah ve hram hramte leh neih mumal nei mang lova lo intih "It's my life" ve em em tur a ni lo tih hi keia ngaihdan ṭhing leh out dated tawh tak chu a ni e.

Tichuan, nu leh pate tana ka han ziah lan hram duh chu mahni fate Facebook vela an in pose kawih sawi tawh chuan uluk deuh zawka kawma titipui a hun tawhah kei chuan ka ngai. Khap bur leh ti lo tura zilh nghal chi niin ka hre lova, titi pui ila a nghawng awm theite leh mipa lamin an lo ngaihdan turte pawh sawipui ila, a mawi lo thei tihte pawh hre ve se, chu chu nu leh pa mawhphurhna a ni.

Bulṭanna bil ve tak vangin kohhran leh khawtlângah i ṭhahnem thei lo a, mi in lawm zo lo nia i hriat avangin i inthlahrung a. In zârin rah a chhuah tlem deuh avanga in hmai a uang lo a nih chuan thil pawi a ni hran lo e. Amaherawhchu, in fanu tha chhawr rual pawh a la nih hma aṭanga facebook leh whatsapp velah in theh lar viau a, mipaho like rawn a nih vanga in lungawi a nih ngat chuan in tisual duai ang tih ka hlauh pui ngawt mai che u.

Duat taka i enkawl hliau hliau ṭhin i fanu, a thla lak saktu turte nena an inphur chhuak lai duhsak taka i vailiam hun lai te kha i ngaihtuah let ang a. I fanuin camera hmaa in thehṭhil vel nuam a tih em avanga ngaihtuah chiang mang loa i lo tuipui ve chiam kha pawi i la ti viau ang. Miin, hei chu facebook-a like-tu ngah deuh ṭhin kha a ni maw, whatsapp mawitu kha a nih hi tia i fanu duat lai sex idol ang hiala miten an ngaih hunah meuh chuan pawi tiin inchhir eng ang mah la a tlai tawh si ang. Chuvuangin, a tlai hma hian in ngaihtuah harh la, an inlanna awmah chuan inlan se. Awmze nei lo taka thla an la a, an theuleu vel mai mai a nih erawh chuan nakinah pawi i la ti dawn a, i lu a la ti zing ang. An tui zawng pawh ni se kawng dik lo an zawh dawn chuan dodal ngam a, nakinah amah leh in chhungkaw tan pawh mualpho pumpelhna tur a ni zawk ang.

Tuna nula/ tleirawl tam tak hi chuan a mawi lo a, khuareiah inchhirna a thlen thei tih pawh hre lovin photographer hmaah an han inhlim chhing a. Photographer-ten nuam an ti si, thlalak nei ṭha nia inngaiin anni lamin an han upload nghal chuai chuai a, a hmeichhia an han tag a, hei hi tunlai thil awmzia, kum upa lam hriat ve loh, keini lamin kan lo vei ve em em si a ni.

Tichuan, nu leh pa ṭhenkhat chuan an fate thla laksak turin photographer-te an tlawn an la ti ta deuh deuh a! A mak thei mang e kan tunlai khawvel hi. "Ka fanu hi facebook-ah miin pian nalh ti se, hmel ṭha ti se, chumi tur chuan thlala thiam bikin a thla laksak se," tih rilru pu Mizo nu leh pa an awm hi chu a zialo lam deuh chu a ni e. Engpawhnise an chhungkaw inrelbawlna a ni a, ka sawi ve tur a awm lo a nih pawhin ka sawi ve chak zawng a nia ka sawi a ni mai. It's my life a ni ve tho a!!!

- Lalromawia Chhangte