Leilawn chim fimkhur ngai
December ni 3, 2015 khan FB leh Whatsapp kan han hawng a, Sihhmui bul, Tlawng Lei, (Bailey Bridge) motor lianin a zawh chim a, mi pakhat a thi a, pakhat na takin a hliam tih chu chanchin langsar ber a ni.
Department pakhat fimkhur loh vanga hetiang thil a thleng ta mai hi a pawiin a runthlak a ni. He lei hi a hma pawhin ṭum hnih lai a lo chim tawh a, tun hi a ṭum thumna a ni e, zuk ti lehnghal a maw le!
Tlawng lei (bailey bridge) chim thu han hriat phata rilru a lo lang hmasa ber chu NH 54 kawngpui, Chhingchhip khawlai leitlahniama PWD (highway) lei dawh Bailey Bridge hi a ni.
PWD (highway)-in a tir phata an dawh khan he lai leitlahniam kal tlang loa a piah lei tan remchang ang reng tak laia lei tana, kawng laih chhung hman tura emergency ang reng taka dawh kha niin an insawi kha a ni a. He lei hi dawh mai lo sela chu he NH 54 chhim lam leh hmar lam chu he leitlahniam hian a dang chat reng dawn tihna a ni. Chuvangin, emergency taka dawh a ni ta a ni.
An dawh tirh chuan he lei hi Metric Tons 10-a rit chauh kal phal a ni a, hun a lo kal deuh a, lei hi derthawng deuha a lan avangin thuam ṭhat a ni a, tichuan 15 Metric Tons phur chin kal tlang phal a ni leh ta a. Sign Board pawh tar thlap a ni a, PWD lam pawhin gate siamin darkar 24 chhung duty an dah thlap a ni.
NH 54 hi Zorama kan kawngpui neih senior ber, Zoram dung tluan hawlh tlang, kawngpui lun ber a ni a. Lirthei bungraw phur chitin reng pal tlang a ni. Hetiang ni chung si a leilawn derthawng tak, 15 Tons a rit chauhina zawh theih, lirthei eng chi pawhin an paltlang ngei ngei ngai tlat bawk si, he ti chen chen derthawng ang reng taka a awm si hi tu mualphona nge ni ang le? Nakkum fur pui thlen hma ngei hian he lai kawng hi kan Department lam pawh hian chin fel dan ngaihtuah sela a ṭha hle awm e.
Kan PWD (highway) hian he lei hi a hlauhawm leh awm lohte mipui hriatah puang zar se. Chutiang a nih loh phei chuan furpui lai ngat hi chuan Chhingchhip khaw mipuite hi an zan mut a tui loh phah thei hle ṭhin a nia!
- Patrick Z, Chhingchhip