Zalen huang

Tunlai chu kawng ṭhenkhatah Mizo nih a nawm ve hun lai tak a ni a. Nakinah phei chuan kan tu leh fate hnena kan la sawi chhawn tur a ni hial ta ve ang.

Zofate football khawvelah kan dak chhuak ve ṭan a. Tun ang reng rengin kan la thleng sang ngai lo. India rama football inelna sang siam chhuah hlim chhawnah khel ve phakin kan han awm a. Kan tlangvalte International Player lo ni tawh emaw, Foreign Coach hnuaia training la te nena ball an han inchuh rap rap mai hi a ropui a. Chu chauh ni lovin kan khelmualah ngei mai an han khel hi ngaihtuah ngun chuan a lawmawmin keimahni tawkah kan thleng sang ve ta ngang mai. Tun dinhmun hi kum nga kalta kha chuan, ‘Kan kal zel chuan kan la thleng ve mai thei asin,’ kan ti a. Kum sawmpanga kalta vel kha chuan, ‘Mizo te pawhin India ram club ṭhaah hmun an la chang nual maithei a,’ kan ti ṭhin kha a ni ngai a. Tunah chu dinhmun chu kan lo thleng ta der mai.

Tunhma lawka kan inkhelhna hmun pui ber, sipai lammual diak theihzia leh footbal khel ṭhin tam tak te hlawk lohzia kha ṭhangthar tam tak tan hriatthiam phak a ni lova. Inkhel thiam vannei ber pawl kha chuan sipai intlarnaa tihphung tam tak zawm kim ve lem lovin sipai ṭan te an awlsam phah a, a ṭhenin PWD lamah te hna an hmu a, a ṭhenin khawi Office-ah emaw hna sang vak lo te an hmuh phah kha a ni ngai a. Chu pawh a thiam nazawng tan beisei theih a ni hek lo. Inkhel hrat leh thiam tak tak, hlawkna sawi tham nei lova mual liam ta kha zozai hmuh hnuah chuan tunhnua ṭhangthar inkhel thiam te vanneihna hi sawiin a siak lo.

Chu chauh ni lovin tunhma kha chuan ‘Physical Fitness’-ah kan hniam em em a. Kan inkhel thiam te kha luh tirha thiam ve tak, mahse chawhnu lama ropui ta vak lo kha an tam em em a. Chu chauh ni lovin inkhel thiam tam tak kha vairam boruak ngam lo deuh deuh an tam bakah dinhmun ṭha nei tura inzir a, mi ruala kal ve aia lunglenna ngai pawimawh ta zawk te kha an tam a.

Chung thil avang chuan kan football-ah hian beiseina a sang mawh em em a. Inzirna hmun nei fumfe lo, ti ṭha duh lutuk bawk si lo, hlawkna hmuh tur suangtuah hlei thei lo dinhmunah kan ding fur mai a. Kan inkhel thiamte aṭanga beiseina sang lo tak kan neih hun kha a la rei lo. Chung zawng zawng mita hmutu keini ang tan chuan vawiina kan dinhmun hi a lawmawm zual a, a ropui sawt mai.

Kan veng khelmualah I-League an khel a, hnam hrang hrang Player-te meikawha an ṭang hmel han hmuh te hian tirilah lawm avangin kan khur der der thei mai. India ram football club tamzia leh tunhmaa vaiho kan hneh loh theih
ṭhinzia ngaihtuahin a lawmawm. Chu chauh ni lovin India ram football club chhuanvawr zingah Mizo telna a lo awm ve ta nual a, a lawmawm lehzual. Kan Mizo Team lama an pet goal pawhin a pet goal-tu kha Mizo tho a nih chuan kei chuan lungdam takin ka en thei. Kan chak loh pawhin hetianga inelna sanga Mizo Team kan han tel ve pha hrim hrim hi ka lawm a ni.

Lawmna te, hlutna te hi kan tehna aṭang vekin a lo awm a. Tunhmaa Jeep thar neih avanga a neitute lawmna kha vawiina car changkang neitute lawmna aiin a nep chuang lova. Tunhmaa Maruti 800 car nei hmasate dinhmun (mimir ngaihdana an dinhmun awhawmzia) kha vawiina car changkang pui pui nei te pawhin an pha thei hek lo. Mi ramah zawl hi hmun pakhat ve mai a ni, mahse keini ramah chuan zawl hi hmun ropui leh hmun ngaihawm a ni sa hrim hrim. Chuta ṭang chuan kan tana football thiam a har bik turzia chu a chiang viau. Kan ram leilung leh kan ṭhan chhohdan han en hian I-League khel thei Football Team kan han nei ve hi a lawmawm nawn leh ṭhin.

Inelna hrang hrangah India ramah chuan kan dâk lawr ve ta zauh zauh a. Inhnekah te, Snooker-ah te, Tennis-ah te, Table Tennis-ah te leh Badminton thlengin kan hming a lang ve ta zauh zauh. Sawi hmaih hlauhawm khawpin Sports Discipline hrang hrangah kan inrawlh lawr ve leh zauh ṭhin. Heng thil han chhut a, kan hnam naupanzia leh kan Economic dinhmun te, kan ram leilung leh kan khawtlang kalphung te han en hian tun dinhmuna infiamna lama kan thanna hi a lawmawm.

Tun aia Budget awmze nei, tun aia sorkar hmalakna duhawm leh eiruknain a bawhbuai loh mihring tam zawk hi han nei phei ila chu kan ṭhang zel thei tih a chiang hle. Khawvel ram hausa ber ber hi ram leilung ṭha leh sik leh sa bakah chunglam malsawmna dawng satliah ringawt an ni lova, an thawh chhuah leh an hnam nunphungin a her chhuahpui a ni tih kan hre fiah chho thei zel ang.

Kawng engkimah inrelbawl dan hi a pawimawh ṭhin a. Inrelbawl dan dik lo hnuaiah chuan mimal tumruh leh mi bik, chhehvela thil awm en khûm a mi naran hmuh phak loh thlir phatute chauh an ding chhuak ṭhin a. Inrelbawl dan a felnaah chuan inrelbawl dan chuan mi naran kha mi felah a chhuah zung zung thei bawk.

Engpawh ni se I-League kan veng khelmuala khelh a lo ni ta hi a va lawmawm em!