Ramhlun phei parking tih tawp a ṭul

Ramhlun veng pheia motor parking tih tawp vek ṭul ka tih thu hi thuneitu ni miah lo mah ila vei zawng leh kan ngaihdan puan chhuah ve ngei a ṭhaa ka hrait avangin ka rawn au chhuah pui a. Tuna mi ang hi chuan Covid-19 hri len loh hunah chuan motor hi a kal thei dawn lo tih hi ka kutphah tlukin ka chiang a ni. 

Mi ṭhahnemngaite leh ziak thiam zawk te chuan vawi tam tak an rawn ziak tawh nachungin tuna ka ziah tum ang hi chu an la rawn ziak chiah lovin ka hria. Chuvangin, mahni ṭhahnem ngaihna lam hi chu au chhuah pui ve pawp pawp mai tur niin ka ngai a, tunah pawh hian ka rawn che chhuak ve duh a ni. 

Tichuan han sawi tlang ta pawp mai ila. Ramhlun veng pheia kea kalna (footpath) siam thar hi an ṭhiat a nih loh chuan Ramhlun to Chanmari pheia parking zawng zawng deuh thaw hi tihtawp a ṭul a ni. 

Kan kawng pui zim em em tawh mai chu a aia a zim theih dan tur zawng ni awm takin AMC lam chuan kea kalna tur an rawn siam belh ta a, chumi atan chuan mimal ram an la ngam si lova, kawngpui awm sa chungah an rawn siam ve leh tawp a ni. Tuna an kal danah hi chuan tun hmaa "Kawngpui Nêk" an tih ṭhinte khan thiam an chang nghak vek tawh a, kan naupan lai pawha khawtlangin an sawi duh em em kawngpui rawn nêk te kha dan angin kan pawm angin chumi piah leh ah chuan kea kalna tur an rawn dah a. Kawngpui nektute chuan an nek ram chu an nei nghal daih pawh hi a dik lova ni. 

Ramhlun pheiah hian AMC footpath siam hi a awm tawh hi chuan motor parking leh taxi stand zawng zawng deuh thaw hi an tih tawp loh chuan motor inpelh theih lohna kawngpui pawimawh tak kan siam belh mek a ni. 

Motor parking hi Traffic Police lam chan ni lovin AMC  chan niin an sawi zui a, AMC hian footpath avanga kawngpui zim avang hian Ram-hlun to Chanmari parking hi ti tawp ngam se an tih tawp chiah chuan mipuiin an duh zawk (footpath nge parking?) an hre chiang tawh ang. 

Tunah hi chuan footpath leh parking hi leng lo chungin hnawh luih a ni a, Covid-19 avanga motor tlem lai pawh hian a jam ngun hle.