Mizoramah leilung fa tan ram a to?
Centre for Environment & Social Justice (CESJ) chuan Land Revenue & Settlement (LRS) Secretary hnenah lehkha thawnin, ram dang leh state pawn aṭanga rawn lutte'n duh duha ram an leia an hralh theih lohna atana dan hmang ṭha turin an ngen.
CESJ hruaitute hian Mizoram pawn aṭanga rawn lut tharte hian ram leina atana sum an sen huai thu an sawi bawk a, an thil vei hi veiawm tak, vei ngai ngawih ngawih niin a lang.
Tun hnaiah, a bik takin Aizawl khawpui chhunga in nei tura a hautakzia hi kan hre ṭheuhin a rinawm. Khawpui laili chu sawi loha leng ni ta se, khawpui dai deuhah pawh an number hriat zat zat an chhiar em ni chu aw, tih mai turin awihawm loh khawpin ram a to tawh.
Mahse, chutiang ang ram chu rim taka thawka beitu a ram leilung fate ngeiin kan lei ngam loh laiin, kan unau, hmun dang aṭanga rawn lut thara inbengbel tumten an ngam êm êm zel a, lak khalh hlau ni awm takin an tifel zung zung a, rim taka mahni in neih ve hun thlira nghaktu; a ram leilung fa tam takten en tlawk tlawk mai loh chu tih theih kan nei lo.
Hetiang a nih avang hian sorkar hian dan ang taka hma la a, ram lei leh hralh kawngah fir taka thil a kalpui hi a hun ta hle niin a lang a, Centre for Environment & Social Justice (CESJ) te hian an lama ṭang Mizo mipui tam tak kan awm a ni tih lo hria se ka duh ngawt mai.
CESJ lehkhathawn, Vanglainiin September 27, Nilaini chhuaka an tarlan danah hian ram an tito ringawt hi buaina niin a lang lo a, "Hmun ṭhenkhatah phei chuan in 50 a sak theih a, hmun khata awmkhawm nan ram an zawng tih kan hria a ni," tia an ziahte hi a 'serious' hle.
Zèp nak emaw, Mizoram pawn lama kan unau, zo hnahthlakte hian chi bing anga thil kalpui an ngah em em. CESJ lehkhaa a lan dan hian chu thil ṭha lo tak chu Mizoramah pawh seng luh tumna a awm niin a lang a, hei hi a ṭha lo takzet a, a thlen hma ngeia kan dan hi kan tihmakmawh a ni.
Mizoram hi Zofate tan kan in pui, kan harsat lai pawha kan tlanchhiatna tur a nih rualin, sahimna kan zawnna hmun ram chuan engti angin nge ram inrelbawlna a kalpui a, engti angin nge khawtlang an inkaihhruai, tih kan ngaihtuah tel fo a ṭul a, mahni nuam tih ang zawng emaw, kan lo chin ṭhan ang emawa khawsak ngawt va tum kha a felin a lang lo.
Mizoram sorkar pawhin a tih tur ti se, ram inrelbawlna fel tak, dan leh hrai ṭha tak nei mah ila, a lekkawhtu turten kan lekkawh lo a, kan hman ṭangkai si loh chuan awmze nei lo mai a ni dawn. He thilah hian kan inlungrual a ngai takzet tih i hria ang u.
Centre for Environment & Social Justice (CESJ)-te kan ram venhim hna an thawhna kawngah kal zel turin duhsakna ka hlan e.
- Lalnunpuia