A TAWPAH CHUAN ZU BAWK!

Zu zawrh ṭhat lohzia te, kan ṭhalai leh force mi te ngei pawh an thih nasatzia te vawi tam tak sawiin, state inthlanpui-ah development lam ai pawhin zu zawrh khapna lamin hun chang tam zawk hialin, zu zawrh loh champion puiin sawrkarna hial siam phahtu party pawh lo awm mah se, keini ang state rethei industry leh sumdawnna lian awm lo sate-ah chuan kan ti nek nek a, a tawpah chuan zu zawrhah bawk kan sir tluk leh nge nge ṭhin. 

Tun hnaiah khan Mizoram sawrkar chuan Mizoram Liquor Pro­hibition hnuaiah phalna neia zu zawrh leh in mai bâkah, phalna neia zu sak theihna dan thar a siam a. He dan hian ram pawn aṭanga kan rama hnathawka rawn lut a, rawn zinte leh an ṭhuihruaite chu a huam deuh ber a. Tin, he danah hian phalna neia sap zu in duh te zu dahkhawmna tur warehouse chu sawr­karin a ruahman tur thu a chuang bawk a ni. Zu chu sawrkarah phalna lain sak/ siam theih a lo ni ta a, a in thei tur chin pawh bithliah fel a ni. He dan hi siam a ni lo chung pawhin a duh chuan zu an sa a, a in duh mi chu vawiin thleng hian tlachhamin an awm lo a ni, a chhan chu zu khapna dan Mizoram Liquor (Prohibition) Act 2019 chu a hlawhtlin theihna tur atana mumal taka kalpui a nih loh vâng a ni. Tuna an dan siam thar dan hleihnei pawh hi a nihna tur taka hman leh ken kawh a ni dawn lo tih hi thil chiang sa a ni. 

Kum 2018 inthlan­puiah khan development lam thila inbeihna hmuh tur a awm lo a, kan party lian inti te chu zu khap chungchangah an inbei a, zu khap kha kan thu khel pui ber a ni. Khati taka MNF-in sawrkarna an rawn lak theihna pawh kha zu khap bur an intiam vâng a ni a tih loh theih loh. Zu hi a ṭha lo a, kan ṭhalai mipa leh police te ngei pawh nasa taka suattu a nih avangin in lo turin sawrkarin min duh a, a siam te, a in te, a zawrh te chu Mizoram Liquor (Prohibition) Act 2019 hmangin sual lian takah a rawn chan tir ta a ni. Amaherawhchu, sawrkarin zu khap bur­na dan hnuaia khap leh loh deuhna dan a rawn siam aṭang hian mipuite rilruah, kan sawisel luai luai sawrkar hmasa khan phalna neite hnenah tho zu in theihna kha a pe a, tuna sawrkar pawh hian phalna neite hnenah tho a pe dawn a ni. 

Tun sawrkara phalna hmanga zu zawrh tur hi a ruih theih loh bik te a nih ngawt loh chuan sawrkar hmasa nen a danglamna vak a awm lo tih ngaihdan a lo piang ta a ni. Zu haw ber leh khap ber anga an lan laiin zu zawrh leh in leh a saka sak hial te pawh an phalrai leh ta si a. He dan aṭang hian sawrkarna lo siam tawh party te leh tuna sawrkar mek party pawh hian, zu hi mipui mar dehna atan mai mai an hmang a ni tih a hriat theih. Politics ball-ah hmangin an politics ball chu keini'n lo rap tleuin mipuite chu kan lo tlu paw ve mai mai a ni tih hi hairual a ni lo. 

Kan ram hruaitute thil huat leh an do ber pawh hi hriatsak an harsa a, mipuite politics thlir dan a la hniam em bawk si avang hian mipuite hi chu min bawl min bawl mai chu a nih hi. 

Zu hmanga politics khelh leh sawrkarna siam tum hi kan party te hian sim tawh se, an rawn tum leh a nih pawhin mipuite hian thu khel laimu lian berah i hmang tawh lo ang u. Central sawrkar zem zen reng ngai, a khur pui a chatlak deuh chànga zu zawrh leh mai ngai state nih hi a zahthlâk a, kan sawrkar hian mipui nawlpuite hi kan intodelh theihna tur atan ruahmanna lian siam se zu politics hi i ti tawp tawh ang u. 

- Ramengi Pa