I NING VE EM?

Pu Lalduhoma, MLA aṭanga bàng tura Speaker hnena a MLA pui ten ngenna an thehluh chungchang hi in lo ngaihtuah chian chuan a zia lo hle.

A chhan thenkhat:

1) MNF MLA ten hetianga hma an lak chhan bera an chhal chu dan bawhchhiatna awma an hriat vang a ni a. Pu Duhoma hian dan a lo bawhchhia a nih chuan ban tir ngei tur a ni ang. Amaherawhchu, dan ngaipawimawh em ema inchhal MNF MLA te hian dan an ngaipawimawh tak tak lo tih chu mi zawng zawng hriat a ni awm e.

2) Vanglaini chanchinbu in a tarlan dan chuan "Kum 2018 MLA inthlanah Lalduhoma leh a thurualpuite'n MLA 21 aia tam nei se, sawisel theih lohin sorkar siam mai tur an ni" tiin MNF MLA te hian an sawi a. Hei hi MNF MLA ten an sawi tak tak a nih chuan dan bawhchhia an tih chunga sorkarna an siam kha chu a thiang an ti tihna a ni. Sorkarna siam thei lo an nih chauh khan sawisel theih niin dan an bawhchhia tihna em ni ni ta ang? An logic hi a ul-tra deuh tlat.

3) Dan bawhchhiatna nia heng MNF MLA ten an sawi hi tunah hian an hrechhuak ve chauh nge a hma aṭang khan an hriaa tunah hian an pu ber mawng hlima a awmna boruak hliahkhuhnan "boruak" siam an tum? Kan titi luahtu pakhat chu a ni phawt a. A ho hle.

4) Champhai North bialtu MLA Dr ZR Thiamsanga hi, statute of limitation in a dangte a nih loh chuan inthlan laia a lehkha thehluh leh declare chungchangah disqualify theih turin thil a tidik lo tih hi a thawhpuite hian an hria em aw? Statute of limitation in a dan loh chuan tunah hian High Court ah a chungthu ngaihtuah turin locus standi neiin lehkha thehlut se, dan anga rorel a nih chuan Champhai North ah khian bye election neih a ngai ang. A khingpui pakhat Pu Tbc Lalvenchhunga hian dan a ngaihpawimawh vangin a hunlaiin Election Official te hmaah hma a la a, mahse annin khawng takin ro an rel lova. Pu Vena hian tuna MNF MLA te tih ang hian hma la ve se Champhai North bialtu MLA dinhmun hi ngaihtuah that a ngai ngei ang.

5) Hnam leh hnam, chi leh chi thuhla nilovin dana a inziah dan diklo vangin thu pakhat ngaihtuah ngai a awm a. Ho te ah dan pawna awm hi thil theih a ni. India ram a zalen tirh Pu Nehru a te hovin India rama hnam hnufual te humhalh nana Scheduled Tribe list an siam kal zelah khan an hriat loh vang leh keini lam pawhin kan hriatloh leh ngaihsam avangin Ralte hnam bik hi Mizo hnam nilovin a hranpaa hnam (Schedule Tribe) angin sorkar danah chhinchhiah an ni a. Chu pawh Manipur state ah chauh an ni. Manipur state pawna Ralte awm zawng zawng hian India ram danpuiah hian tribal nihna pakhatmah an nei lova. Tribal quota pawh dan angin an dawngin an hmang thiang lo. (Hei hi dan siamthat a ngaihna tak a ni. Vai emaw Chakma sual deuh hian Ralte ho hi court ah khing se dan tlawhchhana judge ten ro an rel a ngaih avangin dan anga rorel a nih dawn chuan Scheduled Tribe ten hamthatna kan neih ang zawng zawng hi hlihsak vek tur an ni ang. Ram neih chenin!

Pu Duha bantir tura thehluttu zing ami Pu Lalrinsanga Ralte hi The Representation of the Peo­ple Act, 1951, Sec 5a in chawp­lehchilhin a disqualify nghal.

"Qualifications for mem­bership of a Legislative Assembly. —A person shall not be qualified to be chosen to fill a seat in the Legislative Assembly of a State unless—

(a) in the case of a seat reserved for the Scheduled Castes or for the Scheduled Tribes of that State, he is a member of any of those castes or of those tribes, as the case may be, and is an elector for any Assembly constituency in that State"

Pu Rinsanga hi RP Act in a disqualify nachhan chu a dinna bial hi Pu Zoramthanga dinna bial ang lovin Scheduled Tribe te tana reserve a ni a. State Schedule Tribe list-a chuang hnam te chauh tana zuah a ni. State Schedule Tribe list-a chuang lo te hi he dan hian automatic in a disqualify nghal a ni. (Congress emaw ZPM emaw eng party pawh nise, danah chuan Ralte ho hi Pu Zoramthanga bialah lo chuan disqualify nghal tur an ni)

He dan hian Pu Duhoma ban tir tura thehluttu Pu Zothantluanga, Aizawl West 1 bialtu MLA pawh hi a huam a. Dan hi hman a nih dawn chuan ani pawh hi chawplehchilha bantir nghal tur a ni. 

Dan hi a pawimawh a. Min hrutrualtu pawh a ni. Tin, dan hi namnul tur a ni lova. Amaherawhchu, dan tha lo hi a awm a, a tha lo lai hi siamthat tur a ni. Kan siamthat hmaa kan hman hian danin a phut angin hma kan la tihna a ni a. Mahse, rualkhai lo taka hman (apply) hi a dik loh avangin dikna (justice) kan duh tak tak a nih chuan hleih nei lovin kan hmang tur a ni. 

Pawi ber zawk chu heng MLA te hian dan an ngaipawimawh tak tak lova, an tum ber chu boruak siam a ni. Boruak siam chiah hi an tum leh duh ber a nih avangin chu boruak chu a rei thei ang ber siam an tum anga. A reh hunah he thil hi an buaipui leh peih tawh lovang. Tichuan kum 4/5 a lo ral anga, tlin leh tumin an campaign leh anga. Mipui hian hlawkna chhete mah kan tel leh dawn lo a ni.

Kei ka lo ning ru fu, hetiang politics boruak hi. Congress lamin an buaipui pawhin.

I ning ve em?