Journalists’ Pension Scheme

Mizoram Council of Ministers chuan tun hnai khan The Mizoram Journalists’ Pension Scheme 2023 an pawm a, he thu hi chanchinbumite tan chuan chanchin lawmawm leh chhinchhiahtlak tak a ni ngei ang.

IPR minister Pu Lalruatkima chuan The Mizoram Journalists’ Pension Scheme, 2023 chungchang a sawifiah. He scheme hi Council of Minister chuan a pawm a ni. Pu Lalruatkima chuan MJA-in an dilna chu kum 5 aia a tam tawh thu sawiin, "Ṭhenawm state Assam, Tripura leh Manipur-ahte hetiang hamṭhatna hi chanchinbumite hnenah pek a ni mek a, India state dang tam takte pawhin hetiang hi an nei ve. Assam leh Tripura chuan thla tin Rs. 10,000 an pe mek a ni.

He scheme duan chhin ang chuan chanchinbumi, MJA member ni bawk kum 60 tling tawh leh chanchinbu leh thuthar thehdarhna kawnga chhum lo chat loa kum 30 lo thawkte'n he hamṭhatna hi an dil thei dawn a, thla tin Rs 8,500 pension ang ṭanpuina sum an dawng ang.

Family pension angin chhawm emaw, a latuin a boralin an nupui fanauten an la thei dawn lo. Kum 60 an tlin hmaa natna khirh – cancer, lung zai leh taksa peng ṭhenkhat thlak (organ transplantation) an tawh palhin he hamṭhatna hi dawn an dil thei thung.

Hamṭhatna latute hian pension dang eng chi mah an la thei dawn lo. Chu bakah, an hna hi an chawlh ngei ngei a ngai dawn a, chanchinbumi anga hamṭhatna dang an dawn mekte pawh an dawng zui thei dawn lo a ni.

MJA member ni mek mi 187 bawr aṭangin he hamṭhatna dawng thei mi 23 bawr vel awm mah se, an hna aṭanga chawlhsan a ngaih avangin leh chanchinbumi anga hamṭhatna dang an dawn mekte a tawp vek dawn avangin a takah chuan mi 4/5 bakin he hamṭhatna hi an dil a rinawm loh a ni.

Mizoram sawrkarin pawisa a neih lohzia kan hre tlang vek a, chutiang kara chanchinbumite hamṭhatna tur a ruahmansak hi media a ngaih-pawimawhzia lanna pakhat a ni a, thuthar thehdarhtute pawhin ṭha lehzual zawka an hna an thawh phah ngei a beisei awm.

Tun hma chuan Radio kan ngaithla nasa, chumi hnuah TV a lo chhuak, chanchinbu vanglai a liam leh mek niin a lang a, tunah chuan new media kan ti ta. Mi tin mai hi Online huangah kan zuang lut mek.

Mizoram pum kan thlir thei lo mai thei, Aizawl chauh pawh thlir ila. Ni tina chanchinbu chhuak ziah hi pahnih emaw pathum emaw bak a awm tawh kher lo ang, ṭhenkhat hi chu sawrkar aṭanga fakna (advertisement) an hmuh mil chauha chanchinbu chhuah ni te pawhin a lang.

Khawvel her milin MJA pawh a inher rem ve zel a ngai dawn niin a lang. Tun dinhmunah chuan online media bik aṭang chuan MJA member an la awm lo niin a hriat a, online media hi mi ngaihven leh chhiartu ngah an ni tawh si, chuvangin kan kalphung a ni ngai lo, ti ngawt lo deuhin a insiamrem ve pawh a ṭha awm e.

Journalism hi hna zahawm a ni a, a tizahawm lo theitu chu journalist-te bawk an ni. Chuvangin, kan journalist te hian dik leh huaisen takin thudik puang chhuak chhunzawm se la, therhlo hmanga thlèm leh koh kawi mai mai theih ni lo se a duhawm hle.

- Sanga, Aizawl.