Chalfilh buaina leh Zoram Politics

Tunlai chu Chalfilh Bial a lar ber mai. He Bial hi Speaker Pu Lalrinliana Sailo bial a ni a, MNF chuan Speaker hi paih an tum tih a chiang a, paih an hlau bawk si a, party lian pathum zingah MNF chu Candidate tifel har ber an ni ta a ni. MNF buaina hi Speaker lam ni lovin a aia thuk zawk a ni.

CHALFILH LEH TUICHANG INZAWM

Mizoram Hmar lama Chalfilh Tlang leh khaw chhaka Tuichang lui hian inzawmna a nei hauh lo va, Chalfilh Bial Politics leh Tuichang Bial Politics chu thuk takin a inzawm a, hei hi MNF buaina a ni.

Pu Rinliana Sailo hi USA lama a thusawi avang khan bàn tlak a ni tih hi phat rual a ni lo, MNF a sawisel a ni. MNF a deuhsawh nasa hle a, MNF hi party huaisen chu ni se Lengpui Airport ah khan an banna lehkha an lo pe ngam tur a ni. Pu Rinliana khan Deputy Chief Minister leh Tuichang MLA Pu Tawnluia chu cheng nuai 100 zih hi chungchangah a chhuahchhal tih a sawi hmiah hmiah a ni. Kha thil thleng kha state danga thleng ni se kawng zawhna tham, chu bakah sorkar sawi nghinna tham a ni. Mizoramah chuan Social Media ah a tâwp dèr a, a ZPM tehreng pawh hetiang hi advantage-a hmang turin bawhzui nachang an hre lo, Congress chuan an sorkar lai hre chiangtu Pu Rina hi an zuam vak lo vang.

Pu Tawnluia bial Tuichang hi Pu Rinliana hi Congress a nih laia vawi hnih a tlin tawhna a ni a, Pu Tawnluia tan chuan Pu Rinliana tih lungawi loh hi thil hlauhawm a ni. Pu Rinliana hian Chawngtlai, Khawhai, Khawzawl bakah an khua Lungtan ah hian chi leh kuang bakah party lama a tihlungawi an tam hle an ti. Pu Rina hi Presbyterian Kohhran a ni chungin a chhungte UPC an nih bawk avangin UPC unaute hian an ngaina an ti bawk a. Pu Rinliana hi Chalfilh Bial aṭanga an pet chhuah rual rualin Tuichang Bialah a sawh khawl dawn tih man phak; MNF hruaitu liante hian Pu Rinliana hi dintir an duh.

Pu Rinliana pet chhuah duhtu hi MNF lamah rau rau pawh a zirlai pawl background neite an ni an ti lehzel a, Pu Zoramthanga leh Pu Tawnluia chawlh huna MNF President nih inchuhna hi a inṭan der tawh niin a hre chiang te chuan an sawi a, Pu Rinliana chhuah duhtu an awm rual hian a chhuah hlau em em hi an awm. A chhuah an hlauh chhan chu USA interview aia chiang zawk kha a sawi hlau pawl an awm tih a ni.

Heti taka an tih kual Pu Rinliana hi kum 2018 inthlana MNF chak chhan kha a ni a, Congress vaw chhetu kha a ni tih an theihnghilh thar ta a ni. Pu Rinliana hi Assembly House hnathawktu lak avanga hmingchhia, USA zinnaa anti party zawnga thu sawi a ni a, seat pek tawh loh hi chu a awm rual hial, Chalfilh Politics hian nghawng lian dang a neih avangin an la hlauthawng tih a hriat theih.

CONGRESS CANDIDATE THLAK

Congress hian Candidate an thlak leh a, tu mahin an sawi lo hi Congress tan thil ngaih ṭhatthlak loh tak a ni. Miin kan party che vel an sawi duh loh chuan kan dinhmun a hniam tih pawm ngam tur a ni. Congress che vel hi a Congress mi leh sa bak hian an ngaihven ta lo niin a lang. Congress hian an candidate set tawh pathum chu chiang takin an tidanglam.

Kolasib Bialah Pi Lalawmpuii Chawngthu an ruat a, ding ngei turin an zuk en tawh a, MNF emaw ZPM emaw chu ni se a lar hle ang. Kolasib Bial rei tak lo nghaka lo hauh tu Pu S Lalrinmawia, MZP President chu a sa ta zak mai a, Kolasib ah an chhungkua an hung bawk nen; Congress hruaitute beng a thleng chiang hle. Congress tan Kolasib hi beiseiawm a ni miah lo chung hian kum 2028-a bial hauhna atan a duh a, a lo bei ve ngar ngar tawh a, Aizawl nulain a luahlan hi an lana hman hle a ni. Pu S Lalrinawma che vel chu ngai ngam lovin Pi AwPi chu Aizawl South I lamah; tling zo chuang lo tura a lanna hmunah an suan chho leh ta a ni.

Mamit Bialah ZPM Candidate chang lo Pu Remruatpuia an lalut a, ZPM lam candidate chang lo Pu Lalsanglura leh Pu Lalhmingthanga pawh an lalut; seat an chang ve ve dawn tih a ni. Pu Remruatpuia hi Tlangnuam veng a ni a, chhungkaw hung tak an ni bawk a. Aizawl South II Congress Candidate hian Pu Remruatpuia hi a duhsak hle a, ZPM Candidate Pu Chhuanthanga; venga chhungkaw hung tak lakluh hi a phur hle a ti. Mahse, Pu Remruatpuia hian Mamit Bial chu Congress aṭangin a zuk en ṭhin a, a hmaa bial viltu sum tam tak sengtu Pu Lalthanzama (Joseph Construction) an lo duh zawk tih a zuk hmuh chian hnuah a zuam lo va, Pu Zama zawk hi Congress hian tlaikhaw hnuah an dah ta niin an sawi. ZPM aṭanga lut thar Pu Remruatpuia an dah dawn nia a lan khan a hmaa viltu Pu Zama hi MNF leh ZPM lamin an lo phone vat vat tih a ni bawk a, Poitics hi chu a chang chuan a tenawm ṭhin. Pu Remruata an sawi fel hnua Pu Zama an dah leh zawk thawm hi mipuiin an khel loh chhan chu Congress hian a party pawnah news an siam phak ta lo a nih hmel.

Hrangturzo Biala ding tura an tih zet hnua Congress-in an paih leh tak James Thanghmingmawia hi MZP aṭanga lut ve tho, Anggu Lalhmachhuana leh S Lalrinawma, Lalhriatpuia ten seat an hmuh laia hmu ve lo a nih vang hian MNF emaw ZPM emaw a zawm thut pawhin a mak lo. Pu John Rotluangliana leh Pu Lalrobiaka te chuan seat an pek loh avanga chhuah aiin 2024 Congress President inthlan an nghak zawk dawn an ti bawk.

Hetiang boruakah hian Pu Lalduhoma a ṭawng sual ve reng a, ZPM hian chhim tawp lamah candidate an nei langsar lo bawk si a, BJP hi kan duh lo chung chung King Maker an nih chuan, NDA member MNF hi a tawpah an sorkar leh lo ang tih tu nge sawi thei?

- H. Lalrammawia