Pu Hawla thuchhuah a puitling; Speaker engtin nge a chet zel dawn

MPCC president Pu Lal Thanhawla chuan thuchhuah siamin, "Serchhip bialtu MLA zahawm tak Pu Lalduhoma, MLA a nihna aṭanga paihthlak tuma MNF MLA-ten Speaker hnena an hek ta mai hi Mizoram mipui leh Serchhip bial mipuite zah lohna leh pawisak lohna lian tak niin ka hria," a ti a, Mizo zinga politician tawnhriat ngah ber pawla chhal ngam Congress hotupa thu leh hla hian mi tam tak rilru a khawih a, politician hlun leh ropui a nihzia a tilang nia ngaitu pawh an tam hle a, Facebook leh social media dangah pawh "Pu Hawla nge nge" tiin fak pawh a hlawh hle.

MNF MLA rualte'n hetianga Pu Lalduhoma ban ngiata house speaker hnena an hek ta mai hi a mak rual rualin hun eng emaw chen ata tawha thil inmung niin a lang, ZPM-in MLA an nei lo, independent MLA an ni tia sawi duh hun eng emaw chen aṭang khan an awm tlat tawh. Bang tura an duhna chhan hi enge ni ang tih hi zawhna lian tak a ni. ZPM boruak tihchhiat tumna a ni ang a tih theih a, Pu Lalduhoma mimal taka huatna nei an awm em ni a tih theih bawk.

Ni e, Pu Duhoma hi pa ṭawngkam thiam, mi sawichhiat thiam tak a ni a, 2009 kuma ZNP leh Congress-in village council-a thawhho an puan nia a thusawi kha Pu Zoramthanga hian a la hrerengte pawh a ni ve thei. Heti lutuka mimala han inbeih mai chu tia Pu Lalduhoma dem pawh an tam viau a nih kha. Independent MLA kan tih zingah Pu Lalduhoma chauh bang tura MLA rualte'n an nawr hi political vendetta (Politics-a phuba lakna) te a ni thei mai ang em? Chief minister Pu Zoramthanga rilru hi a la dam lo te pawh a ni mahna le.

Independent a inthlan chuh an ni nain, an nihna a chiang em em a, ZPM an ni tih mipuiin kan hria a, anmahni eptu party-te pawhin ZPM an ni tih an hria, dan tarmit chhah tak aṭanga thlir chuan han chawh pawr tur chu a awm ngei ang le. Pu Lal Thanhawla'n a thlangtu mipuite zah lohna a ni tia a sawi hi a dik hle a, "MNF MLA-te hmalakna avanga Mizo Kristian-te hming a chhe zawnga hriatreng a ni tawh tur hi pawi ka ti hle a ni," tia Pu Hawla'n a sawi hi sawi awm tak a ni.

Independent MLA-in party a zawm chuan MLA a nihna aṭanga ban theih a ni tih hi sorkar lai MLA rualte ṭanchhan a ni a, a formula nena han hmehbel chuan dik lo a awm ngei ang. Sawi tawh angin ZPM party an din a, Election Commission of India in political party-a a pawm hmain inthlan chuh an ngai a, independent an ni lo thei lo, an party pawm a lo nih takah ZPM angin an awm ta mai a ni. Hriatthiam duh chuan hriatthiam theih, hriatthiam duh loh erawh chuan hriatthiam theih loh a ni deuh ber. MNF MLA rualte chuan an hrethiam duh ta lova, bantir turin an hek ta a ni.

Hetianga an hek takah chuan  India Danpui 1985 kuma her danglam 52nd Amendment Act, 10th Schedule-in a sawi angin kalpui zui a ni ang a, House Speaker-in thutlukna a siam ang. House Speaker Pu Lalrinliana Sailo thutlukna apiang chu Pu Lalduhoma chan tur a ni. House Speaker-in thutlukna a siam hnuah erawh court-ah kal theih a ni, hetianga hekna a luh tawh chuan House Speaker hian thutlukna a siam thuai tur a ni a, a siam lawk loh phei chuan India Danpuiin chanvo a pek zawm lovah a ngaih theih daih!

Pu Lal Thanhawla'n thuchhuah a siama a tarlan ang hian dan bawhchhiatna lian tak a awm avanga MLA aṭanga inchawlhtirna a awm a nih chuan tu tan mah hriatthiam loh tur a awm lo; thil kalphung lang chiangsa reng, mipui pawhin an pawm thlap thil ching pawr lui a, ram leh hnam hmasawnna leh ram tana thil ṭha zawk tur ngaihtuah vang pawh ni loa mahni thawhpuite paihthlak tuma hmalakna hi chu a demawm hle a ni.