MLA Disqualify

Tun hnai lawkah Mizoram chu India ram State zinga hlim thei berah min thlang a, eng nge an tehfung tih chu hre si se lo mah ila, kan Chief Minister vang a nih kan ring thla ngawt a, hetia state hlim bera min thlan hnu lawka party leh party innghirnghona lian tak kan nei a, MLA aṭanga inban hial kan tum zui leh ta mai hi State hlim thei bera min thlangtute hian tisual chu an inti ve mai lovang maw tihte ka rilruah chuan a awm.

Tuna MNF-ten Speaker hnena an hekna hi nikum lamah ngaihtuah tawh niin Speaker hian Zoram People’s Movement (ZPM) anga Legislature Party din phalsak lovin hming dang invuaha Legislature Party din turin a hriattir a. Zo People’s Movement Legislature Party tih invuahin Speaker pawhin pawmpuiin amah Pu Lalduhoma ngei pawh Opposition Leader a ni ta a ni. Tuna taka MNF MLA 12 tena Pu Duhoma hekna thu leh MLA aṭanga paihthla tura hetia Speaker hnena an rawn thlen leh ta thut si hi a hmaa Zo People’s Movement Legislature Party tih hming Speaker-in a pawmpui vek tawh, CM-in a ruka a lo pawmpui ve theih si loh zia a lan chhuahna a ni mai ang em aw, ka ti.

Social Media lama tuna MNF MLA 12 ten Pu Duhoma disqualify tura an ngenna chhan hi ZPM anga mithar a lawmluhnaah thu a sawi tih leh ZPM MLA a nihna a pha lo, chutiang khatiang chuan thu a sawi, tih a ni a. Hei hi a dikna chen a awm a, MLA 12 ten an hekna chhan ber pawh niin a lang. MNF lam hian Pu Lalduhoma hi India Danpui 10th Schedule Para 2(2) bawhchhiaa puhin an hek ta a ni. Dan reng reng hi a nihna ang leh a ziak ang ngau ngaua lak chi a ni lova, he dan hi eng vanga siam nge an nih, hei hian eng nge a kawh tum tih hi a pawimawh ṭhin a. Chuta ṭanga ngaihtuah chuan Pu Duhoma an puhna hi an puhthlu zo hian ka ring lova. Amaherawhchu, tuna kan Chief Minister ṭawngkam han hawh ta ila, 'Opposition VC-te hi thereng an vaw thla' tih vang mai mai pawhin kan dissolve thei tia a sawi ang deuhin sorkarna chelhtu an nih miau avangin Pu Duhoma hi an disqualify ngei chuan a rinawm.

Speaker hian MNF party duhdanin lo disqualify ta se, bye election hi lo awm ta pawh ni se Serchhip bial bye election-ah hian MNF party hi an chak kher ang em tih hi sawi harsa tak a ni a. Politics-ah chuan mipui chan ai eirukna avanga eng emaw tawrhna thleng ni si lo, party hamṭhat duhna avanga mi dang tihhmingchhiat leh tawrhtir hi a hlawk lo mai ni lovin mipui khawngaihna kan dawntir zawk ṭhin. Mizoram politics bul lamah Mizoram Bawrhsap Pu Mac Donald sap khan khatia Pu Saprawnga te, Pu Kapthanga te dumde leng chuai khawpa a ben hnu khan tute'n emaw Jail-a khung turin an thurawn a, Pu Mac Donald sap khan, ‘Lallukhum ka khumtir lovang’ tiin Mizo Union hruaitute kha lungina khung a tum lo reng reng a. Capt. Penn-a ve thung kha chuan hun rei lo te chhungin Pu Khawtinkhuma leh Pu Lalbuaia kha Jail-ah a khung nghal ngawt mai a, an lar phahin Mizo mipuite'n an ngaisang sawt mai a ni. Hetiang chiah hian hektu MNF MLA 12 te hian Pu Duhoma hi an chawimawiin lallukhum an khumtir dawn tlatin ka hria.

MNF Party a din tirh aṭang tawh khan do nei lo hian an awm thiam meuh lo em ni chu aw a tih theih a, rambuai lai pawh khan India sipai nen an indo hrep a, India sipai do tur awm lohna hmunah anmahni leh mahni indo a, tanin/lungin siam chawpa inkhung rup rup duh kha an ni a. Tunah pawh party lian lo tak, Local Council election neih zawh taka veng 2 chauha sorkarna siam thei ZPM MLA pakhat heti taka an han do leh ta mai hi an rilru ṭhat vang chu a ni lo chiang khawp. Kum 1987 MLA election-ah khan MNF te hian registration an la tihfel loh avangin Independent angin an ding a, Congress lam khan an hek zui lem lo, 1989 MLA election-ah MNF(D) te pawh registration an la tih loh avangin Independent angin an ding tho a, tuma'n an hek buai chuang lo. Anmahni MNF ngeite pawhina an lo kal dan ni tawh, pawl dangin an han ti ve an ngai thei lo tlat mai hi chu an ramhnuai rilru an la paih lo hle niin ka hria.

Tun kan buaina inṭanna hi kum 2010 October ni 20-a Congress leh ZNP AMC election campaign kick off kha a tih theih awm e. Khami ṭum khan ZNP President Pu Lalduhoma hian thusawiin CM kalchhuak ta Pu Zoramthanga chu nasa taka deusawhin fiamthu thawh nana hmangin, Not Normal ang hialin a chhuah a, chu chu vawiin ni thlengin MNF te hian an la ngaidam thei lo. Ni e, mihring puitling, CM ni thei ve meuh Not Normal-a inchhuahsak chu a tuartu tan a na ve a ni. He ṭawngkam a hman avang tho hian kum 2015 AMC election dawnah ZNP-te'n thawhhopuiah MNF chu ngaichang mah se, MNF lam khan an thawhpui duh lo ta zel a. November ni 13, 2017-ah Pu Duhoma pawhin amah inhmuchhuakin Press Conference-ah mi dang deusawha, ṭawngkam tuihnai lo tak tak a lo hman ṭhin tawhnaah ngaihdam dilin, a chin chhunzawm tawh loh tur thute a sawi a ni. 

Hetih lai hian kumin kumtir lama Assembly Budget Session hmasa bera Governor Speech sawi zuinaah khan a ze ngai bawk chhuahin thiam tak leh ngaihnawm, nuih tiza bawk siin mumang ram chungchang sawiin kan CM bawk a rawn kap leh a nih kha. Hetiang hi thil awm dan a nih avangin a hma daih aṭanga an lo huat tawh MNF-te hian fiamthu thawh nana min hmang thintu hi Assembly House aṭanga kan paih chhuah a ṭul e, an ti ve maiah ka ngai a. Chutihrual erawh chuan kumin May ni 7 a, Speaker hova MNF MLA, ZPM MLA leh BJP MLA an Meeting ṭum a, May thla atanga December thla thleng COVID-19 do nana MLA hlawh aṭanga 30% pek an remtih tawh kha, hetiang thil a lo nih takah chuan ZPM MLA hlawh atanga 30% cut hi Sorkar hian mamawh tawh lo niin a inhria pawh a ni mai thei.