AMC-ah beiseina nung a awm ta

Mizote Jerusalem ‘Aizawl khawpui’ enkawltu ‘Aizawl Municipal Council’ chu ‘Aizawl Municipal Corporation’ a thlak a lo ni ta a. AMC hmasa en kha chuan hmasawnna leh inrelbawlna ṭha zawk ngaihtuah lam aiin lalna leh thuneihna inchuh an ang zawk mah a, Councillor-te pawh an in lal chhawk zut a nih kha. Mipui pawhin fiamthu thawh nan AMC kal ta kha ‘Musical chair/ Revolving chair’ nen an tehkhin phah hial bawk.

Tun ṭuma Councillor thlanna neih zawh takah khan state sorkara rorel lai Congress chu hneh taka paihthlak a ni a. Ward 19 awmnaah Ward 11 lain MNF chu mipuiin an sorkar tir a, hemi avang hian opposition lam pawh an phur thar phah viau niin a lang.

MNF chuan AMC-ah rorelna chu an kal ṭan pui ta mek a. An party mipui pawhin Aizawl hi Smart City thlan chhuah zingah a tel tak avangin beiseina sang tak neiin khawpui chei hna contract leh therhlo chhete te chu an kuta awm turah an ngai a ni.

He tih lai hian Union Ministry hian direct-in AMC kutah sum a pe nghal ringawt ngai lo tih chu tlang hriat a ni. Central aṭanga sum lokal chu state sorkar sum bawmah a lut phawt a, UD&PA department chuan ṭul leh ṭha nia a hriat angin AMC kutah a lo hlan chhawng zel ṭhin.

January ni 15, 2006-a ‘Orientation programme for elected AMC Councillor 2016’ buatsaih a hman puinaah AMC enkawltu UD&PA Minister Pu Zodintluanga chuan, khawpui hmasawnna atan AMC-in state sorkar a thawhpui thiam a pawimawh thu a sawi a. Chu bakah Minister chuan tun hnai khan a office chamber-ah Councillor thlan tharte chu lengah a sawm a. AMC hi party anga inbeihna hmun tur ‘political field’ a nih loh thute sawiin, khawpui cheibawla felfai taka thawk hoa enkawl tlang tur an nih thu a lo hrilh bawk.

Councillor thlan chhuahte hi mi vengva leh ṭha ṭheh ṭhawh, vantlang chunglam ṭhiaua ngaih an ni a. Mayor leh Deputy Mayor te pawh mipui duhthusam an ni. Chutih rualin, an thawhpui ber tur UD&PA Minister lah rilru zau veh vawh a ni bawk a. Tun AMC-ah hi chuan mipuiin beiseina thar leh nung kan nei ta e.

Party inan loh vang maia thawkho thei lo tur an nih loh thu a sawi avang te, rilru zau tak pua Aizawl hi India ram khawpui dangte ang pha ve tura cheibawl duhna rilru Minister hian a pu tih a rin theih a. He tih rual hian AMC lam pawh hian state sawrkar hi en hrang bik lova, ṭha taka an thawhpui thiam a pawimawh takzet a, an pawimawh dan chu a thuhmun reng a ni tih an hriat tlan a ṭul hle bawk.

State sorkara rorel lai leh AMC-ah roreltute hian lungrual taka Aizawl khawpui chei hna an thawhho chuan, khawpui thianghlim leh nuam takah kan chhuah thuai theiin a rinawm a. Chumi hun chu Aizawl khawpui mai ni lo, Mizo zawng zawngten kan nghakhlel hle. Aizawl mai bakah Mizoram khawpui dangah pawh anmahnia an inrelbawl theihna turin UD&PA Minister chuan theih tawp chhuahin hma a la mek a, a hlawhtlin theih hun chu District capital lian zuala chengte leh an khaw chhehvel mipuite chuan Tlumtea thlir takin an thlir mek reng a ni.

A thu hrimah political party-te hi ram leh hnam siam ṭhatna tur leh chawikanna atana din a ni a. Kohhran hrang hrangte pawh chatuan ram kan thlen theihna tura min kaihruaitu tura din a ni. Presbyterian, Baptist, UPC, Salvation Army leh a dangte tihlena Biakin ropui tak tak san nan chauha Kohhran hi din a ni lo ang bawk hian; MNF, Congress, ZNP, MPC te pawh party bil tihlenna tura din hi an tum (goal) lian ber a ni lo. Mizoram leh hnam hmasawn nan pheikhai rual taka an theihna zawn ṭheuha an thawh tlan dial dial hi an tum tur chu a ni zawk.

Pu Duhoma’n, “Fatu hlui chu a awm ang,” a tih angin, a thawktu na na na chuan chan tur chin an nei ang a, kut tling taka an thawh erawh a ṭul ang. A pawimawh ber chu kan zavaia chhawr theih tur an ni tih an theihnghilh loh hram a ṭha a. Chumi tur chuan a tua te pawhin ‘dik chu dik, dik lo chu dik lo’ ti ngamin, lungrual taka sawihoa thawh tlan dial dial a ṭul ber fo ang.

Tunah leh hma lam hun zelah eng political party pawhin sorkarna siam mahsela, Chief Miniser/ Minister leh MLA-te reng reng hian UD&PA Minister ang hian party bil rilru chauh an put ṭhin hi dahbo tawh se. Khawhawi zau tak neiin kan ram leh hnamin hma a sawn theihna turah chuan opposition party te nen lungrual takin thawkho dial dial tawh ila, reiloteah ram hmasawn tak niin a thu chauha kan suangtuah ṭhin ‘Serafim state’ pawh kan hnaih ve thei mahna.

AMC leh state sawrkara thuneitute u, pheikhai rual takin ṭan han la sauh sauh ula, beiseina sang tak nen mipuiin kan thlir reng che u a ni tih in lo hre reng dawn nia.

- R.Lalhmangaiha,

Bethlehem Veng