Ṭhalaite hun!

Tuna kan ram hruaitute hian eng tik niah emaw chuan an mawhphurhna hi chawlhsan hun an la nei dawn a. Chung huna ram hruaina hna rawn chelhtu tur chu tuna
ṭhangthar lehkha thiam tak tak te leh zir mekte hi an ni dawn. Chumi avang chuan tuna ṭha-laite inpuahchah ṭan hi a pawimawh hle ang.

Rilru leh taksa lamah tun hun aṭanga kan inbuatsaih ṭan lo a nih chuan vawilehkhatah kan koah ram hruaina hna mawhphurhna hi lo thleng thut ta se kan zei lo viau thei ang a, chu kan zei loh viauna avang chuan kan hmingchhe zui viau thei bawk.

Tuna kan ram hruaituten ram an hruai dan leh ram tana ro an rel dante hi kan chik peih a ṭha hle ang. Tuna kan ram hruaituten an tih dik loh ang chite hi kan koah mawhphurhna a rawn thlen ve huna ti lo ngam tura tun aṭanga rilru lama kan inbuatsaih ṭan pawh a tha hle ang.

Chutih rual chuan, tuna ram tana ṭha tur zawnga kan ram hruaituten hma an lakna ang chi an la tihpuitlin hman lo te hi kan koah mawhphurhna a awm hunah ṭha taka chhunzawm sak thei zel tura rilru dik tak pu tura kan inzir chhoh pawh a ṭha hle bawk ang.

He ram hian a der maia hmangaihtu ni lovin he ram tana a thil neih leh nunna hial pawh chan ngam tur hruaitu a mamawh tawh tak zet si a. A tak taka ram hmangaihtu hruaitu ṭha leh dik chu nei ila kum 1986-a state puitling kan nih tirh aṭanga tun thleng hian he ram hian tun ai hian hma a sawnin, kawng tam takah a intodelh hle tawh tur hi a ni a.

Ka ram hian eng thil tha leh hna tha nge min pek ang, tih lama buai mi ni lo, he ka ram tan hian eng nge tih theih ka neih a, zoram tan hian eng thil ṭha leh hlu nge ka hnutchhiah ang a, ka thiam ka finnate hi eng tin nge he zoram tan hian ka hman theih ang, ti theitu he ram hian a mamawh. Chumi thlen tir theitu chu tuna mite, nakin maia he ram hruaitu nihna fawng pawimawh tak vuantu turte hi kan ni.

Mipui chan ai mahni chhungkaw tana eiruk ching leh hlep ruk ching he zoram hian a mamawh lo a, thil dik lo hnawl ngam a mamawh tawh hle a ni. Mi dik leh rinawm, mi huaisen leh taima, lehkhathiam leh eng thil pawh a ngaihna, a chinchang hria, rilru nghet, mi fing, a der mai ni lova dik taka Pathian leh a ram hmangaihtu he ram hian a mamawh tak zet a ni.

Chutiang ang rilru pu hruaitu ṭha leh rintlak, mite zui tlak ni tur khawpa hruaitu (hotu ni lovin) ni turin ṭhangtharte hi tun
aṭangin inbuatsaih ṭan ila a ṭha hle ang. A hun a lo thlen hunah ka inbuatsaih ang tih rilru pu lovin.

Upa hun a liam ang a, ṭhalaite hun a rawn her chhuak ngei dawn si a!

- Nawlchunga Chinjah, Siaha