RORELNA KHAWL ROPUI

Engkim siamtuin a din kan taksa hi khawl ropui ber chu a ni a, a enkawltu chu ngaihtuahna a ni. Ngaihtuahna leh taksa chu awm dun; lak hran theih loh a ni. Kan taksaah hian finna leh remhriatna te, tumruhna leh huaisenna te, Mizo tlawmgaihna te, vengte hmangaihna te, rinawmna leh taimakna te, hmangaihna ze kim leh khawngaihnate an awm a. Kan taksa khawl ropui hian chungte chu a rawn herchhuah theihna turin ngaihtuahnain a thunun a ngai a. Chutih hunah chuan mi fel leh mi ṭha a rawn herchhuahpui ṭhin.

Chutihrual chuan ngaih-tuahna ṭha lo erawh chuan ama tan mai ni lo, chhungkua leh khawtlangah te, ram tan te thil ṭha lo a rawn herchhuahtir ṭhin.

Khawl ropui pahnihna chu kan ram rorelna State Assembly chu a ni. He House hian ram tan thil ṭha a herchhuahpui theihna turin khawngaihna leh duhsaknaa mipuiten an thlan tlin MLA-te an awm a. He house hian ram tan thil ṭha a herchhuahna turin House member te chu tlawmna nun keng chungin an tumruhnate chu huaisenna leh thawhrimnain a zui a ṭul.

Roreltu chu chapona te, mi lian ta riaua inhriatna te, dinhmun ṭha tawk taka an awmna te, mahni hmasialna te, duhamna leh rinawm lohnate chuan a bawh buai ṭhin avangin, mipuite beiseina hmunah rorelna khawl chuan ram tan thil ṭha a herchhuahpui tam thei lo ṭhin. Heng nun ze ṭha lote hi roreltu fel chuan a hnuchhawnsan a ṭul ṭhin.

Motor a ṭhat loh chuan driver chu motor hnuaiah hnathawh kawr nen a mu ṭhin. A ṭha lai chul mam chu thil tih harsa lo tak a ni. A chhe lai siam ṭhat erawh chu thil harsa tak a nih avangin tih tak meuhin buaipui a ṭul ṭhin. House chhuatah chuan member te chu tlawmna nuna bul ṭanin hnathawh kawr nen an mut zangthal a hun ta.

Mahni thusawi anga awmna te, rorelna inkhai rual te, duhsak bik neih lohna te, rinawmna leh ram tana thawhrimna te, mi tinten an chanvo dik tak an chan theihna turte chu kan ram rorelna khawl ropui hian rawn herchhuak se, tih hi eng lai pawhin mipuite beisei a ni.

- H. Neihchungnunga

Durtlang North