Ram, Hnam leh Sakhua
Tun hnaiah hian Mizoram Congress hian an auhla an thlak thut a, Ṭhat Loh Theih Lohna Bawm kha an zuar ta lo a. Tuna an zawrh chu ram, hnam leh sakhaw himna atan Congress vote turin an inzuar a, an him sawt theih dan tur an sawi lo erawh a kim lo.
Sakhaw himna hi a pawimawh em em a, BJP sorkar hnuaiah Kristian sakhua hi a him loa ngaihna a len avang hian sakhaw zalenna pawh kan sawi nasa tawh tih kan la hria ang. Sakhaw zalenna hi kan mamawh a, Hindu Lal Ram din tumtu BJP paih thlak hi kan insawisiak a ni. Congress auhla pawh hi BJP paih thlak a ni a, Mizoramah chuan BJP hi tla sa an ni. Mizoramah hian MNF an sorkar avanga sakhaw him lo sawt pawh ka hre lo a, ZPM pawh sorkar se a him lo sawt lo ang, Congress sorkar se sakhua a him sawt chuang lo ang. Central sorkar lam a ni Sakhaw himna hi chu. Sakhaw himna kan duh chuan Lok Sabha inthlan dawnah zawk hian NDA lam ni lo Congress leh ZPM ah duh kan thlang mai tur a ni.
Hnam himna phei hi chu Congress ho sawi chi an ni lo, Congress chu National Party an ni, hnam tin awmkhawmna a ni. Mizorama Congress an sorkar avanga Mizo hnam a him sawt chhan tur a awm lo a. ZPM sorkar se a him sawt dawn a ni chuang lo a, MNF pawh sorkar se a him sawt emaw him lo sawt pawh a ni lo. Central sorkar policy lam zawk a ni daih a ni. Hnam kan sawi chuan Congress Candidate tur an sawi zingah hian hnam dang pasal nei a awm an ti a, chu party chuan hnam himna chu sawi a inhmeh lo ta hle zawk a ni.
Ram himna phei chu MNF hian an thawh hlawk. Ramri buainaah Congress hunlai khan kan Police ten kan zirlai hruaitute an vua a, Assam Police lamin an vaw bawk a. Ramri humhalh ngam lo tiin Congress kha a puh theih a, MNF hi chu an at huai a, ramriah pawh silai an hmet puak ngam. Ram himna kan duh chuan Congress hi zawrh chi loh tak an ni.
Politics auhla hrang hrang a awm ṭhin a, Congress hian au hla an thlang sual a, mahni hla tur phuah se, mi hla phuah an sak avang hian an inhmeh lo a, ram leh hnam leh sakhaw himna hi chu Pathianah zawk a awm a ni.
- Lalthanpuia, Dawrpui Vengthar