Rajya Sabha Bill pass kha...

Ni 20 September 2020, Chawlhni khan Rajya Sabha chuan Bill pathum a pass a, chungte chu- 

1)    Farmers’ Produce Trade and Commerce (Promotion and Facilitation) Bill, 

2)    Farmers (Empowerment and Protection) Agreement on Price Assurance and Farm Services Bill leh,

3)    Essential Commodities (Amendment) Bill 

Hêng ‘bill’ a pass takte hi mi thiam­te'n uluk takin an zirchiang mek a; engtiangin nge kan rama agriculture dinhmun a nghawng pawi theih ang tihte pawh an zirchiang mek zel bawk. A hnuaia tarlante hi an thlak danglam zinga a langsar zual deuhte chu a ni:

1. Sumdawnna hmun (Trade area) hian a huam zau hle tawh dawn a. State tina Agriculture Product Market Committee (APMC) te thuneihna chu ṭhiah vek a ni ang a. Sumdawng (Traders) te pawhin sumdawnna hmunpui ‘Mandi’ an tih kaltlanga lei leh hralh kher a ngai tawh dawn lo va, lo neitute kawtchhuah ‘Farm gate’ ah te pawh an leisak zung zung thei tawh ang. 

Chutiang a nih chuan loneitu (farmers) tam takte innghahna Mini­mum Support Price (MSP) chu a awm theih a rinawm tawh lo tihna a ni a. 

Ram dangte chuan kan ram (Mizoram)-a thil man inthlak zung zung, a tlawm leh to lama bithliah awm lo, Sorkarin tihtheih a neih bawk si loh ang hi lo neitute hlauh em em a ni. Chutihrual chuan, he dan thar hian Mizoram  erawh min nghawng ve lem lo thung ang. A chhan chu lo neitute sumdawn dan mumal a la awm miah loh avang zawk a ni ber. Tuna kan sawhthing, serthlum, hmarcha leh thlai dang tam tak kan hralh dan ngai ang tho hian kan la hralh thei dawn tihna a ni. 

2. ‘Trade license’ – lo neitute nena insumdawn tawnna tura phalna hran neih a ngai tawh lo ang a. Sumdawng PAN Card nei tawh phawt chu Agri­culture hmanga sumdawnnaah hian an zuang lut thei tawh dawn tihna a ni. Agriculture lama sumdawngte chu lo neitute ang chiahin sumdawnnaa chhiah hrang hrang (Market fee leh cess) lakah awl an ni ang a. He dan thar hi sumdawng lian zawkte leh company te tan a ṭha dawn hle a. India rama lo neitute chu chungho thuneihna hnuaia loh theih loha an tlukluh mai chu an hlau hle a ni. 

3. Essential Commodities te hi Sorkar kaihruaina (control) a uluk taka a lei, a sem leh a hralh ṭhin a ni a. Ni mah sela, bill tharah erawh buh leh chhang siamna (cereals), dal leh be lam chi (pulses), hriak siamna chi (oilseeds), hriak ei chi (edible oils), purun (onions) leh alu (potatoes) te chu hun khirh tak ramin a tawng a nih ngawt loh chuan sorkar kaihhruaina hnuaiah a awm tawh lovang. Hei hi lo neitute tan a ṭhat rualin thil hlauhawm tak a ni ve bawk tih hriain ‘The Week Magazine’ chuan khandaih hriam tawn (double edge sword) nen a tehkhin phah hial! 

A chunga kan sawi tawh buh, dal, purun leh a dangte khi sumdawng lian zawk te'n thingtlang lamah kalin a tam thei ang ber an lei khawl thei tawh dawn a. Chu chu lo neitute tan sum hmuhna awlsam tak a nih theih rualin, chung sumdawng liante chuan tam tak leiin an dah ṭhat (stock) theih dawn avangin mamawh hun huna kan lei mai theihna (demand supply) a ti buai thei dawn a. Chu buaina chuan thil man a tisáng zual thei a; mi rethei zawkte tan phei chuan thil hlauhawm tak a ni thei ngei ang. 

Heng kan tarlan bakah hian thil tam tak sawi belh tur a la awm a. A pawimawh ber zawk chu engtin nge keiniho hi kan lo inhmakhua ve ang? tih hriat hi a ni.