Thlarau MR an awm tak tak em?
Hman deuha Mizo-ram titi lar tak pakhat chu ;thlarau MR' hi a ni. Hemi awmzia chu sorkar department hrang hrangten MR lem hmanga pawisa an lak ṭhin sawina a ni ber; MR chhawr tak tak si loin MR hlawh thla tin an la a, hei hi thlarau MR tiin hming lem an vuah sak ta a ni ber mai.
Hmanni deuh khan Vanglaini chanchinbu headline-ah sorkarin thlarau MR tihbo a tumnaah department 40 aṭangin MR zat leh EPIC thehluh a nih thu an rawn ziak a. Kha thil kha sorkar department hrang hranga MR lem tihbo nana new ṭha leh
ṭangkai tak niin ka hria.
Thil pawimawh ber zawk erawh chu khatia MR zat leh an EPIC an thehluh khan a tawk mai lo a, sorkarin engtin nge hma a lak chhunzawm tih hi a pawimawh lai ber chu a ni.
Thlarau MR hi a lo awm tak tak a nih chuan sorkar hian chhui chhuak ngei se, tuna department 40-in MR list an thehluh aṭang hian a chhui chhuak thei vek dawn a ni. Corruption a zung chawpa pawh phawi a, phoro tum tak tak tan chuan he MR list leh kum 20 kal ta vel aṭanga MR hlawh lakna zawng zawng kha en milin chhui chiang se, duh thalin thil ti dik lo chu a hrem thei dawn a. Sorkar hian hetianga hma a la ngam a ni si loh chuan tuna MR list thehluh ringawt hian awmzia a nei dawn lo tihna a ni.
Sorkarin sum ren-chemna kalpuiin kawng hrang hrangin hma a la mek a, mipui lam pawh nasa taka sawr kan ni. Sorkarin sum renchamna a kalpui avanga mipui tawrhna langsar deuh deuh a awm a, lirthei Road tax kum 15 atana lak te, lirthei high security registration plate man to uchuak taka siam, a ṭangkaina hmuh leh hriat tur awm miah si lo te hi a ni a. Tunah hian tax chi hrang hrang lak tumin sorkar chu a inpuahchah mek a ni.
Hetianga mipui lam chuah kan nek sawr a, sorkarin a tih tur dik taka a tih ve leh ngam si loh chuan sorkar dawihzep tak, sum hmuhna tur a nih chuan mipuite chu engahmah ngai lo sorkar a ni tihna a ni ang.
Sorkar hian dik taka thil a kal pui duh a nih chuan ram changkang zawkten an mipuite laka dan khauh taka an lekkawh ang chauh entawn loin ram changkang zawk hruaitute hnathawh dan te pawh entawn ve se. Mipui hnen
aṭanga engkim beisei loin dik taka rorel tura chan a ngaih pawha an chan ngamzia te, ram tana an inpumpekzia te pawh hi a takin lantir ve se.
Tichuan, Mizo mi-puite hian kan hruai-tute hi sawisel luai luai loin an inpekna leh ram an hmangaihzia a takin kan hmu ang a, kan fak ve thei tawh ngei ang.
- Ramhmangaiha