Gorkhali te OBC dilna chungchang hrilhfiahna

Mizoram hi District kan nih hunlai daih tawh aṭang khan Gorkhali-te hi OBC an ni tiin Assam sorkar chuan TAD/OBC/6/61/51 dated 12/9/1961 daih khan puan a ni. Mahse hun a kal zel a, Union Territory-ah te kan lo awm chho a, chutah chuan engmah harsatna awm loin Gorkhali-te hian OBC facility
(hamṭhatna) an dawng zel a. Mahse Mizoram hi State a hlankai a nih khan he dan hi adapt loh a nih avangin thil dang zawng zawng hi adaptation of law hmangin Mizoram chuan Assam hunlai dan chu Mizoramah hman a ni.

He dan OBC erawh chu hmaih palh a nih kan ring a, a tel lo zingah awm a ni chungin sorkarin kum 2006 thleng hian a hmang leh tho a ni. Tichuan, tlai tawh takah Home Department chuan a lehkha No. J.14012/3/2006 dated 8.9.2006 a chhuah a. Chuta ṭang chuan Gorkhali-te OBC Certificate pek hi DC tinten an titawp ta a ni.

Tin, Mandal commission of India Survey chuan Gorkhali Mizorama chengte chu OBC an ni e tiin Mandal Commission lehkhabu report page no. 351 of 31.12.1980 ah a ziak chiang a. Chumi report chu Supreme Court pawhin hriattirna a chhuah a ni. Supreme Court hriattirna chu Article 16 (4) of Indian Constitution ang hi a ni. Chumi zulzui chuan Mizoram state pawhin action lain Pu J. Lalsangzuala (L) Finance Minister, Govt. of Mizoram chairman-na hnuaiah Permanent Body a din a ni. Chu Commission hnathawh tur chu Gorkhali-te OBC pek tura ngaihtuah a ni. Tin, A/14012/1/1994/HM (OBC) dated 6.8.2004 ah pawh Home Minister, Govt. of Mizoram Pu Tawnluia Chairman-na hnuaiah Permanent Body for OBC din a ni leh a ni. Chutiang bawkin Govt. of Mizoram Notification No.J.14012/3/2006 OBC dated 16.10.2009 khan Permanent Body of OBC for Gorkha chu din a ni leh ta a. Chu Committee thuchhuak No. A.14012/1/2011-HM-OBC dated 2.9.2011-ah chuan hetiangin recommended a ni.

1) Gorkhali-te chu Central sorkara hamṭhatna pek ni se, chu chu zirna lamah leh employment (hnathawhna) lama hamṭhatna awm thei ang chi a ni ang.

2) State sorkar chhungah chuan eng facility mah dil theih a ni lo ang.

Chuti a nih vang chuan Mizoram sorkar chuan Cabinet Decision turin 3.7.2012-ah Home Department chuan Political Department-ah Cabinet-in a ngaihtuah atan a dah chu vawiin ni thlengin thawm awm loin a pil ta vang vang a ni. Tin, Supreme Court direction-ah chuan Permanent Body-in recommend-na a siam tawh chu sorkar tan chuan hman (binding) a ni ang a ti. Tin, Permanent Body-in a recommended tawh chu Parliament/ Legislative Assembly-ah pharh kher a ngai lo.

Minority Commission of India pawhin Mizoram sorkar chu a ngaihdan a zawt tawh a. Mahse Mizoram sorkar chuan kan la ngaihtuah mek (under consideration) tiin a chhang a ni. Heti a nih si chuan Mandal Commission recommend-na anga tun dinhmuna pek a rem lo a nih chuan Assam-in mi pek (OBC) chu interim period atan Mizoram sorkarin min ngaihtuah sak se chuan sipai lamah hna zawn nan leh zirna sang zawk zir nan kan hmang ve thei ang. Tun dinhmunah chuan Mizoram state pawn lam aṭanga OBC Certificate neite tan remchanna leh hamṭhatna kan siam a ni ringawt mai a ni.

Chuvangin, Mizoram Gorkhali-te hi OBC-a dah a nih chuan tualchhung mi Gorkhali ngeiten he hamṭhatna hi an dawng thei dawn a ni. OBC quota hi ST/ SC ten an chang ve thei chuang lo a, central sorkarin dan fel tak a siam hi a palzut thei chuang lo; him loa ngaih ringawt hi chu hriat chian loh vang a ni. Hei hi citizen-te rights palzutna a tling thei bawk a ni.

- HB Thapa, Bungkawn, Aizawl