Inthlan a hnai, Mau an sawi tawh lo

Mizoram sorkar Flagship Programme chu Mau a ni a, kum 2023 inthlan dawn meuh chuan mau chanchin an sawi tawh lo. MNF chu mau hmanga tlin nawn an inring tawh si lova, SEDP sem leh ZPM beih vak vak hmanga 'inchibai'-in an tum an ti. Mau atana pawisa kan hman tawhna lam hi en nawn ve a ṭul a ni.

Covid-19 avangin pawisa kan neih loh thu kan ram hruaituten an sawi an sawi a, mahse kum 2019-2022 inkarah khan mau/rua atan Rs nuai hlir 2,359.46 sèn a ni tawh a nih chu maw le.

Pu Zoramthanga khan an kal dan tur an duansâ thu leh bàwng insi ang phata bul an ṭan tur thu a sawi a, Covid-19 pawh khan mau pawisa hi chu a tibuai ve lo. Kan ram mau (or rua) duhtawk lovin tissue culture hmangin state pawn aṭangin an han bei a, a chang leh hardenning an ti thul, a ṭiak an sem lah chu a ṭo chhe em em an la ti zui. Zir chianna awm mumal lova pawisa awm ang ang hmanga mau lei chuan Mizoram tan sum a thawh chhuah kan la hre lo. Kan economy a ṭhat phahna emaw hausak phah an awm pawh ka la hre lo. Hlawkpui an awm chuan mau kui ṭiah nachang lo hre ru khiau; a chi supplier-te kha an hlawk ang, tute nge an nih chu Ramhlun South lam hi zawt ila an chiang hle an ti.

Mau ṭiak supply tura tender chhuah hmasak ber chu Covid-19 vanglai June 3, 2020 ah ngat a ni a, mi tam tak rilṭam an awm laiin ṭiak 84,000 an supply thei bik. Hripui vanglai bawk May 7, 2021 ah ṭiak 1,22,900 an supply leh bawk. April 22, 2022 ah ṭiak 3,87,000 supply a ni leh bawk.

Hripui len lai pawha an buaipui mau hi tun inthlan dawn hian an sawi ri tawh lo, ZPM hlir an sawi tawh. An flagship hi mau nge ZPM pawh a hriat loh nia.

- Lallawmsanga (LS Hnamte)