Hming ziah zawm vek kher a ṭul em?

Mizo hming ziah dan an sawi ṭhin chu, ziah zawm vek tur, tih a ni. Hei hi Mizote'n hawrawp (A Aw B) kan neih hnua tute emawin dan/kalphung an siam a ni ngeiin a rinawm a, hawrawp neih hma chuan kalphung lo neih ngawt thu a awm lo. Chuvangin, kum 1894 hnu lama tih dan kan neih a nih ngei a rinawm a, tute'n emaw kalphung an siam/duan (chawp) a nih ngei pawh a rinawm.

Kan pi leh pute kha an hming a tawi hlawm viau a, hming tawpa 'a' leh 'i' tel loin lam hnih aia sei lo a ni tlangpui. Chuvang chuan, 'Mizo hming ziah zawm vek tur' tih pawh hi a àwm ve tho mai. Hming, a tawpa 'a' leh 'i' tel loa lam hnih aia sei an uar ṭan hun hi ka hre hauh lo a, tunah erawh chuan lam nga/rukte pawh a awm tawh. 'Vanlalthlamuanpui' tih te, 'Vanlalhmangaihzual' tihte hi ziah zawm vek chuan sei ve tak a ni. Hnam dang tan phei chuan hriat leh sawi dik har ve ngan ngan tak tur a ni.

Mizo hmingah sei tak tak a awm tawh avangin dan/kalphunga kan neih leh upa zawkte'n min zirtir dan, 'Mizo hming chu ziah zawm vek tur' tih hi tunlaiah chuan khauh taka kalpui zel chi a ni lo ve thei tawh tlat mai. 'Vanlalthlamuanpui' tih te, 'Vanlalhmangaihzual' tih te, hming sei dangte pawh ziak zawm vek loin, ṭhen mai a ṭha zawk mah àwm asin! Entirna'n–Vanlal Hmangaihzual, VL Hmangaih Zual, Vanlal Thlamuanpui, adt. Chief minister hlui Pu Hawla'n Lal Thanhawla a ti te, Lal Rinmawia tihte hi a ṭha riau tlat!

Sawi tawh angin, 'Mizo hming chu ziah zawm vek tur' tih hi hawrawp kan neih hnua tute'n emaw dan/kalphung an siam a ni àwm si a, dan (act/rule) ang maia zawm ngei ngei ngai, tihmâkmawh chu a nih hmel lem lo. Hun a inher a, kan duh dan, mizia, kalphung, kan tih ṭhinte leh kan thlen chinte a danglam zel a; chumi mila kan inher rem ve zel chu a ngai a ni.

'Mizo hming chu ziah zawm vek tur' an tih hun lai khan passport, PAN card, eng emaw atan form fill-up tih velte an la hre pha kher lo ang; Mizoram bâk an la pêl thui lo bawk ang. Tunah chuan mi tam takin kan mamawh a ni tawh. Heng atan hian hming ziah zawm vek buaithlak dan kan hre chho, kan tawng chho zel.

Chuvangin, 'Mizo hming ziah zawm vek' tih hi chu Persia dan ang maia zawm ngei ngei tum kher lo ila, inbeisei lo bawk ila, hming sei deuh chu ṭhen hrante pawh chíng chho zel ila a ṭha zawk tawh mah àwm asin!