ISUA RUALA KAL KA DUH
India hnampa Mahatma Gandhi khan Isua hi a ngaisang em em a, a pianna leh seilenna te, a thusawi leh a zirtirna te, hmangaihna leh khawngaihna a neih thukzia te ngun taka a zir chian hnuah heti hian a sawi a, "Kristian, Isua Pathiana betute chuan Isua hnung an zui ṭhin. Kei chu Isua hnungzuitu ni mai lovin ISUA RUALA KAL KA TUM A NI,” a ti. India ramin zalenna a hmuh khan zalenna sual chhuaktu hnampa Pu Gandhi-a kha, hruaitu nihna chang pha lova nek chhuahin a awm ta tlat mai a, thuneihna chang ta zawk chhungkuate chunga thil thleng rapthlakzia chu sawi ngai lovin kan hriat kha. Pu Gandhi-a khan thuneihna changin Isua zirtirna milin ram rorel lungphumin ram lo kaihruai se, kan India ram ropui dan tur chu suangtuah phak pawh a ni lo vang.
Kan ram khawpui ber Delhi State enkawl tura Am Atmi Party-in sawrkarna a chan tirh khan an CM Arvind Kejriwal chuan heti hian a sawi a, "He State hi Lal Isua zirtirna milin ka kai hruai dawn,” tiin. Arvind Kejriwal hi Lal Isua zuitu Kristian ni lo mah se Lal Isua zirtirna hrechiang tura Kristian School-a zir chhuak a ni. Ro an han rel chho va, mi retheiten an chanvo dik tak an chang a, Electric conection leh bill te an free vek a, Sawrkar School te chu Private school tluka ṭhain an siam a, School fee tam tak tak chawi ngai tawh lovin mi rethei zawkten lehkha an zir thei ta; Sawi vek sen a ni lo. Mipui ngaihdan tlanglawnah chuan tuna an kal dan ang zela an kal chuan an peih chhung chu ro an rel ang, an ti tawp mai a ni. Punjab-ah sawrkarna an chan mekah thawm mak tak lo awm chu, an Minister pakhat chu cheng Nuai khat pawh tling mang lo ei ruk thuah banin a awm, a va ropui em!
USA khu Red Indian ho ram a ni a, sapho Europe aṭanga pem lut hoten Sawrkar thar an din khan, President hmasa ber George Washington-a khan Bible nemin sawrkar thar lungphum chu phumin thutiam a la a, Bible chhiar leh ṭawngṭainain hun tam tak a hmang ral a, pemkhawm sawrkar chu khawvel awptu an lo ni thei ta a ni. Bihar CM Nitish Kumar an district ṭawp ber leh corruption nasa ber ram an siam ṭhat dante, Northeast té ber Tripura ram; Manik Sarkar-a'n State changkang ber pawla a siam chhoh dante hi Lal Isua zirtirna; mahni inphat policy chiah kha a ni.
Keini pawhin ramhruiatu kan thlang dawn, mahni duh zat zat state budget leh dan hman tur siamin kum 36 kan lo kal ta. Tu mah hi lungawi kan awm lo niin a lang. Kum kha chen min lo kaihruaitu party te pawhin tute pawh lo lal se, engmah an ni chuang lo vang tih ṭawngkam an chheh danah hiah beidawnna khurah min hnuk lut a nih ber e. Mahse beidawnna hi Setana chanvo a ni, Isua ringtu tan beidawn a thiang lo, Lal Isua ruala kal tum, Isua zirtirna hmanga ram hruai tum mi ṭha, kan vote hlu tak hmangin ko chhuak ang u. Bialte hmasawnna tura thawh nasat avanga cher phah rawih ngam, Opposition party pawhin kan MLA an tih theih tura mi zau, sawrkar sum party induhsak nan leh Election campaign nana hmang lo ngam, tih theih miah lo tur tih hre reng chung pawh amipui bum nana tiam vak vak lo ngam hi thlang chhuak turin inbuatsaih ang u.
- Pc Muankima, Saitual, Ph: 9862816516