Ar vulh vs NLUP
Mizoten ar vulh dan kan hriat ṭhinte chu zawi zawiin kan kalsan mek a. Ar chi ṭha kan tih ṭhin chhang zing leh note dam thei deuh mai ni tawh loin thar rang zawk leh hlawk zawk te pawh khawvel thiamna avangin kan lo hmelhriat ve ṭan ta.
Ar vulh pawh chhungkaw tam tak eizawnna tling leh tlak a lo ni ve mek ta a, sorkar flagship programme NLUP-ah pawh ar vulh thlangtu chhungkaw engemaw zat kan awm ve ta bawk a. Sorkar hian min ṭanpui a, kan beisei ang ngeia phur tak leh taima taka vulhin hlawhtling ngei tura ṭan kan lak ve a ngai a ni.
Ran vulhtu chuan hlawhtling taka vulh tur chuan taimak-na piah lamah a hralhna a neih ṭhat a ngai. Tunlaiin kan ramah ar vulhtuten harsatna kan tawk mek a, chu chu state dang aṭanga ar lo lut nasa lutuk hi a ni. Ar chaw leh ar note te an state-a an siam chhuah ṭhat avangin senso tlem zawkin ar an vulh thei a. Ar man pawh an tih hniam theih zawk bawk avangin Mizoram chhunga ar vulhtute chu min luahlan mek a ni.
Hetianga kan kal zel chuan Mizo-ramah hian ar vulhtuten harsatna kan tawk chho zel ang a, ar vulh hi eizawnna tlak a ni lo thuai ang. Ar vulh hi eizawnna tlak a nih loh hunah meuh chuan chhungkaw tam tak eizawnna chu phai vaiho in an chimral sak vek dawn tihna a ni.
NLUP-ah hian sorkarin mipuite eizawnan turin trade hrang hrang duhthlan tur a siam a. Heng trade hrang hrangte hian hna thawh man awm tura ṭha taka hralhna an mamawh ṭheuh a. Tun anga kan kal zel a nih chuan ar vulhtute chauh ni loin thil dang thar chhuahte pawhin harsatna leh beidawnna an tawk ve ngei ang.
Chutiang din-hmun kan thlen hunah meuh chuan ar vulhtute mai ni loin ar chaw siamtu leh ar note keitirtute thleng hian kan buai vek dawn a, khua a tlai lo tawh ang a, sorkar programme NLUP pawh trade hrang hrangah kan hlawhchham pui dawn tihna a ni.
Hetianga vai ram aṭanga kan eizawnna tam takah min rawn chimral a nih ngat chuan Mizo mipui zingah mirethei kan insiam belh ṭeuh dawn tihna a ni ang a, a hlauhawm tak zet a ni. Kan sorkar hian hmalak dan a hre ngeiin ka ring a, kan lo nghak e.
- Lalthana, Aizawl